- ସଂସ୍କାରୀ ହେଲେ ସଂସ୍କୃତିର ଉନ୍ନତି ହୋଇପାରିବ
ରାଉରକେଲା, (ସସ୍ମିତା ପ୍ରଧାନ) : ସଂସ୍କାରୀ ହେଲେ ସଂସ୍କୃତିର ଉନ୍ନତି ହୋଇପାରିବ । ନାଟକର ବାର୍ତ୍ତା ମାନବଧର୍ମୀ ହେବା ଆବଶ୍ୟକ ବୋଲି ଅତିଥିମାନେ ଏକତ୍ରର ସ୍ୱାଗତ ସମ୍ବର୍ଦ୍ଧନା କାର୍ଯ୍ୟକ୍ରମରେ ମତ ରଖିଛନ୍ତି । ରାଉରକେଲାର ୨୪ ଗୋଟି ନାଟ୍ୟାନୁଷ୍ଠାନକୁ ନେଇ ଗଠିତ ଏକତ୍ର ତରଫରୁ ଆଦର୍ଶ ସାହିତ୍ୟ ଘରଠାରେ ଅନୁଷ୍ଠିତ ହୋଇଥିବା ସ୍ବାଗତ ସମ୍ବର୍ଦ୍ଧନା ଓ ବଂଧୁମିଳନ ଉତ୍ସବ ରେ ଉପରୋକ୍ତ ମନ୍ତବ୍ୟ ପ୍ରକାଶ ପାଇଥିଲା । ଏକତ୍ରର ସଭାପତି ରାଜୀବ ପାଣିଙ୍କ ସଭାପତିତ୍ବ ଓ ସଂଯୋଜନା ତଥା ସଂପାଦକ ସୁଦେଶ ନାୟକଙ୍କ ଆବାହକତ୍ବରେ ଆୟୋଜିତ ଏହି କାର୍ଯ୍ୟକ୍ରମରେ ଓଡିଆ ଭାଷା ସାହିତ୍ୟ ପ୍ରତିଷ୍ଠାନର ନିର୍ଦ୍ଦେଶକ ତଥା ସ୍ବତନ୍ତ୍ର ଶାସନ ସଚିବ ରଂଜନ କୁମାର ଦାଶ, ଓଡିଶା ସଂଗୀତ ନାଟକ ଏକାଡେମୀର ସଚିବ ପ୍ରବୋଧ କୁମାର ରଥ, ଓଡିଶା ନାଟ୍ୟସଂଘର ସଂପାଦକ ଶୁଭକାନ୍ତ ପାଢୀ ଓ ଓଡିଶା ସଂଗୀତ ନାଟକ ଏକାଡେମୀର ସଭାପତି ପଦ୍ମଶ୍ରୀ ଡଃ ଅରୁଣା ମହାନ୍ତି ଅତିଥି ଭାବେ ଯୋଗଦେଇ ଥିଲେ । ଏହି ଅବସରରେ ଆଦର୍ଶ ପାଠାଗାର, ପ୍ରଗତି ଉତ୍କଳ ସଂଘ, ବାସନ୍ତୀ ପାଠାଗାର, କଳିଙ୍ଗ କଳା ପରିଷଦ, ଗୋପବନ୍ଧୁ ପାଠାଗାର, ନାୟିକା ରାଉରକେଲା ତରଫରୁ ଅତିଥିମାନଙ୍କୁ ସମ୍ବର୍ଦ୍ଧନା ଦିଆଯାଇଥିଲା । ସମ୍ବର୍ଦ୍ଧନା ପ୍ରତ୍ୟୁତ୍ତରରେ ଶ୍ରୀ ଦାଶ ତାଙ୍କ ବକ୍ତବ୍ୟରେ କହିଲେ ଯେ ଇସ୍ପାତ ସହର ହେଉଛି ଇପ୍ସିତ ସହର । ଭଲ ନାଟକ ତିଆରି କଲେ ହେବ ନାହିଁ ତାକୁ ବିଜ୍ଞପିତ କରିବାର ଆବଶ୍ୟକତା ଓ ସଂଶୋଧନ ପ୍ରକ୍ରିୟା ନିଜ ପାଖରୁ ଆରମ୍ଭ କରିବା ଉପରେ ଗୁରୁତ୍ବାରୋପ କରିଥିଲେ । ଅତିଥି ଶ୍ରୀ ରଥ କହିଲେ ଯେ, ନାଟକ ସଂସ୍କୃତି କ୍ଷେତ୍ରରେ ସର୍ବଭାରତୀୟ ସ୍ତରରେ ଓଡିଶା, ମହାରାଷ୍ଟ୍ର ଓ କର୍ଣ୍ଣାଟକର ନାମ ସର୍ବାଗ୍ରେ ରହିଛି । ଏହା ସହ ସମନ୍ବୟ ଓ ନାଟକର ଗୁଣାତ୍ମକମାନକୁ ବଢାଇବାକୁ ଗୁରୁତ୍ବାରୋପ କରିଥିବା ବେଳେ ନାଟକର ବାର୍ତ୍ତା ସବୁବେଳେ ମାନବଧର୍ମୀ ହେବା ଆବଶ୍ୟକ ବୋଲି କହିଥିଲେ । ପଦ୍ମଶ୍ରୀ ଡଃ ମହାନ୍ତି ଏକାଡ଼େମୀର ନୃତ୍ୟ ନାଟକ କ୍ଷେତ୍ରରେ ପ୍ରତିବଦ୍ଧତା ଓ କଳାକୁ ତପସ୍ୟା ଓ ସାଧନା ମାଧ୍ୟମରେ ଆଗେଇ ନେବା ପାଇଁ ଆହ୍ବାନ ଦେଇଥିଲେ । ଶ୍ରୀ ପାଢୀ ତାଙ୍କ ବକ୍ତବ୍ୟରେ କହିଲେ ଯେ, ଏକତ୍ର ଅନ୍ୟ ସହରର ଅନୁଷ୍ଠାନଙ୍କ ପାଇଁ ଉଦାହରଣ ସହ ଓଡିଶା ନାଟ୍ୟ ସଂଘର କାର୍ଯ୍ୟକ୍ରମ ସଂପର୍କରେ ମତ ରଖିଥିଲେ । ଏହି ଅବସରରେ ଏକତ୍ରର ଉପଦେଷ୍ଟା ଡା କୃପାସିନ୍ଧୁ ନାୟକ, ନଳିନୀ ନିହାର ନାୟକ, ସୁଦେଶ ନାୟକ, ସୁକାନ୍ତ ଚନ୍ଦ୍ର ଖୁଣ୍ଟିଆ ପ୍ରମୁଖ ବକ୍ତବ୍ୟ ରଖିଥିଲେ । କାର୍ଯ୍ୟକ୍ରମ ପ୍ରାରମ୍ଭରେ ଅଜୟ ପାଣି ମନ୍ତ୍ରୋଚାରଣ ଓ କ୍ଷଣପ୍ରଭା ଷଡଙ୍ଗୀ ସ୍ବାଗତ ସଂଗୀତ ଓ ଶେଷରେ ଆଲୋକ ରଂଜନ ବୋଷ ଧନ୍ୟବାଦ ଅର୍ପଣ କରିଥିଲେ । ଏହି କାର୍ଯ୍ୟକ୍ରମରେ ସହରର ୨୪ଟି ନାଟ୍ୟାନୁଷ୍ଠାନର କର୍ମକର୍ତ୍ତାଙ୍କ ସହ ବହୁ ବୁଦ୍ଧିଜୀବୀ ଓ ନାଟ୍ୟପ୍ରେମୀ ମାନେ ଯୋଗ ଦେଇଥିଲେ ।