ଆଗାମୀ ୬ ବର୍ଷରେ ଚାଇନା ପାଖରେ ଥିବ ୭୦୦ ପରମାଣୁ ବୋମା : ପେଣ୍ଟାଗନ୍ ରିପୋର୍ଟ ସାରା ବିଶ୍ୱକୁ ତାଜୁବ୍ କରିଛି
ୱାଶିଂଟନ୍ : ଆମେରିକାର ପ୍ରତିରକ୍ଷା ବିଭାଗ ଦ୍ୱାରା ବୁଧବାର ପ୍ରକାଶିତ ଏକ ରିପୋର୍ଟରେ କୁହାଯାଇଛି ଯେ, ଚୀନ୍ ତାର ଆଣବିକ ଶକ୍ତିକୁ ଏକ ବର୍ଷ ପୂର୍ବରୁ ଆମେରିକା ତୁଳନାରେ ଦ୍ରୁତ ଗତିରେ ବୃଦ୍ଧି କରୁଛି । ଏହା ସହିତ ରିପୋର୍ଟରେ କୁହାଯାଇଛି ଯେ, ଶତାବ୍ଦୀର ମଧ୍ୟଭାଗରେ ଚୀନ୍ ଆମେରିକୀୟ ବିଶ୍ୱ ଶକ୍ତି ପାଖକୁ ପହଂଚିବ କିଂବା ଆଗକୁ ବି ବଢ଼ି ଯାଇପାରେ ।
ରିପୋର୍ଟ ଅନୁଯାୟୀ, ଆଗାମୀ ଛଅ ବର୍ଷ ମଧ୍ୟରେ ଚାଇନାର ଆଣବିକ ଅସ୍ତ୍ର ସଂଖ୍ୟା ୭୦୦କୁ ବୃଦ୍ଧି ପାଇପାରେ ଏବଂ ୨୦୩୦ ସୁଦ୍ଧା ଏହି ସଂଖ୍ୟା ୧୦୦୦ରୁ ଅଧିକ ହୋଇପାରେ । ତେବେ ଚାଇନାରେ ବର୍ତ୍ତମାନ କେତେ ଅସ୍ତ୍ରଶସ୍ତ୍ର ଅଛି, ତାହା ରିପୋର୍ଟରେ କୁହାଯାଇନାହିଁ । କିନ୍ତୁ ଏକ ବର୍ଷ ପୂର୍ବେ ଆମେରିକାର ପ୍ରତିରକ୍ଷା ବିଭାଗ ମୁଖ୍ୟାଳୟର ପେଣ୍ଟାଗନ୍ କହିଛି ଯେ, ଏହାର ପରମାଣୁ ଅସ୍ତ୍ର ସଂଖ୍ୟା ୨୦୦ରୁ କମ୍ ଏବଂ ଏହି ଦଶନ୍ଧି ଶେଷ ସୁଦ୍ଧା ଏହା ଦ୍ୱିଗୁଣିତ ହେବ ବୋଲି ଆକଳନ କରାଯାଇଥିଲା ।
ଯୁକ୍ତରାଷ୍ଟ୍ରରେ ବର୍ତ୍ତମାନ ୩,୭୫୦ ପରମାଣୁ ଯୁଦ୍ଧ ଅସ୍ତ୍ର ଅଛି ଏବଂ ଏହାକୁ ବୃଦ୍ଧି କରିବାର କୌଣସି ଯୋଜନା ନାହିଁ । ୨୦୦୩ ସୁଦ୍ଧା, ଆମେରିକାର ଆଣବିକ ଅସ୍ତ୍ରଶସ୍ତ୍ରର ସଂଖ୍ୟା ପ୍ରାୟ ୧୦,୦୦୦ ଥିଲା । ବାଇଡେନ ପ୍ରଶାସନ ଆଣବିକ ନୀତିର ବିସ୍ତୃତ ସମୀକ୍ଷା କରୁଛନ୍ତି ।