ପଦ୍ମପୁର, (ନିରୋଜ କୁମାର ପାଣୀ) : ପାଇକମାଲରେ ସମଲପୁରୀ ଦିନ ପାଇଁ ଅନ୍ତିମ ପ୍ରସ୍ତୁତି ବୈଠକ ପଦ୍ମପୁର ପୂର୍ବତନ ବିଧାୟକ ତଥା ରାଜ୍ୟ କୃଷକ ମୋର୍ଚ୍ଚା ସଭାପତି ପ୍ରଦୀପ କୁମାର ପୁରୋହିତଙ୍କ ସଭାପତିତ୍ୱରେ ଅନୁଷ୍ଠିତ ହୋଇଯାଇଛି । ଉକ୍ତ ବୈଠକରେ ସଂପାଦକ ରାଜେନ୍ଦ୍ର କୁମାର ମହାନ୍ତି ବୈଠକର ଉଦେଶ୍ୟ ଜ୍ଞାପନ କରିଥିଲେ । ଏହି ଅବସରରେ ୨୦୦ ଜଣ କବି କଳାକାରଙ୍କୁ ମାନପତ୍ର ଓ ଉପଢ଼ୌକନ ଦେଇ ସମ୍ମାନିତ କରାଯିବ । ବରଗଡର ବଳରାମ ସାହୁ, ସୁରେନ୍ଦ୍ର କୁମାର ସାହୁଙ୍କୁ ସିରଜିନା ସମଲପୁରୀ ସମ୍ମାନରେ ସମ୍ମାନିତ କରାଯିବ । ଏହା ଛଡ଼ା ଦରବେକେଳାର ଆଠୋଟି ଝିଅ ଦୁଇ ଜଣ ମୁହୁରିଆ ଜଣେ ପାଲା ଗାୟକ ଓ ଜଣେ ନିଶାନ ବାଦ୍ୟକାର ଏବଂ ରାଜ କୁମାର ସାହୁ ଓ ଉତ୍ତାଳଗଡ଼ ନାଟ୍ୟ ସଂସଦ ତାଳପଦରକୁ ମଧ୍ୟ ସମ୍ମାନିତ କରାଯିବା ବିଷୟରେ ଆଲୋଚନା ହୋଇଥିଲା । ଉକ୍ତ ଦିନ ସମସ୍ତେ ସମଲପୁରୀ ବେଶ ପୋଷାକରେ ଆସିବାକୁ ସଂପାଦକ ଅନୁରୋଧ କରିଛନ୍ତି । ଏହି ବୈଠକରେ ଗନ୍ଧମାର୍ଦ୍ଦନ ସୁରକ୍ଷା ଯୁବ ପରିଷଦ ଦୁର୍ଯ୍ୟୋଧନ ପୁଟ୍ଟା, ଧୀରେନ ମହାନ୍ତି, ସରପଞ୍ଚ ଦିଲୀପ ବେହେରା, ରାଜେନ୍ଦ୍ର ସେଠ, ପରମା ନନ୍ଦ ଭୋଇ ଓ ଲଳିତ ଜଗତ ଯୋଗଦେଇ ଥିଲେ । ଶେଷରେ ଲଳିତ ଜଗତ ଧନ୍ୟବାଦ ଅର୍ପଣ କରିଥିଲେ ।