ହ୍ୟାଣ୍ଡଲୁମ୍ ସେକ୍ଟରରୁ ଜିଏସ୍ଟି ଛାଡ କରିବାକୁ ରାଜ୍ୟସଭାରେ ଦାବି ଉପସ୍ଥାପନ କଲେ ରାଜ୍ୟସଭା ସାଂସଦ ନିରଞ୍ଜନ ବିଶି
ଖପ୍ରାଖୋଲ, (ଅଶୋକ କୁମାର ବାଗ) : ସଂସଦର ଶୀତକାଳୀନ ଅଧିବେଶନରେ ଆଜି ଶୂନ୍ୟକାଳରେ ଏକ ଗୁରୁତ୍ୱ ପୂର୍ଣ୍ଣ ପ୍ରସଙ୍ଗ ଉପରେ କେନ୍ଦ୍ର ସରକାରଙ୍କ ଦୃଷ୍ଟି ଆକର୍ଷଣ କରିଥିଲେ । ରାଜ୍ୟସଭା ସାଂସଦ ନିରଞ୍ଜନ ବିଶି ଦାବୀ ଉପସ୍ଥାପନ କରିଥିଲେ ଯେ, କେନ୍ଦ୍ର ସରକାର ହ୍ୟାଣ୍ଡଲୁମ୍ ସେକ୍ଟରରୁ ଜିଏସ୍ଟି ଛାଡ କରି ବୁଣାକାରମାନଙ୍କୁ ସୁରକ୍ଷା ଦିଅନ୍ତୁ । ରାଜ୍ୟସଭା ଅଧ୍ୟକ୍ଷଙ୍କୁ ସମ୍ବୋଧିତ କରି ଶ୍ରୀ ବିଶି ବସ୍ତ୍ର ଶିଳ୍ପ ମଧ୍ୟରେ ଜିଏସ୍ଟି ଲାଗୁ କରିବାର ପ୍ରତିକୂଳ ପ୍ରଭାବ ଉପରେ ବିଶେଷ ଭାବରେ ହ୍ୟାଣ୍ଡଲୁମ୍ ସେକ୍ଟରରେ ଏହାର ୨୦୧୭ କାର୍ଯ୍ୟକାରିତା ଉପରେ ଆଲୋକପାତ କରିଥିଲେ । ସେ ଗୁରୁତ୍ୱାରୋପ କରିଥିଲେ ଯେ ପୂର୍ବରୁ ସୂତା ଫାଇବର, ସୂତା, ଏବଂ କପଡା ଭଳି ଆବଶ୍ୟକ ଉପାଦାନ ଗୁଡିକ ବର୍ତ୍ତମାନ ପାଞ୍ଚ ପ୍ରତିଶତ ଜିଏସ୍ଟି ଅଧୀନରେ ରହିଛି । ଯେଉଁଥିରେ ହସ୍ତତନ୍ତ ସୂତା ଉପରେ ୧୨ ପ୍ରତିଶତ ଏବଂ ପ୍ରସ୍ତୁତ କପଡା ଉପରେ ୫ ପ୍ରତିଶତ ଟିକସ ଧାର୍ଯ୍ୟ କରାଯାଇଛି । ଏହି ଶୁଳ୍କ ବୁଣାକାରଙ୍କ ଉପରେ ଅତିରିକ୍ତ ଆର୍ଥିକ ବୋଝ ପକାଇଛି । ସୂତା କ୍ରୟ, ରଙ୍ଗ ରଚେଇ, ଲୁଗା ବୁଣିବା ଏବଂ ଅନ୍ୟାନ୍ୟ ସାମଗ୍ରୀ କିମ୍ବା ହ୍ୟାଣ୍ଡଲୁମ୍ କପଡା ତିଆରିରେ ଜଡିତ ପ୍ରକ୍ରିୟା ପାଇଁ ଜିଏସ୍ଟି ଦେୟ ଅନ୍ତର୍ଭୂକ୍ତ ହୋଇଛି । ଫଳସ୍ୱରୂପ ସମ୍ବଲପୁରୀ ଶାଢ଼ୀ, ସମ୍ବଲପୁରୀ ପାଟ, କପଡା, ପ୍ୟାଣ୍ଟ ସାର୍ଟ, ବଙ୍କେଇ ପାଟ ଉତ୍ପାଦର ମୂଲ୍ୟ ଉପରେ ପ୍ରଭାବ ପଡୁଛି । ଏହା ପରବର୍ତ୍ତୀ ସମୟରେ, ହ୍ୟାଣ୍ଡଲୁମ୍ ଉତ୍ପାଦଗୁଡିକର ମାର୍କେଟିଂ କାରବାର ଉପରେ ଏକ କ୍ଷତିକାରକ ପ୍ରଭାବ ପକାଉଛି ଏବଂ ପରବର୍ତ୍ତୀ ସମୟରେ ବୁଣାକାରଙ୍କ ରୋଜଗାରକୁ ପ୍ରଭାବିତ କରୁଛି । ଯାହା ତେୟାଳିଶ ଲକ୍ଷ ବୁଣାକାର ଏବଂ ବୁଣେଇ ଶ୍ରମିକଙ୍କ ଜୀବନ ଜୀବିକା ଉପରେ ପ୍ରଭାବ ପକାଉଛି ବୋଲି ସାଂସଦ ଶ୍ରୀ ବିଶି ପ୍ରକାଶ କରିଥିଲେ । ଶ୍ରୀ ବିଶି କହିଛନ୍ତି ଯେ, ଗ୍ରାମାଞ୍ଚଳର ଏହି ବୁଣାକାରମାନେ ଜିଏସ୍ଟି ହିସାବକିତାବ, ଇନକମ ଟେକ୍ସ ରିଟର୍ଣ, କରିବାରେ ଅସୁବିଧାରେ ସମ୍ମୁଖୀନ ହେଉଛନ୍ତି । ଅଧିକନ୍ତୁ, ହସ୍ତତନ୍ତ ଏବଂ ବୟନଶିଳ୍ପରେ ଓଡିଶାର ସମୃଦ୍ଧ ସାଂସ୍କୃତିକ ଐତିହ୍ୟକୁ ଉଦ୍ଜୀବିତ କରିବା ପାଇଁ ଓଡିଶାର ମୁଖ୍ୟମନ୍ତ୍ରୀ ବୁଣାକାରମାନଙ୍କୁ ଆର୍ଥିକ ସହାୟତା ପାଇଁ ବଳିଆ ଯୋଜନାରେ ୧ଲକ୍ଷ ଟଙ୍କା ପଯର୍ଞନ୍ତ ସୁଧମୁକ୍ତ ଋଣ ଦେଉଛନ୍ତି । ବୁଣାକାରମାନଙ୍କୁ ସହାୟତା କରିବାରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଉଦ୍ୟମକୁ ସାଂସଦ ଶ୍ରୀ ବିଶି ସଦନରେ ପ୍ରଶଂସା କରିଥିଲେ । ଓଡିଶା ସରକାରଙ୍କ ବଳିଆ ଯୋଜନାରେ ଉଭୟ ସହରାଞ୍ଚଳ ଏବଂ ଗ୍ରାମାଞ୍ଚଳର ବୁଣାକାରମାନେ ବ୍ୟାଙ୍କଗୁଡିକରୁ ବିନା ସୁଧରେ ୧ ଲକ୍ଷ ଟଙ୍କା ପର୍ଯ୍ୟନ୍ତ ପୁଞ୍ଜି ପାଉଛନ୍ତି । ଶ୍ରୀ ବିଶି ପ୍ରସଙ୍ଗ ଉପସ୍ଥାପନ କରିଛନ୍ତି ଯେ ହସ୍ତତନ୍ତ କ୍ଷେତ୍ରରୁ ଜିଏସ୍ଟି ଛାଡ କଲେ ବୁଣାକାର ଏବଂ ଶ୍ରମିକମାନଙ୍କ ଉପରେ ଆର୍ଥିକ ଅସୁବିଧାକୁ ହ୍ରାସ କରିବ ଏବଂ ଆମ ଦେଶର ସମୃଦ୍ଧ ସାଂସ୍କୃତିକ ପରମ୍ପରାକୁ ବଞ୍ଚାଇ ରଖିବାରେ ସହାୟକ ହେବ । ହ୍ୟାଣ୍ଡଲୁମ୍ ଉତ୍ପାଦନକୁ ଅଧିକ ପ୍ରୋତ୍ସାହିତ କରିବା ପାଇଁ ରାଜ୍ୟସଭା ସାଂସଦ ଶ୍ରୀ ବିଶି ଭାରତ ସରକାରଙ୍କୁ ହସ୍ତତନ୍ତ ଦ୍ରବ୍ୟରୁ ଜିଏସ୍ଟି ପ୍ରତ୍ୟାହାର କରିବାକୁ ଅନୁରୋଧ କରି ଏହି ବୁଣାକାର କାରିଗରମାନଙ୍କୁ ସମର୍ଥନ କରିବା ତଥା ସାଂସ୍କୃତିକ ସୁରକ୍ଷା ଦିଗରେ ଏକ ପ୍ରମୁଖ ପଦକ୍ଷେପ ବୋଲି ପ୍ରସଙ୍ଗ ଉଠାଇଛନ୍ତି ।