ବଲାଙ୍ଗିର, (କେପିଏନ୍ଏସ୍) : ଭାରତ ଫାଇନାନ୍ସ କର୍ମଚାରୀଙ୍କଠାରୁ ଦୁର୍ବୃତ୍ତମାନେ ୮୦ ହଜାର ଟଙ୍କା ସହ ମୋବାଇଲ ତଥା ଟାବ୍ଲେଟ ଓ ବାୟୋମେଟ୍ରିକ ସ୍କେନର ଲୁଟ୍ କରି ନେଇଛନ୍ତି । ଏ ସର୍ମ୍ପକରେ ବଲାଙ୍ଗିର ଜିଲ୍ଲା ପୁଇଁନ୍ତଲା ଥାନାରେ ଅଭିଯୋଗ ହୋଇଥିବା ସୂଚନା ମିଳିଛି । ଥାନାରେ ହୋଇଥିବା ଅଭିଯୋଗ ଅନୁସାରେ ଭାରତ ଫାଇନାନ୍ସର କର୍ମଚାରୀ ରାଜୀବ ଲୋଚନ ବିଶି(୨୨) ତାଙ୍କ ସହକର୍ମୀ ଅଙ୍କିତ ସାହୁ(୨୦)ଙ୍କ ସହ ମିଶି ପୁଇଁନ୍ତଲା ଥାନା ଅନ୍ତର୍ଗତ ବହଲପଦର, ଅଏଁଲାସାରି ଓ ମଙ୍ଗଲାମୁଣ୍ଡା ଗାଁରୁ କମ୍ପାନିର ଟଙ୍କା କଲେକ୍ସନ ସାରି ବାଇକରେ ଆସୁଥିବା ବେଳେ ମଙ୍ଗଲାମୁଣ୍ଡା ଗାଁ ମୁଣ୍ଡରେ ରହିଥିବା ଏକ ବଙ୍କା ରାସ୍ତା ପାଖରେ କେତେକ ଅଜଣା ଦୁର୍ବୃତ୍ତ ଅଚାନକ ଆସି ୨ ଜଣଙ୍କୁ ଅଟକାଇ ଆକ୍ରମଣ କରିଥିଲେ । ଏହାପରେ ବାଇକ ଡିକିରେ ରହିଥିବା ୮୦ ହଜାର କଲେକ୍ସନ ଟଙ୍କା, କମ୍ପାନୀ ପକ୍ଷରୁ ଦିଆଯାଇଥିବା ଟାବ୍ଲେଟ, ବାୟୋମେଟ୍ରିକ ସ୍କେନର ଓ ଦୁହିଁଙ୍କ ମୋବାଇଲ ଫୋନ ସହ ଅଙ୍କିତ ସାହୁଙ୍କ ପର୍ସରେ ଥିବା ୧୨ ଶହ ଟଙ୍କା ମଧ୍ୟ ନେଇ ଫେରାର୍ ହୋଇଯାଇଥିଲେ । ଏ ସମ୍ପର୍କରେ ଲୁଟ୍ର ଶିକାର ହୋଇଥିବା ରାଜୀବ ଲୋଚନ ବିଶି ବଲାଙ୍ଗିର ଜିଲ୍ଲା ପୁଇଁନ୍ତଲା ଥାନାରେ ଅଭିଯୋଗ କରିଥିବା ସୂଚନା ମିଳିଛି ।