ରାଉରକେଲା, (ସସ୍ମିତା ପ୍ରଧାନ) : ଓଡ଼ିଆ କଲ୍ଚରାଲ ଆଣ୍ଡ ୱଲଫେୟାର ଆସୋସିଏସନର ବାର୍ଷିକ ପତ୍ରିକା, ‘ଉତ୍କଳ ଗୌରବ’ର ଊନବିଂଶ ସଂସ୍କରଣ, ନୂଆଦିଲ୍ଲୀ ସ୍ଥିତ, ତ୍ୟାଗରାଜ ନଗର ମନ୍ଦିର ପରିସରରେ ଉନ୍ମୋଚିତ ହୋଇଯାଇଛି । ପ୍ରବାସୀ ଓଡ଼ିଆମାନେ ବହୁ ସଂଖ୍ୟାରେ ଯୋଗଦେଇ ଉତ୍ସବଟିକୁ ଉପଭୋଗ କରିଥିଲେ । ଏହି ଉତ୍ସବରେ ମୁଖ୍ୟଅତିଥି ଭାବେ ନୂଆଦିଲ୍ଲୀର ଅଟଳ ବିହାରୀ ବାଜପେୟୀ ଇନ୍ଷ୍ଟିଚ୍ୟୁଟ ଅଫ ମେଡିକାଲ ସାଇନ୍ସ ଆଣ୍ଡ ଡ଼. ରାମ ମନୋହର ଲୋହିଆ ହସ୍ପିଟାଲର ଅଧ୍ୟକ୍ଷ ଡା. ରତ୍ନାକର ସାହୁ ଓ ସମ୍ମାନିତ ଅତିଥି ଭାବେ ଉତ୍ତର ରେଲୱେ ସେଣ୍ଟ୍ରାଲ ହସ୍ପିଟାଲର ମୁଖ୍ୟ ପ୍ରବନ୍ଧକ ପ୍ରସେଥେଟିଷ୍ଟ ଆଣ୍ଡ ଅର୍ଥୋଟିଷ୍ଟ ଡା. ମାର୍କଣ୍ଡ ଚନ୍ଦ୍ର ଦାଶ ଯୋଗଦାନ କରି ପତ୍ରିକା ଉନ୍ମୋଚନ କରିଥିଲେ । ମୁଖ୍ୟଅତିଥି ଓ ସମ୍ମାନିତ ଅତିଥିଙ୍କ ସହ ସଂଗଠନର ସଭାପତି ବିଜୟ ମହାନ୍ତି ଓ ପ୍ରକାଶ ପୃଷ୍ଟି ଦୀପ ପ୍ରଜ୍ୱଳନରେ ଯୋଗ ଦେଇଥିଲେ । ଦୀପ ପ୍ରଜ୍ୱଳନ ସହ ପ୍ରଭୁ ଜଗନ୍ନାଥଙ୍କର ପୂଜା ଅର୍ଚ୍ଚନା କରାଯାଇଥିଲା । ଓଡ଼ିଶାର ପ୍ରାଦେଶିକ ତଥା ଜାତୀୟ ସଂଗୀତ ବନ୍ଦେ ଉତ୍କଳ ଜନନୀ ଗାୟନ ପରେ ସଭାକାର୍ଯ୍ୟ ଆରମ୍ଭ ହୋଇଥିଲା । ତୁଷାର ମହାନ୍ତିଙ୍କ ସଂଯୋଜନାରେ ସଂଯୋଜକ ସନ୍ଦୀପ୍ତ ରାଉତ ସଂଗଠନର ବିବରଣୀ ପାଠ କରିଥିଲେ । ଦିଲ୍ଲୀ-ଏନସିଆର ଅଞ୍ଚଳର ‘ଉତ୍କଳ ଗୌରବ’ ସହିତ ଜଡିତ ଲେଖକ ଏବଂ ଲେଖିକା ମାନଙ୍କୁ, ସେମାନଙ୍କ ସାହିତ୍ୟିକ ଅବଦାନ ପାଇଁ ଏହି ଅବସରରେ ସମ୍ମାନିତ କରାଯାଇଥିଲା । ସାଂସ୍କୃତିକ କାର୍ଯ୍ୟକ୍ରମରେ ଗୁରୁ ଶ୍ରୀମନ୍ତ ମିଶ୍ରଙ୍କ ଶିଷ୍ୟାମାନଙ୍କ ଦ୍ୱାରା ଓଡ଼ିଶୀ ଏବଂ ସମ୍ବଲପୁରୀ ନୃତ୍ୟ ପରିବେଷଣ କରାଯାଇଥିଲା । ଯୁବ କଳାକାର ଅଭିପ୍ସା ଦାଶ ଓଡ଼ିଆ ଭଜନ ଏବଂ ଏକ ସୁନ୍ଦର ଓଡ଼ିଶୀ ପ୍ରଦର୍ଶନ କରିଥିଲେ ଉପସ୍ଥିତ ସତୀର୍ଥଙ୍କ ମନ ମୋହିଥିଲେ । ଏହି ଅବସରରେ ସମାବେଶକୁ ସମ୍ବୋଧିତ କରି ବିଜୟ ମହାନ୍ତି ପ୍ରବାସୀ ସମ୍ପ୍ରଦାୟ ମଧ୍ୟରେ ସାଂସ୍କୃତିକ ମୂଳ ସଂରକ୍ଷଣ ଉପରେ ଗୁରୁତ୍ୱାରୋପ କରିଥିଲେ । “ଆମେ ଯେଉଁ ଭୂମିରେ ବଢ଼ିଥିଲୁ, ଯେଉଁ ଭାଷା ଆମେ ପ୍ରଥମେ କହିବାକୁ ଶିଖିଥିଲୁ ଏବଂ ଆମକୁ ଗଠନ କରିଥିବା ଅନୁଷ୍ଠାନ ଗୁଡ଼ିକ ଗଛର ମୂଳ ପରି । ଜୀବନରେ ଆମେ ଯେତେ ଦୂର ଗଲେ ମଧ୍ୟ, ଯଦି ଆମେ ଏହି ମୂଳରୁ ନିଜକୁ ବିଚ୍ଛିନ୍ନ କରିଦେଉ, ତେବେ ଆମେ ମଣିଷ ହୋଇ ରହିପାରିବୁ ନାହିଁ,” ବୋଲି ସେ ମତ ରଖିଥିଲେ ଏବଂ ଦିଲ୍ଲୀରେ ରହୁଥିବା ଓଡ଼ିଆମାନଙ୍କ ମଧ୍ୟରେ ଅଧିକ ସଂହତି ପାଇଁ ଆହ୍ୱାନ ଦେଇଥିଲେ । ସମ୍ପ୍ରଦାୟର ସଦସ୍ୟମାନଙ୍କୁ ସଙ୍କଟ ସମୟରେ ପରସ୍ପର ସହିତ ଠିଆ ହେବାକୁ ଆହ୍ୱାନ କରିଥିଲେ । ସମ୍ମାନିତ ଅତିଥି ଡକ୍ଟର ମାର୍କଣ୍ଡ ଚନ୍ଦ୍ର ଦାଶ ଜଗନ୍ନାଥ ସଂସ୍କୃତିର ପ୍ରାସଙ୍ଗିକତା ଉପରେ ବକ୍ତବ୍ୟ ରଖିଥିଲେ ଏବଂ ଓଡ଼ିଆ ସାହିତ୍ୟ ଏବଂ ସାଂସ୍କୃତିକ କାର୍ଯ୍ୟକଳାପର କେନ୍ଦ୍ର ଭାବରେ କାର୍ଯ୍ୟ କରିବା ପାଇଁ ଦିଲ୍ଲୀରେ ଏକ ପାଠାଗାର ଏବଂ ସାଂସ୍କୃତିକ କେନ୍ଦ୍ର ପ୍ରତିଷ୍ଠା କରିବାର OCWAର ଦୀର୍ଘକାଳୀନ ଲକ୍ଷ୍ୟକୁ ସମର୍ଥନ କରିବାର ପ୍ରତିଶ୍ରୁତି ଦେଇଥିଲେ । ସଂଗଠନର ସଚିବ ପ୍ରକାଶ ପୃଷ୍ଟି, ସଂଯୋଜକ ବନୋଜ ପ୍ରଧାନ, ଅଜୟ ମହାନ୍ତି, ବିମଲ ପ୍ରସାଦ ସାମଲ, ପ୍ରଦୀପ୍ତ ଭୂୟାଁ, ନୟନ କିଶୋର ଦାସ, ହୃଦୟ ରଞ୍ଜନ ଭୂୟାଁ, ନବଘନ ଦଳାଇ, ସୁଶାନ୍ତ କୁମାର ଦାସ ଓ କୋଷାଧକ୍ଷ ପ୍ରଶାନ୍ତ ଦାସଙ୍କ ଅକ୍ଲାନ୍ତ ଉଦ୍ୟମ ଯୋଗୁ ପତ୍ରିକା ଉନ୍ମୋଚନ ଉତ୍ସବଟି ସୁରୁଖୁରୁରେ ପରିଚାଳିତ ହୋଇଥିଲା । ସୂଚନାଯୋଗ୍ୟ ଯେ, ୧୯୯୨ ମସିହାରେ ପ୍ରତିଷ୍ଠିତ ଏବଂ ୧୮୬୦ ମସିହାର ସମାଜ ପଞ୍ଜିକରଣ ଆଇନ ଅନୁଯାୟୀ ୨୦୦୫ ମସିହାରେ ଆନୁଷ୍ଠାନିକ ଭାବରେ ପଞ୍ଜିକୃତ ହୋଇଥିବା ଓଡିଆ କଲଚରାଲ୍ ଆଣ୍ଡ୍ ୱେଲଫେୟାର୍ ଆସୋସିଏସନ୍ ତିନି ଦଶନ୍ଧିରୁ ଅଧିକ ସମୟ ଧରି ଦିଲ୍ଲୀ ଏବଂ ଏନସିଆରରେ ପ୍ରବାସୀ ଓଡ଼ିଆମାନଙ୍କ ପାଇଁ ସାମାଜିକ ସାଂସ୍କୃତିକ ପଦକ୍ଷେପ ଏବଂ ସାମୁଦାୟିକ ଯୋଗଦାନ ମାଧ୍ୟମରେ ସେମାନଙ୍କର ଭାଷାଗତ ଏବଂ ସାଂସ୍କୃତିକ ଐତିହ୍ୟକୁ ପାଳନ ଏବଂ ବଜାୟ ରଖିବା ପାଇଁ ଏକ ମଞ୍ଚ ଭାବରେ କାର୍ଯ୍ୟ କରିଆସୁଛି ।