ଦେଓଗାଁ, (ମନୀଷ କୁମାର ସାହୁ) : ଆଜି ଅପରାହ୍ନ ୨ଟା ସମୟରେ ବଲାଙ୍ଗିର ସଦର ବ୍ଲକ ଅନ୍ତର୍ଗତ କୁଡ଼ାସିଂହା ପର୍ଶୁରାମ ଉଚ୍ଚ ବିଦ୍ୟାଳୟର ରୂପାନ୍ତରିକରଣର ମାଷ୍ଟର ପ୍ଲାନ ପାଇଁ ଏକ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି । ତୃତୀୟ ପର୍ଯ୍ୟାୟରେ ସାମିଲ ହୋଇଥିବା ୫- ଟି ସ୍କୁଲ ମଧ୍ୟରେ କୁଡ଼ାସିଂହା ହାଇସ୍କୁଲକୁ ସାମିଲ୍ କରାଯାଇଥିବାରୁ ଅଞ୍ଚଳର ଶିକ୍ଷାପ୍ରେମୀ ମହଲରେ ଉତ୍ସାହ ପରିଲକ୍ଷିତ ହେଇଛି । ବୈଠକରେ ବିଦ୍ୟାଳୟର ପ୍ରତିଷ୍ଠାତା ସଭ୍ୟମାନଙ୍କ ସହ ପୁରାତନ ଛାତ୍ର ଗୋଷ୍ଠୀ, ଆଲୁମନି ସଦସ୍ୟ, ବିଦ୍ୟାଳୟ ପରିଚାଳନା କମିଟି ସଦସ୍ୟ, ଶିକ୍ଷକ, ଶିକ୍ଷୟତ୍ରୀ ପ୍ରମୁଖ ଯୋଗ ଦେଇଥିଲେ । ସମସ୍ତଙ୍କୁ ନେଇ ଏକ ତଦାରଖ କମିଟି ଗଠନ କରାଯାଇଛି । ସମସ୍ତେ ବିଦ୍ୟାଳୟ ପରିସରକୁ ପରିଦର୍ଶନ କରି ଯୋଜନା ପାଇଁ ମତାମତ ଦେଇଥିଲେ । ପ୍ରଧାନ ଶିକ୍ଷକ ଅଶ୍ୱିନୀ ମିଶ୍ର ବିଦ୍ୟାଳୟକୁ ଏକ ଆଦର୍ଶ ବିଦ୍ୟାଳୟ ରୂପେ ଗଢ଼ି ତୋଳିବା ପାଇଁ ସମସ୍ତଙ୍କ ସହଯୋଗ ବୋଲି କହିଥିଲେ ।