- ୫୦ ମିଟର ରାଇଫଲ ୩ ପୋଜିସନ ସୁଟିଂରେ ବ୍ରୋଞ୍ଜ ସହ ଇତିହାସ ରଚିଲେ ସ୍ୱପ୍ନିଲ କୁସାଲେ
ନୂଆଦିଲ୍ଲୀ, (ପିଆଇବି) : ପ୍ୟାରିସ୍ ୨୦୨୪ ଅଲିମ୍ପିକ୍ସରେ ୫୦ ମିଟର ରାଇଫଲ ଥ୍ରୀ ପୋଜିସନ୍ (ଥ୍ରୀପି) ପୁରୁଷ ବର୍ଗରେ ପଦକ ଜିତିବାରେ ସ୍ୱପ୍ନିଲ କୁସାଲେ ପ୍ରଥମ ଭାରତୀୟ ଶୁଟର ଭାବେ ଇତିହାସରେ ନିଜ ନାମ ଲେଖାଇଛନ୍ତି । ଅନ୍ତିମ ରାଉଣ୍ଡରେ ଉଲ୍ଲେଖନୀୟ ପ୍ରଦର୍ଶନ ସହିତ କୁସାଲେ ୪୫୧.୪ ସ୍କୋର କରି ତୃତୀୟ ସ୍ଥାନ ଅଧିକାର କରିଛନ୍ତି । ଏହାସହ ପ୍ରଥମ ଭାରତୀୟ ଶୁଟର ଭାବେ ୫୦ ମିଟର ରାଇଫଲ ଥ୍ରୀପି ବର୍ଗରେ ଏହି ସଫଳତା ହାସଲ କରିଛନ୍ତି । ପ୍ୟାରିସ ଅଲିମ୍ପିକ୍ସରେ କୁସାଲେ ଜିତିଥିବା କାଂସ୍ୟ ପଦକ ଭାରତ ପାଇଁ ତୃତୀୟ ଏବଂ ତିନୋଟି ଯାକ ପଦକ ସୁଟିଂ ଇଭେଣ୍ଟରୁ ଆସିଛି । ସେ ପ୍ରାରମ୍ଭିକ ରାଉଣ୍ଡରେ ୫୯୦ ସ୍କୋର ସହ ସପ୍ତମ ସ୍ଥାନରେ ରହି ଅନ୍ତିମ ରାଉଣ୍ଡ ପାଇଁ ଯୋଗ୍ୟତା ହାସଲ କରିଥିଲେ ।
ସ୍ୱପ୍ନିଲ କୁସାଲେଙ୍କ ସୁଟିଂ ଆରମ୍ଭ
ସ୍ୱପ୍ନିଲ କୁସାଲେ ୧୯୯୫ ମସିହାରେ ପୁଣେରେ ଏକ କୃଷି ପୃଷ୍ଠଭୂମି ଥିବା ପରିବାରରେ ଜନ୍ମଗ୍ରହଣ କରିଥିଲେ । ୨୦୦୯ ମସିହାରେ ତାଙ୍କ ପିତା ତାଙ୍କୁ ମହାରାଷ୍ଟ୍ର ସରକାରଙ୍କ କ୍ରୀଡ଼ା ପ୍ରତି ସମର୍ପିତ ପ୍ରାଥମିକ କାର୍ଯ୍ୟକ୍ରମ କ୍ରୀଡ଼ା ପ୍ରଭୋଦିନୀରେ ଭର୍ତ୍ତି କରିଥିଲେ । ଏକ ବର୍ଷର କଠିନ ଶାରୀରିକ ପ୍ରଶିକ୍ଷଣ ପରେ ତାଙ୍କୁ ଗୋଟିଏ ଖେଳ ବାଛିବାକୁ ପଡ଼ିଥିଲା ଏବଂ ସେ ସୁଟିଂକୁ ବାଛିଥିଲେ । ୨୦୧୩ ବେଳକୁ ତାଙ୍କର ପ୍ରତିଭା ଅଧିକ ପରିଚିତ ହୋଇଥିଲା ଏବଂ ଏକ ଅଣଲାଭକାରୀ ଅନୁଷ୍ଠାନ ଲକ୍ଷ୍ୟ ସ୍ପୋର୍ଟସ୍ ତାଙ୍କୁ ସୁଟିଂ ଜାରି ରଖିବା ପାଇଁ ଆର୍ଥିକ ସହାୟତା ପ୍ରଦାନ କରିବା ଆରମ୍ଭ କରିଥିଲା । କନିଷ୍ଠ ସ୍ତରରେ କିଛି ଚମତ୍କାର ପ୍ରଦର୍ଶନ ପରେ ତାଙ୍କୁ ଭାରତୀୟ ରେଳବାଇରେ ଚାକିରି ଦିଆଯାଇଥିଲା, ଯାହା ତାଙ୍କୁ ଏହି କ୍ରୀଡ଼ାରେ ତାଙ୍କର ନିରନ୍ତର ଅଂଶଗ୍ରହଣ ପାଇଁ ପାଣ୍ଠି ଯୋଗାଇବାକୁ ଅନୁମତି ଦେଇଥିଲା । ସ୍ୱପ୍ନିଲ ଜାତୀୟ ସୁଟିଂ ଚାମ୍ପିୟନସିପ୍ ପ୍ରତିଯୋଗିତାରେ ରେଳବାଇର ପ୍ରତିନିଧିତ୍ୱ କରିଥିଲେ । ସ୍ୱପ୍ନିଲ କୁସାଲେଙ୍କ ସୁଟିଂ କ୍ୟାରିୟରରେ ମାଇଲଖୁଣ୍ଟ
ପୁଣେର ଏହି ୨୮ ବର୍ଷୀୟ ଶୁଟର ଅନେକ ଉଲ୍ଲେଖନୀୟ ସଫଳତା ସହ ତାଙ୍କ କ୍ୟାରିୟରରେ ଶୀର୍ଷସ୍ତରୀୟ ସଫଳତା ଅର୍ଜନ କରିଛନ୍ତି । ୨୦୧୫ରେ କୁଏତରେ ଅନୁଷ୍ଠିତ ଏସିଆନ୍ ସୁଟିଂ ଚାମ୍ପିୟନସିପର ଜୁନିୟର ବର୍ଗରେ ୫୦ ମିଟର ରାଇଫଲ ପ୍ରୋନ୍ ୩ରେ ସ୍ୱର୍ଣ୍ଣ ପଦକ ଜିତିଥିଲେ । ତୁଗଲକାବାଦରେ ଅନୁଷ୍ଠିତ ୫୯ତମ ଜାତୀୟ ଶୁଟିଂ ଚାମ୍ପିୟନସିପ୍ରେ ସେ ଗଗନ ନାରଙ୍ଗ ଓ ଚେନ୍ ସିଂହଙ୍କୁ ପଛରେ ପକାଇ ୫୦ ମିଟର ରାଇଫଲ ପ୍ରୋନ୍ ପ୍ରତିଯୋଗିତାରେ ବିଜୟୀ ହୋଇଥିଲେ । ତିରୁବନନ୍ତପୁରମରେ ଅନୁଷ୍ଠିତ ୬୧ତମ ଜାତୀୟ ଚାମ୍ପିୟନସିପରେ ସେ ୫୦ ମିଟର ରାଇଫଲ ୩ ସ୍ଥାନରେ ସ୍ୱର୍ଣ୍ଣ ପଦକ ଜିତି ସମାନ ପ୍ରଦର୍ଶନର ପୁନରାବୃତ୍ତି କରିଥିଲେ ।
● ଇଜିପ୍ଟର କାଇରୋଠାରେ ଚାଲିଥିବା ୨୦୨୨ ବିଶ୍ୱ ଚାମ୍ପିୟନସିପରେ ୫୦ ମିଟର ରାଇଫଲ ୩ ସ୍ଥାନରେ ରହି ପ୍ୟାରିସ ୨୦୨୪ କୋଟା ସ୍ଥାନ ହାସଲ କରିଥିଲେ
● ହାଙ୍ଗଜୋ ୨୦୨୨ ଏସୀୟ କ୍ରୀଡ଼ା (୨୦୨୩ରେ ଅନୁଷ୍ଠିତ)ରେ ପୁରୁଷ ୫୦ ମିଟର ରାଇଫଲ ଥ୍ରୀ ପୋଜିସନ୍ ଦଳରେ ସ୍ୱର୍ଣ୍ଣ ପଦକ ବିଜେତା କୁସାଲେ, ଐଶ୍ୱର୍ଯ୍ୟ ପ୍ରତାପ ସିଂହ ତୋମାର ଓ ଅଖିଳ ଶିଓରାନଙ୍କୁ ନେଇ ଗଠିତ ଭାରତୀୟ ଦଳ ୧୭୬୯ ପଏଣ୍ଟର ବିଶ୍ୱ ରେକର୍ଡ ସୃଷ୍ଟି କରି ଟାଇଟଲ ହାସଲ କରିଛନ୍ତି ।
● ଆଜରବାଇଜାନର ବାକୁଠାରେ ୨୦୨୨ ବିଶ୍ୱକପରେ ୩ ଥର ପଦକ (ଗୋଟିଏ ସ୍ୱର୍ଣ୍ଣ, ଦୁଇଟି ରୌପ୍ୟ) ।
● ନୂଆଦିଲ୍ଲୀରେ ଅନୁଷ୍ଠିତ ବିଶ୍ୱକପ୍ ୨୦୨୧ରେ ଦଳଗତ ଇଭେଣ୍ଟରେ ସ୍ୱର୍ଣ୍ଣ ପଦକ ହାସଲ କରିଛି ।
ସ୍ୱପ୍ନିଲ କୁସାଲେଙ୍କୁ ୨୦୧୬/୧୭ ବର୍ଷ ପାଇଁ ମହାରାଷ୍ଟ୍ରରେ ଶିବ ଛତ୍ରପତି ରାଜ୍ୟ କ୍ରୀଡ଼ା ପୁରସ୍କାରରେ ସମ୍ମାନିତ କରାଯାଇଥିଲା ।
ପ୍ରମୁଖ ସରକାରୀ ହସ୍ତକ୍ଷେପ
ଅଲିମ୍ପିକ୍ସରେ କୁସାଲେଙ୍କ ସଫଳତା ଟାର୍ଗେଟ୍ ଅଲିମ୍ପିକ୍ ପୋଡିୟମ ସ୍କିମ୍ (ଟପ୍ସ) ଅଧୀନରେ ପ୍ରଦାନ କରାଯାଉଥିବା ଦୃଢ଼ ସମର୍ଥନର ପ୍ରମାଣ । ବାର୍ଷିକ ପ୍ରଶିକ୍ଷଣ ଓ ପ୍ରତିଯୋଗିତା କ୍ୟାଲେଣ୍ଡର (ଏସିଟିସି) ଅଧୀନରେ ଗୁଳି ଓ ବନ୍ଧୁକ କ୍ରୟ, ବ୍ୟକ୍ତିଗତ ପ୍ରଶିକ୍ଷକଙ୍କ ସହ ଘରୋଇ ପ୍ରଶିକ୍ଷଣ ଏବଂ ୧୭,୫୮,୫୫୭ ଟଙ୍କାର ଆର୍ଥିକ ସହାୟତା, ଏବଂ ବାର୍ଷିକ ପ୍ରଶିକ୍ଷଣ ଓ ପ୍ରତିଯୋଗିତା କ୍ୟାଲେଣ୍ଡର (ଏସିଟିସି) ଅଧୀନରେ ୧,୪୨,୬୯,୬୪୭ ଟଙ୍କାର ସହାୟତା ପ୍ରଦାନ କରାଯାଇଥିଲା ।
ପୁଣେରେ ପ୍ରାରମ୍ଭିକ ଜୀବନ ଆରମ୍ଭ କରିବା ଠାରୁ ଭାରତୀୟ ସୁଟିଂରେ ଜଣେ ପ୍ରମୁଖ ବ୍ୟକ୍ତିତ୍ୱ ହେବା ପର୍ଯ୍ୟନ୍ତ ସ୍ୱପ୍ନିଲ କୁସାଲେଙ୍କ ଯାତ୍ରା ତାଙ୍କର ନିଷ୍ଠା ଓ ପ୍ରତିବଦ୍ଧତାର ପ୍ରମାଣ । ଜଣେ ରେଳ ଟିକେଟ ନିରୀକ୍ଷକ ଭାବରେ ସ୍ୱପ୍ନିଲ ସୁଟିଂ ପ୍ରତି ତାଙ୍କର ଉତ୍ସାହ ସହିତ ତାଙ୍କ ବୃତ୍ତିଗତ କର୍ତ୍ତବ୍ୟକୁ ସନ୍ତୁଳିତ କରନ୍ତି, ଯାହା ଉଭୟ ପଡ଼ିଆ ଭିତରେ ଓ ବାହାରେ ଉତ୍କର୍ଷତାର ଭାବନାକୁ ପ୍ରତିଫଳିତ କରିଥାଏ । କଠିନ ପରିଶ୍ରମ ଓ ସଂକଳ୍ପର ଉଲ୍ଲେଖନୀୟ ପ୍ରଭାବକୁ ପ୍ରତିଫଳିତ କରି ତାଙ୍କ କାହାଣୀ ଅନେକଙ୍କୁ ପ୍ରେରଣା ଦେଇଥାଏ ।