ଭୁବନେଶ୍ୱର : ପରୀକ୍ଷାରେ ଉତ୍ତୀର୍ଣ୍ଣ ହୋଇ ପାଇଥାନ୍ତେ ହୋମଗାର୍ଡ ଚାକିରି । ହେଲେ ଅଧୁରା ରହିଗଲା ସ୍ୱପ୍ନ । ଫିଜିକାଲ୍ ଟେଷ୍ଟରେ ଦୌଡିବା ସମୟରେ ଅସୁସ୍ଥ ହୋଇ ଚାଲିଗଲା ପରୀକ୍ଷାର୍ଥୀଙ୍କ ଜୀବନ । ମୃତକ ହେଲେ ବୁଡିଦୋ ଗ୍ରାମର ପ୍ରଦୀପ କୁମାର ଦେହୁରୀଙ୍କ ପୁଅ ସାହେବ ଦେହୁରୀ (୧୯) । ଖରାରେ ଦୌଡ଼ିବା ଯୋଗୁଁ ତାଙ୍କର ମୃତ୍ୟୁ ହୋଇଥିବା ନେଇ ପରିବାର ପକ୍ଷରୁ ଅଭିଯୋଗ ହୋଇଛି । ଦେବଗଡ ଜିଲ୍ଲାରେ ହୋମଗାର୍ଡ ପରୀକ୍ଷା ବେଳେ ଏଭଳି ଘଟଣା ଘଟିଛି । ସୂଚନା ଅନୁସାରେ ଦେବଗଡ ଜିଲ୍ଲାରେ ୬୦ ଟି ହୋମଗାର୍ଡ ପଦବୀ ପୂରଣ ପାଇଁ ଚଳିତ ମାସ ୨୨ ତାରିଖରୁ ଆରମ୍ଭ ହୋଇଥିଲା ଫିଜିକାଲ୍ ଟେଷ୍ଟ । ପରୀକ୍ଷାରେ ଜଣକ ପରେ ଜଣେ ପରୀକ୍ଷାର୍ଥୀ ଫିଜିକାଲ୍ ଟେଷ୍ଟ ଦେଇଥିଲେ । ଏହି ଫିଜିକାଲ୍ ଟେଷ୍ଟରେ ପ୍ରଦୀପ କୁମାର ଦେହୁରୀ ଦୌଡ଼ୁଥିବା ବେଳେ ହଠାତ୍ ଚେତାଶୂନ୍ୟ ହୋଇପଡ଼ିଥିଲେ । ଏହା ଦେଖି ସେଠାରେ ଉପସ୍ଥିତ ପୋଲିସ କର୍ମଚାରୀ ତାଙ୍କୁ ଅଚେତ ଅବସ୍ଥାରେ ଆଣି ଦେବଗଡ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ । ଗୁରୁବାର ସକାଳୁ ଚିକିତ୍ସାଧିନ ଅବସ୍ଥାରେ ତାଙ୍କର ମୃତ୍ୟୁ ହୋଇଛି । ତେବେ ଏଖରାରେ ଦୌଡ଼ିବା ଯୋଗୁଁ ତାଙ୍କର ମୃତ୍ୟୁ ହୋଇଥିବା ପରିବାର ପକ୍ଷରୁ ଅଭିଯୋଗ କରାଯାଇଛି ।