ବଲାଙ୍ଗିର, (କେପିଏନ୍ଏସ୍) : ଭାରତୀୟ ସଂସ୍କୃତିରେ ଶିକ୍ଷା ସମୃଦ୍ଧିର ପରିଚାୟକ ଅଟେ । ଏହି କ୍ରମରେ ସମସ୍ତ ପ୍ରକାର ବିଷୟ ମଣିଷର ଉନ୍ନତି ପାଇଁ ଆବଶ୍ୟକ ଅଟେ । ଭାରତୀୟ ଶିକ୍ଷା ପଦ୍ଧତିରେ ପ୍ରାଚୀନ କାଳରୁ ରାଜନୀତି ବିଜ୍ଞାନ ଅନ୍ତର୍ଭୁକ୍ତ ହୋଇ ରହିଛି । ଏହାକୁ ବୈଦେଶିକ ନୀତି ନିର୍ଦ୍ଧାରଣ ଓ ଆନ୍ତର୍ଜାତୀୟ ସମ୍ପର୍କ ସୁରକ୍ଷା କ୍ଷେତ୍ରରେ ଅତି ଗୁରୁତ୍ୱପୂର୍ଣ୍ଣ ବୋଲି ଗ୍ରହଣ କରାଯାଇଛି । ସମ୍ପ୍ରତି ବିଶ୍ୱରେ ରାଜନୀତି ବିଜ୍ଞାନର ଚାହିଦା ଓ ଆଦର ବଢିଛି । ଆଜିକାର ଯୁବ ସମାଜ ମଧ୍ୟରେ ଏହି ବିଷୟ ପ୍ରତି ଆଗ୍ରହ ସୃଷ୍ଟି କରିବା ପାଇଁ ଓ ଆଗାମୀ ଭବିଷ୍ୟତ ପାଇଁ ନେତୃତ୍ୱ ନେବା ପରି ବ୍ୟକ୍ତିତ୍ୱ ସୃଷ୍ଟି ପାଇଁ ପ୍ରାରମ୍ଭିକ ପ୍ରୟାସ କରିବା ଆଭିମୁଖ୍ୟ ନେଇ ଗତକାଲି ସେଞ୍ଚୁରିଅନ ବିଦ୍ୟାଳୟର କର୍ତ୍ତୃପକ୍ଷ ଏକ ପ୍ରତୀକାତ୍ମକ (ଗ୍ରୁପ – ୨୦)ର ସମ୍ମିଳନୀ ଆୟୋଜନ କରିଥିଲେ । ସମ୍ମିଳନୀର ଉଦ୍ଦେଶ୍ୟ ହେଲା ଆନ୍ତର୍ଜାତୀୟ ସ୍ତରରେ ବିଶ୍ୱର ଅନେକ ସମସ୍ୟାର ସମାଧାନ ପାଇଁ ଗ୍ରୁପ – ୨୦ର କ’ଣ ଭୂମିକା ରହିଛି ସେ ବିଷୟରେ ଛାତ୍ରଛାତ୍ରୀଙ୍କୁ ଅବଗତ କରାଇବା । ଗ୍ରୁପ – ୨୦ରେ ବିଶ୍ୱର ପ୍ରମୁଖ ୨୦ଟି ଦେଶ ସମ୍ମିଳିତ ହୋଇ ବିଶ୍ୱର ବିଭିନ୍ନ ସମସ୍ୟାର କାରଣ ଓ ନିରାକରଣର ଉପାୟ ସମ୍ପର୍କରେ ଆଲୋଚନା କରିଥାନ୍ତି । ଏହି ବର୍ଷ ଭାରତ ଗ୍ରୁପ – ୨୦ ସମ୍ମିଳନୀର ଆୟୋଜନ କରିଛି । ସମ୍ମିଳନୀରେ ବିଦ୍ୟାଳୟର ଦଶମ, ଏକାଦଶ ଓ ଦ୍ୱାଦଶ ଶ୍ରେଣୀର ଛାତ୍ରଛାତ୍ରୀମାନେ ବିଭିନ୍ନ ଦେଶ ଯେପରି ଆରଜେଣ୍ଟିନା, ଇଉରୋପ ସମୁହ, ଇଂଲଣ୍ଡ ପରି ଦେଶ ଗୁଡିକର ପ୍ରତିନିଧିତ୍ୱ କରିଥିଲେ । ଦଶମ ଶ୍ରେଣୀର ଛାତ୍ରୀ ଦିଶା ଅଗ୍ରୱାଲ ଭାରତର ପ୍ରତିନିଧିର ଭୂମିକା ତୁଲାଇ ଥିଲେ । ବିଭିନ୍ନ ଦେଶର ପ୍ରତିନିଧିମାନେ ବିଭିନ୍ନ ସମସ୍ୟାର କାରଣ ଓ ନିରାକରଣ ସମ୍ପର୍କରେ ବିସ୍ତୃତ ଆଲୋଚନା କରିଥିଲେ । ବିଦ୍ୟାଳୟର ଆଞ୍ଚଳିକ ନିର୍ଦ୍ଦେଶକ ପ୍ରଦୀପ ଷଡ଼ଙ୍ଗୀଙ୍କର ପ୍ରତ୍ୟକ୍ଷ ତତ୍ତ୍ୱାବଧାନରେ କାର୍ଯ୍ୟକ୍ରମଟି ସମ୍ପାଦିତ ହୋଇଥିଲା । ବିଦ୍ୟାଳୟର ଉପାଧ୍ୟକ୍ଷା ଶ୍ରୀମତୀ ପୁଣ୍ୟତୋୟା ବିଶ୍ୱାଳ, ସିଏଚ୍ଏସ୍ଇ (ବିଜ୍ଞାନ)ର ଉପାଧ୍ୟକ୍ଷା ଅଙ୍କିତା ଶୁଭ୍ରସ୍ମିତା ଗଡତ୍ୟା ଉପସ୍ଥିତ ରହି କାର୍ଯ୍ୟକ୍ରମଟିର ସଫଳ ପରିଚାଳନା କରିଥିଲେ । ଆଜିର ଶିଶୁ କାଲିର ନାଗରିକ ଏବଂ ଛାତ୍ରଛାତ୍ରୀଙ୍କ ଭିତରେ ଗଣତାନ୍ତ୍ରିକ ମୂଲ୍ୟବୋଧ, ଆନ୍ତର୍ଜାତିକ ବୈଦେଶିକ ନୀତି ସମ୍ପର୍କରେ ଅବଗତ କରାଇବାର ଏହି ଅଭିନବ ପ୍ରୟାସକୁ ସହରର ପ୍ରତ୍ୟେକ ବର୍ଗର ଲୋକ ଖୁବ୍ ପସନ୍ଦ କରିଛନ୍ତି । ଛାତ୍ରଛାତ୍ରୀଙ୍କୁ ଆଗାମୀ ଭବିଷ୍ୟତରେ ରାଜନୈତିକ ପୃଷ୍ଠଭୂମି ପାଇଁ ପ୍ରସ୍ତୁତ କରିବାର ପ୍ରାୟସକୁ ସମସ୍ତେ ସ୍ୱାଗତ କରିଛନ୍ତି ଓ ଏଥିପାଇଁ ଅନୁଷ୍ଠାନକୁ ପ୍ରଶଂସାର ସୁଅ ଛୁଟିଛି । ଅନୁଷ୍ଠାନର ଏପରି ଅଭିନବ ପ୍ରୟାସ ସ୍ୱାଗତଯୋଗ୍ୟ ଅଟେ ବୋଲି ମତ ପ୍ରକାଶ ପାଇଛି ।
