ଲାଞ୍ଜିଗଡ଼ : ଭାଦ୍ରବ ମାସ ଶୁକ୍ଲପକ୍ଷ ପଞ୍ଚମୀ ତିଥିରେ ସମଗ୍ର ଓଡ଼ିଶାରେ କୃଷିଭିତ୍ତିକ ଗଣପର୍ବ ନୂଆଖାଇ ପାଳିତ ହୋଇଯାଇଛି । ନୂଆଁଖାଇକୁ ନେଇ ଗାଁଗଣ୍ଡା, ସହର ବଜାର ସବୁଠି ଗହଗହ ମହମହ ହୋଇଉଠିଥିବା ବେଳେ ଲୋକେ ନିଜ ନିଜର ଇଷ୍ଟ ଦେବାଦେବୀ, ପିତୃପିତାଙ୍କୁ ବର୍ଷକର ନୂଆ ଫସଲ ପ୍ରଥମେ ଅର୍ପଣ କରି ପ୍ରସାଦ ଗ୍ରହଣ କରିଛନ୍ତି । କଳାହାଣ୍ଡି ଜିଲ୍ଲାର ଲାଞ୍ଜିଗଡ ବ୍ଲକ ଅଞ୍ଚଳରେ ନୂଆଁଖାଇ ପର୍ବ ଧୂମ୍ଧାମ୍ରେ ପାଳିତ ହୋଇଥିବା ବେଳେ ସନ୍ଧ୍ୟାରେ ଅନୁଷ୍ଠିତ ହୋଇଛି ନୂଆଖାଇ ଜୁହାରଭେଟ୍ କାର୍ଯ୍ୟକ୍ରମ । ନୂଆଖାଇ ପାଇଁ ସମଗ୍ର ଲାଞ୍ଜିଗଡ ବ୍ଲକ ଅଞ୍ଚଳ ଚଳଚଞ୍ଚଳ ହୋଇଥିବା ବେଳେ କୁରେଇପତ୍ରରେ ନୂଆଁଖାଇ ସାରିବା ପରେ ପରସ୍ପର ଜୁହାରଭେଟ୍ ହୋଇ ମଙ୍ଗଳ କାମନା କରିଛନ୍ତି । ଏହି କ୍ରମରେ ବ୍ଲକର ଲାଞ୍ଜିଗଡ ଓ ବିଶ୍ୱନାଥପୁରକୁ ଛାଡିଦେଲେ ଅନ୍ୟାନ୍ୟ ଅଞ୍ଚଳରେ ନୂଆଁଖାଇକୁ ନେଇ ବେଶ୍ ଉତ୍ସାହ ଦେଖିବାକୁ ମିଳିଛି । ତେବେ ବ୍ଲକର କଦମ୍ବଗୁଡା ଗ୍ରାମ ପଞ୍ଚାୟତର କାଠସମା ଗାଁରେ ନିଆରା ଢଙ୍ଗରେ ପାଳିତ ହୋଇଛି ନୂଆଁଖାଇ ପର୍ବ । ଗାଁରେ ଚାରିଗୋଟି ପଡା ରହିଥିବା ବେଳେ ବିଭିନ୍ନ ଜାତିର ଲୋକଙ୍କୁ ନେଇ ପ୍ରାୟ ଦୁଇଶହ ପରିବାର ଏକାଠି ବସି ନୂଆ ଖାଇବା ନୂଆଖାଇର ସାର୍ଥକତା ପ୍ରତିପାଦିତ କରିଛି । ଗାଁଟା ଯାକର ଲୋକେ ସମବେତ ହୋଇ ନୂଆ ଖାଇବା ଏକ ରେକର୍ଡ ସୃଷ୍ଟି କରିଛି । ସେହିପରି ପର୍ବ ଶେଷ ହେବା ପରେ ଗାଁ ଗାଁରେ ନୂଆର୍ଖାଇ ଭେଟ୍ଘାଟ୍ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି ।