ବାରିପଦା, (ଦେବସ୍ମିତ ଚୌଧୁରୀ) : ଚଳିତ ବର୍ଷ ଜିଲ୍ଲା ପ୍ରଶାସନ ତରଫରୁ ପ୍ରସିଦ୍ଧ ଚୈତ୍ର ପର୍ବକୁ ଏକ ଅଭିନଵ ଢଙ୍ଗରେ ଆୟୋଜନ କରିବା ପାଇଁ ସ୍ଥିର କରାଯାଇଛି । ଏହି ପ୍ରସିଦ୍ଧ ପାରମ୍ପରିକ ଉତ୍ସବର ମୌଳିକତାକୁ ଅକ୍ଷୁର୍ଣ୍ଣ ରଖି ଦର୍ଶକ ମାନଙ୍କ ପାଇଁ ଏହାକୁ ଅଧିକ ଆକର୍ଷଣୀୟ କରିବା ତଥା ଜାତୀୟ ସ୍ତରରେ ଏହାକୁ ଜନଆଦୃତ କରିବା ପାଇଁ ଉକ୍ତ ଉତ୍ସବରେ କିଛି ଅନ୍ୟାନ୍ୟ କାର୍ଯ୍ୟକ୍ରମ ଯୋଡ଼ାଯାଇଛି । ଏବର୍ଷ ଚୈତ୍ର ପର୍ବ ବାରିପଦା ସ୍ଥିତ ଛଉ ପଡିଆ ଠାରେ ଏପ୍ରିଲ ୧୧ ତାରିଖରୁ ଆରମ୍ଭ ହୋଇ ଏପ୍ରିଲ ୧୫ ତାରିଖ ପର୍ଯ୍ୟନ୍ତ ଆୟୋଜିତ ହେବ । ଚୈତ୍ର ପର୍ବ ସହିତ ସମାନ୍ତରାଳ ଭାବେ ପଲ୍ଲିଶ୍ରୀ ମେଳା ଆୟୋଜିତ ହେବ । ଏହି ପଲ୍ଲୀଶ୍ରୀ ମେଳାରେ ପାଖାପାଖି ୧୭୫ଟି ଷ୍ଟଲ ବସିବ ଯେଉଁଥିରେ ସ୍ଥାନୀୟ ଅଂଚଳ, ରାଜ୍ୟର ଅନ୍ୟାନ୍ୟ ଜିଲ୍ଲାର ଓ ରାଜ୍ୟ ବାହାରର ବିଭିନ୍ନ ପ୍ରକାର ସାମଗ୍ରୀ ବିକ୍ରୟ ହେବ । ଏହି ଉତ୍ସବ ଉପଲକ୍ଷେ ଏପ୍ରିଲ ୧୧ ତାରିଖ ପ୍ରଥମ ଦିନ ଅପରାହ୍ନରେ ଏକ କାର୍ଣ୍ଣିଭାଲ ଶୋଭାଯାତ୍ରା ସହର ପରିକ୍ରମା କରିବ । ବାଣ, ରୋଶଣୀ, ରଙ୍ଗୋଲି, ଡିଜେ ସାଉଣ୍ଡ ସହିତ ମୟୁରଭଞ୍ଜ ତଥା ଓଡିଶାର ଲୋକକଳା ସହିତ ଜଡିତ କଳସ ଯାତ୍ରା, ଘୋଡାନାଚ ଝୁମର ନାଚ, ଆଦିବାସୀ ନୃତ୍ୟ ଇତ୍ୟାଦି ପ୍ରଦର୍ଶନ ମାଧ୍ୟମରେ ଉକ୍ତ ଶୋଭାଯାତ୍ରା ମାଆ ଅମ୍ବିକା ମନ୍ଦିରରୁ ବାହାରି ସହର ପରିକ୍ରମା କରି ଛଉ ପଡିଆ ଠାରେ ପହଂଚିବ । ଏହାପରେ ଏହି ଉତ୍ସବର ଉଦଘାଟନୀ ଉତ୍ସବ ଅନୁଷ୍ଠିତ ହେବା ପରେ ଉତ୍ତର ସାହି ଓ ଦକ୍ଷିଣ ସାହି ଛଉ ଦଳ ଦ୍ୱାରା ମିଳିତ ଭାବେ ଛଉ ନୃତ୍ୟ ପରିବେଷଣ ହେବ । ଏହାପରେ ପଦ୍ମଶ୍ରୀ ଡ଼. ଅରୁଣା ମହାନ୍ତି ଓ ତାଙ୍କ ସାଥି କଳାକାରଙ୍କ ଦ୍ୱାରା ଓଡିଶୀ ନୃତ୍ୟ ପରିବେଷଣ ପରେ ଜିଲ୍ଳାର ଗ୍ରାମାଞ୍ଚଳ ଛଉ ନୃତ୍ୟ ଦଳ ଦ୍ୱାରା ଛଉ ନୃତ୍ୟ ପରିବେଷଣ ହେବ । ସେହିପରି ଦ୍ଵିତୀୟ ଦିନ ତା ୧୨-୦୪-୨୦୨୫ ରିଖ ସନ୍ଧ୍ୟାରେ ଉତ୍ତର ସାହି ଓ ଦକ୍ଷିଣ ସାହି ଛଉ ନୃତ୍ୟ ଦଳ ଦ୍ୱାରା ଛଉ ନୃତ୍ୟ ପରିବେଷଣ ହେବା ସହିତ ସମ୍ବଲପୁର ଜିଲ୍ଲାର ଦୁଲଦୁଲି ନାଚ ଓ କଳାହାଣ୍ଡି ଜିଲ୍ଲାର ବଜଶାଲ ନୃତ୍ୟ ପରିବେଷଣ ହେବ । ସେହିପରି ତୃତୀୟ ଦିନ ତା ୧୩-୦୪-୨୦୨୫ ରିଖ ସନ୍ଧ୍ୟାରେ ଉତ୍ତର ସାହି ଓ ଦକ୍ଷୀଣ ସାହି ଛଉ ନୃତ୍ୟ ଦଳ, ପୁରୁଳିଆ ଓ ସଢ଼େଇକଳା ଛଉ ନୃତ୍ୟ ଦଳ ଦ୍ୱାରା ଛଉ ନୃତ୍ୟ ପରିବେଷଣ ହେବ । ଚତୁର୍ଥ ଦିନ ସନ୍ଧ୍ୟାରେ ତା ୧୪-୦୪-୨୦୨୫ ରିଖ ଛାଉଣୀ ଅନୁଷ୍ଠାନ କଳାକାରଙ୍କ ଦ୍ୱାରା ଛଉ ନୃତ୍ୟ ପରିବେଷଣ ହେବା ସହିତ ମଣିପୁର ରାଜ୍ୟର ଥାଙ୍ଗଟା ନୃତ୍ୟ, ଆସାମ ରାଜ୍ୟର କଳାକାରଙ୍କ ଦ୍ୱାରା ବିହୁ ନୃତ୍ୟ, ମହାରାଷ୍ଟ୍ରର କଳାକାରଙ୍କ ଦ୍ୱାରା ମର୍ଦାନି ଖେଲ ନୃତ୍ୟ, ଏବଂ କେରଳର କଳାକାରଙ୍କ ଦ୍ୱାରା କଲାରିପାୟତୁ ନୃତ୍ୟ ପରିବେଷଣ ହେବ । ଏଥି ସହିତ ଓଡିଶାର ସାଂସ୍କୃତିକ ପରମ୍ପରା ଏବଂ ହସ୍ତଶିଳ୍ପକୁ ଜନ ଆଦୃତ କରିବା ପାଇଁ ମନରଞ୍ଜନ ଧର୍ମୀ କାର୍ଯ୍ୟକ୍ରମ ଅନୁଷ୍ଠିତ ହେବ । ଏତଦ ବ୍ୟତୀତ ଓଡ଼ିଆ କଣ୍ଠ ଶିଳ୍ପୀ ହୁମାନ ସାଗରଙ୍କ ଦ୍ୱାରା ସଂଗୀତ କାର୍ଯ୍ୟକ୍ରମ ପରିବେଷଣ କରାଯିବ । ସେହିପରି ଅନ୍ତିମ ଦିନ ତା ୧୫-୦୪-୨୦୨୫ ରିଖ ସନ୍ଧ୍ୟାରେ ଛାଉଣୀ କଳାକାରଙ୍କ ଦ୍ୱାରା ନୃତ୍ୟ ପରିବେଷଣ, ଓଡ଼ିଆ ସଂସ୍କୃତି ଓ ହସ୍ତତନ୍ତ ଓ ହସ୍ତଶିଳ୍ପକୁ ନେଇ କାର୍ଯ୍ୟକ୍ରମ ପ୍ରଦର୍ଶିତ ହେବ । ଉକ୍ତ ଦିନ ମଧ୍ୟ ମଣିପୁରର ଥାଙ୍ଗଟା ଆସାମର ବିହୁ, ମହାରାଷ୍ଟ୍ରର ମାର୍ଦାନୀ ଖେଲ ଓ କେରଳର କଲାରିପାୟତ୍ତୂ ନୃତ୍ୟ ପରିବେଷଣ ହେବ । ଶେଷ ରଜନୀରେ ଓଡ଼ିଆ ଲୋକପ୍ରିୟ କଣ୍ଠଶୀଳ୍ପୀ ଋତୁରାଜ ମହାନ୍ତିଙ୍କ ଦ୍ୱାରା ସଂଗୀତ ପରିବେଷଣ ହେବ । ଏତଦ ବ୍ୟତୀତ ଏହି କାର୍ଯ୍ୟକ୍ରମକୁ ଅଧିକ ଆକର୍ଷିତ କରିବା ପାଇଁ ଗେମ ଜନ ରହିବ ଯେଉଁଥିରେ ମୋଟକା ଫୋଡ, ଟାର୍ଗେଟ ଟସ, କମ୍ବିନେସନ ଟଚ ଇତ୍ୟାଦି ଖେଳ ରହିବ । ଦର୍ଶକ ମାନେ ଚାହିଁଲେ ନିର୍ଦ୍ଧାରିତ ଏଣ୍ଟ୍ରିଫି ଜରିଆରେ ଖେଳି ପାରିବେ । ଏଥି ସହିତ ସମୟ ବ୍ୟବଧାନରେ ମଞ୍ଚରୁ ଛଉ ଉପରେ ଆଧାରିତ କିଛି କୁଇଜ କରାଯିବ ଏବଂ ସଠିକ ଉତ୍ତର ଦାତାକୁ ପୁରସ୍କୃତ କରାଯିବ । ସେହିପରି ମୟୁରଭଞ୍ଜ ଇତିହାସ ଓ ଛଉ ଉପରେ ପର୍ଯ୍ୟବେସିତ ଲେଜର ଶୋ ମଧ୍ୟ ଲୋକମାନେ ଉପଭୋଗ କରିପାରିବେ । ଏତଦ ବ୍ୟତୀତ ଛଉ ଉପରେ ଆଧାରିତ ବାଲୁକା ଶିଳ୍ପ ପଦର୍ଶିତ ହେବ ପଲ୍ଲୀଶ୍ରୀ ମେଳାରେ ଦର୍ଶକ ତଥା ଜନସାଧାରଣଙ୍କ ପାଇଁ ଫୁଡ କୋଟ ବ୍ୟବସ୍ଥା କରାଯିବ ଯେଉଁଥିରେ ଓଡିଶାର ପାରମ୍ପରିକ ପ୍ରସିଦ୍ଧ ସ୍ୱାଦିଷ୍ଟ ଖାଦ୍ୟ ସହିତ ବାହାର ରାଜ୍ୟର ସ୍ୱାଦିଷ୍ଟ ଖାଦ୍ୟ ଲୋକମାନଙ୍କ ପାଇଁ ସୁଲଭ ମୂଲ୍ୟରେ ଉପଲବ୍ଧ ହେବ । ଏଥିରେ ବିହାରର ଚମ୍ପରନ ମଟର୍ନ, ଝାରଖଣ୍ଡର ଲିଟି ଚୋଖା, ଆଳୁ ଜିଲାପି, ରାଜସ୍ଥାନର ଡାଲ ବାଟି, ଛୋଲେ ଭଟରେ, ଯାଜପୁରର ଫଳ ରସ, ଫଳ ଚାଟ, ବିରି ବଡା, ଆଳୁ କଷା, ଖୋର୍ଦ୍ଧାର ମଥୁରା କେକ, କଟଲେଟ,କଟକର ଦହିବରା, ଆଳୁଦମ, ନିମାପଡାର ଛେନା ଝିଲ୍ଲୀ, କେନ୍ଦ୍ରାପଡ଼ା ରସାବଳି, ରସଗୋଲା ସହିତ ବାରିପଦାର ମୁଢି ମାଂସ, ପୋଡା ମଟର୍ନ, ଚୁନା ରୁଟି ମାଂସ, ବିରିଆନି, ଠୁଙ୍କା ପୁରି ଇତ୍ୟାଦି ଉପଲବ୍ଧ ହେବ ।