ହରିୟାଣାର ଯମୁନାନଗରରେ ଉନ୍ନୟନମୂଳକ ପ୍ରକଳ୍ପର ଉଦ୍ଘାଟନ ତଥା ଶିଳାନ୍ୟାସ କଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ
- ବିକଶିତ ଭାରତ ପାଇଁ ବିକଶିତ ହରିୟାଣା, ଏହା ହିଁ ଆମର ସଂକଳ୍ପ : ପ୍ରଧାନମନ୍ତ୍ରୀ
- ରାଜ୍ୟରେ ବିଜୁଳି ଉତ୍ପାଦନ ବୃଦ୍ଧି କରିବା ଆମର ଲକ୍ଷ୍ୟ, ବିଜୁଳି ଅଭାବ ଦେଶ ନିର୍ମାଣରେ ବାଧକ ହେବା ଉଚିତ ନୁହେଁ : ପ୍ରଧାନମନ୍ତ୍ରୀ
- ଆମ ଦ୍ୱାରା ଆରମ୍ଭ କରାଯାଇଥିବା ପିଏମ୍ ସୂର୍ଯ୍ୟଘର ମାଗଣା ବିଜୁଳି ଯୋଜନାରେ ସୋଲାର ପ୍ୟାନେଲ ସ୍ଥାପନା ଦ୍ୱାରା ବିଜୁଳି ବିଲ୍ ଶୂନକୁ ହ୍ରାସ କରାଯାଇପାରିବ : ପ୍ରଧାନମନ୍ତ୍ରୀ
- ହରିୟାଣାର କୃଷକମାନଙ୍କର ସାମର୍ଥ୍ୟ ବୃଦ୍ଧି ଆମର ଲକ୍ଷ୍ୟ : ପ୍ରଧାନମନ୍ତ୍ରୀ
ନୂଆଦିଲ୍ଲୀ, (ପିଆଇବି) : ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ହରିୟାଣାର ଯମୁନା ନଗରରେ ବିଭିନ୍ନ ବିକାଶମୂଳକ ପ୍ରକଳ୍ପର ଉଦ୍ଘାଟନ ଓ ଶିଳାନ୍ୟାସ କରିଛନ୍ତି । ହରିୟାଣାବାସୀଙ୍କୁ ଶୁଭେଚ୍ଛା ଜଣାଇ, ଏହାକୁ ମା’ ସରସ୍ୱତୀଙ୍କ ଜନ୍ମସ୍ଥାନ, ମନ୍ତ୍ର ଦେବୀଙ୍କ ବାସସ୍ଥାନ, ପଞ୍ଚମୁଖୀ ହନୁମାନ ଜୀଙ୍କ ସ୍ଥାନ ଏବଂ କପାଳମୋଚନ ସାହିବଙ୍କ ଆଶୀର୍ବାଦପ୍ରାପ୍ତ ସ୍ଥାନ ଭାବରେ ସ୍ୱୀକାର କରି ହରିୟାଣାର ପବିତ୍ର ଭୂମିକୁ ଶ୍ରଦ୍ଧାଞ୍ଜଳି ଜ୍ଞାପନ କରିଛନ୍ତି । ସେ ଏହାକୁ ‘ସଂସ୍କୃତି, ଭକ୍ତି ଏବଂ ସମର୍ପଣର ସଂଗମ’ ଭାବରେ ବର୍ଣ୍ଣନା କରିଥିଲେ । ସେ ବାବାସାହେବ ଆମ୍ବେଦକରଙ୍କ ୧୩୫ତମ ଜୟନ୍ତୀ ଅବସରରେ ସମସ୍ତ ନାଗରିକଙ୍କୁ ହାର୍ଦ୍ଦିକ ଶୁଭେଚ୍ଛା ଜଣାଇଛନ୍ତି । ସେ ବାବାସାହେବଙ୍କ ଦୂରଦୃଷ୍ଟି ଏବଂ ପ୍ରେରଣାର ସ୍ମୃତିଚାରଣ କରିଥିଲେ, ଯାହା ଭାରତର ବିକାଶ ଯାତ୍ରାରେ ମାର୍ଗଦର୍ଶନ କରିଚାଲିଛି । ଯମୁନାନଗର କେବଳ ଏକ ସହର ନୁହେଁ ବରଂ ଭାରତର ଶିଳ୍ପ କ୍ଷେତ୍ରର ଏକ ଗୁରୁତ୍ୱପୂର୍ଣ୍ଣ ଅଂଶ, ଯାହା ପ୍ଲାଇଉଡ୍ଠାରୁ ଆରମ୍ଭ କରି ପିତ୍ତଳ ଏବଂ ଇସ୍ପାତ ଶିଳ୍ପ ସହିତ ଅର୍ଥବ୍ୟବସ୍ଥାରେ ଉଲ୍ଲେଖନୀୟ ଯୋଗଦାନ ଦେଇଆସିଛି । ଏହି ଅଞ୍ଚଳର ସାଂସ୍କୃତିକ ଓ ଐତିହାସିକ ମହତ୍ତ୍ୱ ଉପରେ ଆଲୋକପାତ କରି ଶ୍ରୀ ମୋଦୀ କହିଥିଲେ, କପାଳ ମୋଚନ ମେଳା, ଋଷି ବେଦ ବ୍ୟାସଙ୍କ ପବିତ୍ର ଭୂମି ଏବଂ ଗୁରୁ ଗୋବିନ୍ଦ ସିଂ ଜୀଙ୍କ ଶସ୍ତ୍ରାଗାର ସ୍ଥାନର ବିଶେଷ ଭୂମିକା ରହିଛି । ସେ ଯମୁନାନଗର ସହିତ ତାଙ୍କ ବ୍ୟକ୍ତିଗତ ସମ୍ପର୍କ ଉପରେ ଆଲୋକପାତ କରିଥିଲେ । ହରିୟାଣାର ପ୍ରଭାରୀ ଥିବା ସମୟରେ ପଞ୍ଚକୁଲାକୁ ତାଙ୍କର ବାରମ୍ବାର ଗସ୍ତ କରିଥିବା କଥା ମନେ ପକାଇଥିଲେ । ଯେଉଁମାନେ ତାଙ୍କୁ କାର୍ଯ୍ୟରେ ସହଯୋଗ କରିଥିଲେ ଏବଂ କଠିନ ପରିଶ୍ରମ ତଥା ସ୍ଥାୟୀ ପରମ୍ପରାକୁ ଗ୍ରହଣ କରିଥିଲେ ସେ ସେଇ ଉତ୍ସର୍ଗୀକୃତ ଶ୍ରମିକମାନଙ୍କୁ କୃତଜ୍ଞତା ଜ୍ଞାପନ କରିଥିଲେ । କ୍ରମାଗତ ତୃତୀୟ ଥର ପାଇଁ କେନ୍ଦ୍ର ଏବଂ ରାଜ୍ୟ ସରକାରଙ୍କ ଅଧୀନରେ ହରିୟାଣାରେ ବିକାଶର ଦ୍ୱିଗୁଣିତ ଗତି ଦେଖିବାକୁ ମିଳୁଛି ବୋଲି ଉଲ୍ଲେଖ କରି ପ୍ରଧାନମନ୍ତ୍ରୀ ଏକ ବିକଶିତ ଭାରତର ଦୃଷ୍ଟିକୋଣର ଅଂଶ ଭାବରେ ଏକ ବିକଶିତ ହରିୟାଣା ପ୍ରତି ପ୍ରତିବଦ୍ଧତା ଉପରେ ଗୁରୁତ୍ୱାରୋପ କରିଥିଲେ । ସେ ହରିୟାଣାବାସୀଙ୍କ ସେବା କରିବା ପାଇଁ ସରକାରଙ୍କ ସମର୍ପଣ ଏବଂ ଅଧିକ ଦ୍ରୁତ ତଥା ବ୍ୟାପକ ଭାବରେ କାର୍ଯ୍ୟ କରି ଏହାର ଯୁବବର୍ଗଙ୍କ ଆକାଂକ୍ଷା ପୂରଣ କରିବା ଉପରେ ଆଲୋକପାତ କରିଥିଲେ । ଏହି ପ୍ରତିବଦ୍ଧତାର ପ୍ରମାଣ ସ୍ୱରୂପ ସେ ଆଜି ଆରମ୍ଭ ହୋଇଥିବା ଉନ୍ନୟନ ମୂଳକ ପ୍ରକଳ୍ପଗୁଡ଼ିକ ବିଷୟରେ ଉଲ୍ଲେଖ କରିଥିଲେ ଏବଂ ଏହି ନୂତନ ବିକାଶ ମୂଳକ ପଦକ୍ଷେପ ପାଇଁ ହରିୟାଣାବାସୀଙ୍କୁ ଅଭିନନ୍ଦନ ଜଣାଇଥିଲେ । ବାବାସାହେବ ଆମ୍ବେଦକରଙ୍କ ସ୍ୱପ୍ନକୁ ସାକାର କରିବା ପାଇଁ ତାଙ୍କ ସରକାରଙ୍କ ପ୍ରତିବଦ୍ଧତା ଉପରେ ଗର୍ବ ପ୍ରକାଶ କରି ଶ୍ରୀ ମୋଦୀ ବାବାସାହେବଙ୍କ ବିଶ୍ୱାସ ଉପରେ ଆଲୋକପାତ କରିଥିଲେ ଯେ ଶିଳ୍ପ ବିକାଶ ହେଉଛି ସାମାଜିକ ନ୍ୟାୟର ଏକ ମାର୍ଗ । ବାବାସାହେବ ଭାରତରେ ଛୋଟ ଛୋଟ ଜମିବାଡ଼ି ପ୍ରସଙ୍ଗକୁ ଚିହ୍ନଟ କରିଥିଲେ ଏବଂ ପର୍ଯ୍ୟାପ୍ତ ଚାଷ ଜମି ନଥିବା ଦଳିତମାନେ ଶିଳ୍ପାୟନ ଦ୍ୱାରା ସର୍ବାଧିକ ଲାଭବାନ ହୋଇପାରିବେ ବୋଲି ସେ ଗୁରୁତ୍ୱାରୋପ କରିଥିଲେ । ଶିଳ୍ପ ହିଁ ଦଳିତମାନଙ୍କ ପାଇଁ ଅଧିକ ନିଯୁକ୍ତି ସୁଯୋଗ ପ୍ରଦାନ କରିବ ଏବଂ ସେମାନଙ୍କ ଜୀବନଧାରଣ ମାନରେ ଉନ୍ନତି ଆଣିବ ବୋଲି ସେ ବାବାସାହେବଙ୍କ ଦୃଷ୍ଟିକୋଣକୁ ଉଲ୍ଲେଖ କରିଥିଲେ । ଭାରତର ଶିଳ୍ପାୟନ ପ୍ରୟାସରେ ବାବାସାହେବଙ୍କ ଗୁରୁତ୍ୱପୂର୍ଣ୍ଣ ଭୂମିକାକୁ ସେ ସ୍ୱୀକାର କରିଥିଲେ ଏବଂ ଦେଶର ପ୍ରଥମ ଶିଳ୍ପ ମନ୍ତ୍ରୀ ଡକ୍ଟର ଶ୍ୟାମା ପ୍ରସାଦ ମୁଖାର୍ଜୀଙ୍କ ସହ ମିଶି ଏହି ଦିଗରେ ଅଗ୍ରଗତିକୁ ତ୍ୱରାନ୍ୱିତ କରିଥିଲେ । ଶିଳ୍ପାୟନ ଏବଂ ଉତ୍ପାଦନ ମଧ୍ୟରେ ଥିବା ସମନ୍ୱୟକୁ ଦୀନବନ୍ଧୁ ଚୌଧୁରୀ ଛୋଟୁରାମ ଜୀ ମଧ୍ୟ ଗ୍ରାମୀଣ ସମୃଦ୍ଧିର ମୂଳଦୁଆ ଭାବରେ ସ୍ୱିକୃତି ଦେଇଥିଲେ ବୋଲି ମନ୍ତବ୍ୟ ଦେଇ ପ୍ରଧାନମନ୍ତ୍ରୀ ଛୋଟୁରାମଜୀଙ୍କ ବିଶ୍ୱାସ ଉପରେ ଆଲୋକପାତ କରିଥିଲେ ଯେ ଗ୍ରାମରେ ପ୍ରକୃତ ସମୃଦ୍ଧି ସେତେବେଳେ ଆସିବ ଯେତେବେଳେ କୃଷକମାନେ କୃଷି ସହିତ କ୍ଷୁଦ୍ର ଶିଳ୍ପ ମାଧ୍ୟମରେ ସେମାନଙ୍କର ଆୟ ବୃଦ୍ଧି କରିବେ । ସେ ଆହୁରି ମଧ୍ୟ ଉଲ୍ଲେଖ କରିଥିଲେ ଯେ ଚୌଧୁରୀ ଚରଣ ସିଂହ ଜୀ, ଯିଏ କି ଗାଁ ଏବଂ କୃଷକମାନଙ୍କ କଲ୍ୟାଣ ପାଇଁ ନିଜ ଜୀବନକୁ ଉତ୍ସର୍ଗ କରିଥିଲେ, ଚରଣ ସିଂହଜୀଙ୍କ ଦୃଷ୍ଟିକୋଣ ଉପରେ ଗୁରୁତ୍ୱାରୋପ କରିଥିଲେ ଯେ ଶିଳ୍ପ ବିକାଶ କୃଷିର ପରିପୂରକ ହେବା ଉଚିତ, କାରଣ ଉଭୟ ଅର୍ଥନୀତିର ପ୍ରମୁଖ ସ୍ତମ୍ଭ ଅଟନ୍ତି । ‘ମେକ୍ ଇନ୍ ଇଣ୍ଡିଆ’ ଏବଂ ‘ଆତ୍ମନିର୍ଭର ଭାରତ’ର ସାରମର୍ମ ଉତ୍ପାଦନକୁ ପ୍ରୋତ୍ସାହିତ କରିବାରେ ରହିଛି ବୋଲି ଗୁରୁତ୍ୱାରୋପ କରି ଶ୍ରୀ ମୋଦୀ ଉତ୍ପାଦନ ଦିଗରେ ସରକାରଙ୍କ ପଦକ୍ଷେପ ଉପରେ ଗୁରୁତ୍ୱାରୋପ କରିଥିଲେ, ଯାହା ଚଳିତ ବର୍ଷର ବଜେଟ୍ ‘ମିଶନ ମାନୁଫାକ୍ଚରିଂ’ ଘୋଷଣାରେ ପ୍ରତିଫଳିତ ହୋଇଛି । ଦଳିତ, ପଛୁଆବର୍ଗ, ଅବହେଳିତ ଏବଂ ସୁଯୋଗରୁ ବଞ୍ଚିତ ଯୁବକମାନଙ୍କ ପାଇଁ ସର୍ବାଧିକ ନିଯୁକ୍ତି ସୁଯୋଗ ସୃଷ୍ଟି କରିବା, ସେମାନଙ୍କୁ ଅତ୍ୟାବଶ୍ୟକ ତାଲିମ ପ୍ରଦାନ କରିବା, ବ୍ୟବସାୟିକ ଖର୍ଚ୍ଚ ହ୍ରାସ କରିବା, ଏମ୍ଏସ୍ଏମ୍ଇ କ୍ଷେତ୍ରକୁ ସୁଦୃଢ଼ କରିବା, ଶିଳ୍ପଗୁଡ଼ିକୁ ଆଧୁନିକ ଜ୍ଞାନକୌଶଳରେ ଉନ୍ନତ କରିବା ଏବଂ ଭାରତୀୟ ଉତ୍ପାଦକୁ ବିଶ୍ୱସ୍ତରୀୟ କରିବା ଏହି ମିଶନର ଲକ୍ଷ୍ୟ ବୋଲି ସେ କହିଛନ୍ତି । ଏହି ଲକ୍ଷ୍ୟ ହାସଲ ପାଇଁ ନିରବଚ୍ଛିନ୍ନ ବିଜୁଳି ଯୋଗାଣର ଗୁରୁତ୍ୱ ଉପରେ ପ୍ରାଧାନ୍ୟ ଦେବା ସହିତ ଆଜିର କାର୍ଯ୍ୟକ୍ରମର ମହତ୍ତ୍ୱ ଉପରେ ଆଲୋକପାତ କରି ସେ ଦୀନବନ୍ଧୁ ଚୌଧୁରୀ ଛୋଟୁରାମ ଥର୍ମାଲ ପାୱାର ପ୍ଲାଣ୍ଟର ତୃତୀୟ ୟୁନିଟ୍ କାମ ଆରମ୍ଭ କରିବାକୁ ଘୋଷଣା କରିଥିଲେ, ଯାହା ଯମୁନାନଗର ଏବଂ ହରିୟାଣାକୁ ଉପକୃତ କରିବ । ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ ଯେ ଯମୁନାନଗର ଭାରତର ଅଧା ପ୍ଲାଇଉଡ ଉତ୍ପାଦନ କରେ ଏବଂ ଆଲୁମିନିୟମ, ତମ୍ବା ଓ ପିତ୍ତଳ ବାସନ ଉତ୍ପାଦନ ପାଇଁ ଏକ ପ୍ରମୁଖ କେନ୍ଦ୍ର ଅଟେ । ସେ ଆହୁରି ମଧ୍ୟ କହିଛନ୍ତି ଯେ ଯମୁନାନଗରରୁ ପେଟ୍ରୋକେମିକାଲ ପ୍ଲାଣ୍ଟ ଉପକରଣ ଅନେକ ଦେଶକୁ ରପ୍ତାନୀ କରାଯାଏ । ବିଦ୍ୟୁତ୍ ଉତ୍ପାଦନ ବୃଦ୍ଧି କଲେ ଏହି ଶିଳ୍ପଗୁଡ଼ିକ ଉପକୃତ ହେବେ ଏବଂ ‘ମିସନ୍ ମାନୁଫାକ୍ଚରିଂ’କୁ ସହଯୋଗ ମିଳିବ ବୋଲି ସେ ଗୁରୁତ୍ୱାରୋପ କରିଥିଲେ । ଏକ ବିକଶିତ ଭାରତ ଗଠନରେ ବିଜୁଳିର ଗୁରୁତ୍ୱପୂର୍ଣ୍ଣ ଭୂମିକା ଉପରେ ଆଲୋକପାତ କରି ପ୍ରଧାନମନ୍ତ୍ରୀ ଏକ ରାଷ୍ଟ୍ର-ଏକ ଗ୍ରିଡ୍, ନୂତନ କୋଇଲା ଶକ୍ତି ପ୍ଲାଣ୍ଟ, ସୌର ଶକ୍ତି ପ୍ରକଳ୍ପ ଏବଂ ପରମାଣୁ କ୍ଷେତ୍ରର ସମ୍ପ୍ରସାରଣ ଭଳି ପଦକ୍ଷେପ ସମେତ ବିଦ୍ୟୁତ ଉପଲବ୍ଧତା ବୃଦ୍ଧି ପାଇଁ ସରକାରଙ୍କ ବହୁମୁଖୀ ପ୍ରୟାସ ଉପରେ ଆଲୋକପାତ କରିଥିଲେ । ‘ବିଜୁଳି ଅଭାବ ଯେପରି ଦେଶ ନିର୍ମାଣରେ ବାଧା ସୃଷ୍ଟି ନ କରେ ତାହା ସୁନିଶ୍ଚିତ କରିବା ପାଇଁ ବିଦ୍ୟୁତ ଉତ୍ପାଦନ ବୃଦ୍ଧି ନିତ୍ୟାନ୍ତ ଜରୁରୀ” ବୋଲି କହିଥିଲେ, ପୂର୍ବ ସରକାରଙ୍କ ଶାସନ ସମୟରେ ୨୦୧୪ ପୂର୍ବରୁ ବାରମ୍ବାର ବ୍ଲାକ୍ ଆଉଟ୍କୁ ମନେ ପକାଇ ସେ କହିଥିଲେ ଯେ ଯଦି କଂଗ୍ରେସ କ୍ଷମତାରେ ରହିଥାନ୍ତା ତେବେ ଏଭଳି ସଙ୍କଟ ଜାରି ରହିଥାନ୍ତା । ସେହି ସମୟରେ କାରଖାନା, ରେଳବାଇ ଓ ଜଳସେଚନ ବ୍ୟବସ୍ଥା ଗୁରୁତର ଭାବେ ପ୍ରଭାବିତ ହୋଇଥିଲା । ଗତ ଏକ ଦଶନ୍ଧି ମଧ୍ୟରେ ଭାରତ ଏହାର ବିଦ୍ୟୁତ ଉତ୍ପାଦନ କ୍ଷମତାକୁ ପ୍ରାୟ ଦ୍ୱିଗୁଣିତ କରିଛି ଏବଂ ବର୍ତ୍ତମାନ ପଡ଼ୋଶୀ ଦେଶଗୁଡ଼ିକୁ ଶକ୍ତି ରପ୍ତାନୀ କରୁଛି ବୋଲି ସେ କହିଥିଲେ । ବର୍ତ୍ତମାନ ୧୬ ହଜାର ମେଗାୱାଟ୍ ବିଦ୍ୟୁତ୍ ଉତ୍ପାଦନ କରୁଥିବା ହରିୟାଣା ପାଇଁ ବିଦ୍ୟୁତ୍ ଉତ୍ପାଦନ ଉପରେ ସେମାନଙ୍କ ସରକାରଙ୍କ ପଦକ୍ଷେପର ସୁଫଳ ସମ୍ପର୍କରେ ସେ ଆଲୋକପାତ କରିଥିଲେ । ଆଗାମୀ ବର୍ଷଗୁଡ଼ିକରେ ଏହି କ୍ଷମତାକୁ ୨୪ ହଜାର ମେଗାୱାଟକୁ ବୃଦ୍ଧି କରିବାକୁ ଲକ୍ଷ୍ୟ ରଖାଯାଇଛି ବୋଲି ସେ ଘୋଷଣା କରିଛନ୍ତି । ତାପଜ ବିଦ୍ୟୁତ୍ ପ୍ଲାଣ୍ଟରେ ପୁଞ୍ଜିନିବେଶ କରିବା ଏବଂ ନାଗରିକମାନଙ୍କୁ ନିଜେ ବିଦ୍ୟୁତ୍ ଜେନେରେଟର୍ ହେବା ଦିଗରେ ସଶକ୍ତ କରିବା ପାଇଁ ସରକାରଙ୍କ ଦ୍ୱିତୀୟ ଆଭିମୁଖ୍ୟ ଉପରେ ଆଲୋକପାତ କରି ଶ୍ରୀ ମୋଦୀ ପ୍ରଧାନମନ୍ତ୍ରୀ ସୂର୍ଯ୍ୟଘର ମାଗଣା ବିଜୁଳି ଯୋଜନାର ଶୁଭାରମ୍ଭ ବିଷୟରେ ଉଲ୍ଲେଖ କରିଥିଲେ, ଯାହା ଦ୍ୱାରା ବ୍ୟକ୍ତିମାନେ ନିଜ ଛାତ ଉପରେ ସୌର ପ୍ୟାନେଲ୍ ଲଗାଇପାରିବେ, ବିଦ୍ୟୁତ୍ ବିଲ୍ ହ୍ରାସ କରିପାରିବେ ଏବଂ ଅତିରିକ୍ତ ବିଜୁଳି ବିକ୍ରି କରି ରୋଜଗାର ମଧ୍ୟ କରିପାରିବେ । ସେ ଉଲ୍ଲେଖ କରିଛନ୍ତି ଯେ ସମଗ୍ର ଦେଶରେ ୧.୨୫ କୋଟିରୁ ଅଧିକ ଲୋକ ଏହି ଯୋଜନାରେ ପଞ୍ଜୀକରଣ କରିଛନ୍ତି ଏବଂ ହରିୟାଣାରୁ ଲକ୍ଷ ଲକ୍ଷ ଲୋକ ଏଥିରେ ସାମିଲ ହେବା ପାଇଁ ଆବେଦନ କରିଛନ୍ତି । ଏହି ଯୋଜନାର ସମ୍ପ୍ରସାରଣକୁ ନେଇ ସେ ସନ୍ତୋଷ ବ୍ୟକ୍ତ କରିଛନ୍ତି, ଯାହା ଏକ ବଢୁଥିବା ସେବା ଇକୋସିଷ୍ଟମକୁ ପ୍ରୋତ୍ସାହିତ କରୁଛି । ସେ ଗୁରୁତ୍ୱାରୋପ କରିଥିଲେ ଯେ ସୌର କ୍ଷେତ୍ର ନୂତନ ଦକ୍ଷତା ସୃଷ୍ଟି କରୁଛି, ଏମ୍ଏସ୍ଏମ୍ଇ ପାଇଁ ସୁଯୋଗ ସୃଷ୍ଟି କରୁଛି ଏବଂ ଯୁବ ନିଯୁକ୍ତି ପାଇଁ ଅନେକ ବାଟ ଉନ୍ମୁକ୍ତ କରିଛି । ଛୋଟ ସହରରେ କ୍ଷୁଦ୍ର ଶିଳ୍ପପାଇଁ ପର୍ଯ୍ୟାପ୍ତ ବିଜୁଳି ଏବଂ ଆର୍ଥିକ ସମ୍ବଳ ସୁନିଶ୍ଚିତ କରିବା ଉପରେ ସରକାର ଗୁରୁତ୍ୱାରୋପ କରିଥିଲେ । ସେ ଉଲ୍ଲେଖ କରିଛନ୍ତି ଯେ କୋଭିଡ୍-୧୯ ମହାମାରୀ ସମୟରେ ସରକାର ଏମ୍ଏସ୍ଏମ୍ଇଗୁଡ଼ିକୁ ସହାୟତା କରିବା ପାଇଁ ଲକ୍ଷ ଲକ୍ଷ କୋଟି ଟଙ୍କାର ଆର୍ଥିକ ସହାୟତା ପ୍ରଦାନ କରିଥିଲେ । କ୍ଷୁଦ୍ର ଉଦ୍ୟୋଗଗୁଡ଼ିକ ପାଇଁ ସ୍ୱତନ୍ତ୍ର କ୍ରେଡିଟ୍ କାର୍ଡ ପ୍ରଚଳନ ଏବଂ କ୍ରେଡିଟ୍ ଗ୍ୟାରେଣ୍ଟି କଭରେଜ୍ ବୃଦ୍ଧି ସମ୍ପର୍କରେ ଉଲ୍ଲେଖ କରି ସେ ଆହୁରି ମଧ୍ୟ କହିଛନ୍ତି ଯେ, କ୍ଷୁଦ୍ର ଉଦ୍ୟୋଗଗୁଡ଼ିକର ସଂଜ୍ଞାକୁ ସଂଶୋଧନ କରାଯାଇଛି, ଯେଉଁଥିରେ କ୍ଷୁଦ୍ର ଉଦ୍ୟୋଗଗୁଡ଼ିକର ଅଭିବୃଦ୍ଧି ସହିତ ସରକାରୀ ସହାୟତା ହରାଇବାର ଭୟ ନ ଥାଇ ସମ୍ପ୍ରସାରଣ କରିବାକୁ ଅନୁମତି ଦିଆଯାଇଛି । ନିକଟରେ ମୁଦ୍ରା ଯୋଜନାର ୧୦ ବର୍ଷର ମାଇଲଖୁଣ୍ଟକୁ ସେ ଉଲ୍ଲେଖ କରିଥିଲେ, ଯାହା ଅଧୀନରେ ୩୩ ଲକ୍ଷ କୋଟି ଟଙ୍କାର ବନ୍ଧକ ମୁକ୍ତ ଋଣ ବଣ୍ଟନ କରାଯାଇଛି । ଏହି ଯୋଜନାର ୫୦ ପ୍ରତିଶତରୁ ଅଧିକ ହିତାଧିକାରୀ ଏସ୍ସି, ଏସ୍ଟି ଏବଂ ଓବିସି ପରିବାରର ବୋଲି ସେ ଗୁରୁତ୍ୱାରୋପ କରିଥିଲେ । କ୍ଷୁଦ୍ର ଉଦ୍ୟୋଗଗୁଡିକୁ ଭାରତର ଯୁବବର୍ଗଙ୍କ ବଡ଼ ସ୍ୱପ୍ନ ପୂରଣ କରିବା ପାଇଁ ସକ୍ଷମ କରିବା ପାଇଁ ସରକାରଙ୍କ ପ୍ରତିବଦ୍ଧତାକୁ ସେ ଉଲ୍ଲେଖ କରିଥିଲେ । ହରିୟାଣାର କୃଷକମାନଙ୍କ କଠିନ ପରିଶ୍ରମକୁ ପ୍ରଶଂସା କରି ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଥିଲେ ଯେ କେନ୍ଦ୍ର ଏବଂ ରାଜ୍ୟ ସରକାର କୃଷକମାନଙ୍କ ସୁଖ ଏବଂ ଦୁଃଖରେ ଏକ ଦୃଢ଼ ଅଂଶୀଦାର ଭାବରେ ଠିଆ ହୋଇଛନ୍ତି । ସେ ହରିୟାଣାର କୃଷକମାନଙ୍କୁ ସଶକ୍ତ କରିବାର ପ୍ରୟାସ ଉପରେ ଆଲୋକପାତ କରି କହିଥିଲେ ଯେ ରାଜ୍ୟ ସରକାର ବର୍ତ୍ତମାନ ଏମ୍ଏସ୍ପିରେ ୨୪ଟି ଫସଲ କ୍ରୟ କରୁଛନ୍ତି । ପ୍ରଧାନମନ୍ତ୍ରୀ ଫସଲ ବୀମା ଯୋଜନାରେ ହରିୟାଣାର ଲକ୍ଷ ଲକ୍ଷ କୃଷକ ଉପକୃତ ହୋଇଛନ୍ତି ଏବଂ ଏହି ଯୋଜନା ଅଧୀନରେ ୯ ହଜାର କୋଟି ଟଙ୍କାରୁ ଅଧିକ ଦାବି କରାଯାଇଛି ବୋଲି ସେ କହିଛନ୍ତି । ଏହାବ୍ୟତୀତ ପ୍ରଧାନମନ୍ତ୍ରୀ କିଷାନ ସମ୍ମାନ ନିଧି ମାଧ୍ୟମରେ ହରିୟାଣାର କୃଷକମାନଙ୍କୁ ୬,୫୦୦ କୋଟି ଟଙ୍କା ପ୍ରଦାନ କରାଯାଇଛି, ଯାହା ସେମାନଙ୍କ ଜୀବିକା ଏବଂ ଅଭିବୃଦ୍ଧିକୁ ଆହୁରି ସହାୟକ ହେବ ବୋଲି ସେ ଉଲ୍ଲେଖ କରିଛନ୍ତି । ହରିୟାଣା ସରକାର ଉପନିବେଶକାଳୀନ ଜଳ ଟିକସ ଉଚ୍ଛେଦ କରିବା, କୃଷକମାନଙ୍କୁ କେନାଲ ଜଳ ଉପରେ ଟିକସ ଦେବାରୁ ମୁକ୍ତ କରିବାର ନିଷ୍ପତ୍ତି ଉପରେ ଆଲୋକପାତ କରି ଶ୍ରୀ ମୋଦୀ ଉଲ୍ଲେଖ କରିଛନ୍ତି ଯେ ଏହି ଟିକସ ଅଧୀନରେ ବକେୟା ୧୩୦ କୋଟି ଟଙ୍କା ମଧ୍ୟ ଛାଡ଼ କରାଯାଇଛି । କୃଷକ ଓ ପଶୁପକ୍ଷୀଙ୍କୁ ନୂଆ ରୋଜଗାର ସୁଯୋଗ ଦେବା ଦିଗରେ କେନ୍ଦ୍ର ଓ ରାଜ୍ୟ ସରକାରଙ୍କ ପ୍ରୟାସ ଉପରେ ସେ ଗୁରୁତ୍ୱାରୋପ କରିଥିଲେ । ସେ ଗୋବର୍ଦ୍ଧନ ଯୋଜନା ବିଷୟରେ ଉଲ୍ଲେଖ କରିଥିଲେ, ଯାହା କୃଷକମାନଙ୍କୁ ଗୋବର, କୃଷି ଅବଶେଷ ଏବଂ ଅନ୍ୟ ଜୈବିକ ବର୍ଜ୍ୟବସ୍ତୁରୁ ବାୟୋଗ୍ୟାସ ଉତ୍ପାଦନ କରି ବର୍ଜ୍ୟବସ୍ତୁ ପରିଚାଳନା ଏବଂ ଆୟ ସୃଷ୍ଟି କରିବାରେ ସକ୍ଷମ କରେ । ଚଳିତ ବର୍ଷର ବଜେଟରେ ସାରା ଦେଶରେ ୫୦୦ ଗୋବର୍ଦ୍ଧନ କାରଖାନା ଘୋଷଣା କରାଯାଇଛି ବୋଲି ସେ କହିଛନ୍ତି । ଯମୁନାନଗରରେ ଏକ ନୂତନ ଗୋବର୍ଦ୍ଧନ କାରଖାନାର ଶିଳାନ୍ୟାସ ଉପରେ ସେ ଆଲୋକପାତ କରିଥିଲେ, ଯାହା ମହାନଗର ନିଗମ ପାଇଁ ବାର୍ଷିକ ୩ କୋଟି ଟଙ୍କା ସଞ୍ଚୟ କରିବ । “ଗୋବର୍ଦ୍ଧନ ଯୋଜନା ସ୍ୱଚ୍ଛ ଭାରତ ଅଭିଯାନରେ ମଧ୍ୟ ସହଯୋଗ କରୁଛି, ସ୍ୱଚ୍ଛତା ଏବଂ ସ୍ଥାୟୀତାର ଅଭିଯାନକୁ ଆଗକୁ ବଢ଼ାଉଛି”, ବୋଲି ସେ ପୁଣି କହିଥିଲେ । ପ୍ରଧାନମନ୍ତ୍ରୀ ବିକାଶ ପଥରେ ହରିୟାଣାର ଦ୍ରୁତ ଅଗ୍ରଗତି ଉପରେ ଆଲୋକପାତ କରିଥିଲେ ଏବଂ ତାଙ୍କର ପୂର୍ବ ଥର ଗସ୍ତ ବିଷୟରେ ଉଲ୍ଲେଖ କରିଥିଲେ, ଯେଉଁଠାରେ ଅଯୋଧ୍ୟାଧାମକୁ ସିଧାସଳଖ ବିମାନସେବା ଉଦଘାଟିତ ହୋଇଥିଲା । ସେ ରେଓ୍ଵାରି ପାଇଁ ନୂତନ ବାଇପାସ୍ ଘୋଷଣା କରିଛନ୍ତି, ଯାହା ବଜାର, ଛକ ଏବଂ ରେଳ କ୍ରସିଂରେ ଟ୍ରାଫିକ୍ ଭିଡ଼କୁ ହ୍ରାସ କରିବ ଏବଂ ଯାନବାହନଗୁଡ଼ିକୁ ସୁରୁଖୁରୁରେ ସହରକୁ ଚଳପ୍ରଚଳ କରିବାକୁ ଅନୁମତି ଦେବ । ୪ ଲେନ୍ ବିଶିଷ୍ଟ ଏହି ବାଇପାସ୍ ଦ୍ୱାରା ଦିଲ୍ଲୀ ଓ ନାରନୌଲ ମଧ୍ୟରେ ଯାତ୍ରା ସମୟରେ ଏକ ଘଣ୍ଟା ହ୍ରାସ ପାଇବ ବୋଲି ସେ ଉଲ୍ଲେଖ କରିବା ସହ ଏହି ସଫଳତା ପାଇଁ ଦେଶବାସୀଙ୍କୁ ଅଭିନନ୍ଦନ ଜଣାଇଛନ୍ତି । ସେମାନଙ୍କ ପାଇଁ ରାଜନୀତି ହେଉଛି ସେବାର ମାଧ୍ୟମ- ଜନସାଧାରଣ ଓ ଦେଶ ସେବା ଉପରେ ଗୁରୁତ୍ୱାରୋପ କରି ଶ୍ରୀ ମୋଦୀ କହିଥିଲେ, “ଆମ ଦଳ ତା’ର ପ୍ରତିଶ୍ରୁତି ପୂରଣ କରୁଛି, ଯାହା କି ହରିୟାଣାରେ ସ୍ପଷ୍ଟ ପ୍ରତିପାଦିତ ହୋଇଛି”, ଯେଉଁଠାରେ ସରକାର ତୃତୀୟ ଥର ପାଇଁ ନିର୍ବାଚିତ ହେବା ପରେ ଦେଇଥିବା ପ୍ରତିଶ୍ରୁତି ପୂରଣ କରୁଛନ୍ତି । ଜନସାଧାରଣଙ୍କ ବିଶ୍ୱାସ ପ୍ରତି ବିଶ୍ୱାସଘାତକତା ଦର୍ଶାଇ ସେ ବିରୋଧୀ ଶାସିତ ରାଜ୍ୟ ସହ ତୁଳନା କରିଥିଲେ । ସେ ହିମାଚଳ ପ୍ରଦେଶରେ ଲୋକମାନେ ସମ୍ମୁଖୀନ ହେଉଥିବା ସଂଘର୍ଷ ବିଷୟରେ ଆଲୋକପାତ କରିଥିଲେ, ଯେଉଁଠାରେ ବିକାଶ ଏବଂ କଲ୍ୟାଣକାରୀ ପ୍ରକଳ୍ପ ଅଟକି ରହିଛି । କର୍ଣ୍ଣାଟକରେ ବିଜୁଳି, କ୍ଷୀର, ବସ୍ ଭଡ଼ା ଏବଂ ବିହନ ଭଳି ଅତ୍ୟାବଶ୍ୟକ ସାମଗ୍ରୀର ଖର୍ଚ୍ଚ ବଢ଼ୁଥିବା ସେ ଆଲୋକପାତ କରିଛନ୍ତି । ସାମାଜିକ ଗଣମାଧ୍ୟମରେ ଦେଖାଯାଉଥିବା କର୍ଣ୍ଣାଟକର ବର୍ତ୍ତମାନର ସରକାର ପ୍ରତି ଜନଅସନ୍ତୋଷ ବିଷୟରେ ସେ ଉଲ୍ଲେଖ କରିଥିଲେ ଏବଂ ଦୁର୍ନୀତି ଅଭିଯୋଗକୁ ଉଲ୍ଲେଖ କରିଥିଲେ ଏବଂ ମୁଖ୍ୟମନ୍ତ୍ରୀଙ୍କ ଘନିଷ୍ଠ ସହଯୋଗୀମାନେ ମଧ୍ୟ କର୍ଣ୍ଣାଟକର ମାନ୍ୟତାକୁ ଦୁର୍ନୀତିରେ ଏକ ନମ୍ବର ଭାବେ ସ୍ୱୀକାର କରିଛନ୍ତି । ତେଲେଙ୍ଗାନା ସରକାର ଲୋକଙ୍କୁ ଦେଇଥିବା ପ୍ରତିଶ୍ରୁତିକୁ ଅଣଦେଖା କରିବା ସହ ଜଙ୍ଗଲକୁ ବୁଲଡୋଜିଂ କରିବା, ପ୍ରକୃତି ଓ ବନ୍ୟଜନ୍ତୁଙ୍କୁ କ୍ଷତି ପହଞ୍ଚାଇବା ଉପରେ ଗୁରୁତ୍ୱ ଦେଉଥିବାରୁ ଶ୍ରୀ ମୋଦୀ ତାଙ୍କୁ ସମାଲୋଚନା କରିଛନ୍ତି । ସେ ଶାସନର ଦୁଇଟି ମଡେଲକୁ ତୁଳନା କରି ତାଙ୍କ ଦଳର ମଡେଲକୁ ପ୍ରକୃତ ଏବଂ ଏକ ବିକଶିତ ଭାରତ ଗଠନ ପାଇଁ ସମର୍ପିତ ବୋଲି ବର୍ଣ୍ଣନା କରିଥିବାବେଳେ ବିରୋଧୀମାନେ ପ୍ରତାରଣାକାରୀ ଏବଂ କେବଳ କ୍ଷମତା ଉପରେ ଧ୍ୟାନ କେନ୍ଦ୍ରିତ କରିଛନ୍ତି । ସେ ଯମୁନାନଗରରେ ଚାଲିଥିବା ପ୍ରୟାସକୁ ପ୍ରଗତି ପାଇଁ ତାଙ୍କ ଦଳର ପ୍ରତିବଦ୍ଧତାର ଏକ ଉଦାହରଣ ଭାବରେ ଆଲୋକପାତ କରିଥିଲେ । ବୈଶାଖୀର ମହତ୍ତ୍ୱ ଏବଂ ଜାଲିଆନାୱାଲାବାଗ ହତ୍ୟାକାଣ୍ଡର ୧୦୬ତମ ବାର୍ଷିକୀ ଅବସରରେ ପ୍ରଧାନମନ୍ତ୍ରୀ ନିଜ ଜୀବନକୁ ବଳିଦାନ ଦେଇଥିବା ଦେଶପ୍ରେମୀଙ୍କ ସ୍ମୃତିକୁ ସମ୍ମାନିତ କରିବା ସହ ବ୍ରିଟିଶ ଶାସନର ନିଷ୍ଠୁରତା ଉପରେ ଆଲୋକପାତ କରିଥିଲେ । ସେ ଏହି ହତ୍ୟାକାଣ୍ଡର ଆଉ ଏକ ଦିଗ ଉପରେ ଗୁରୁତ୍ୱାରୋପ କରିଥିଲେ- ମାନବିକତା ଏବଂ ଦେଶ ପାଇଁ ଠିଆ ହେବାର ଅତୁଟ ଭାବନା, ଯାହାର ଉଦାହରଣ ଶଙ୍କରନ ନାୟାର ଦେଇଛନ୍ତି । ପ୍ରସିଦ୍ଧ ଆଇନଜୀବୀ ତଥା ବ୍ରିଟିଶ ସରକାରଙ୍କ ଉଚ୍ଚପଦସ୍ଥ ଅଧିକାରୀ ଶଙ୍କରନ ନାୟାର ଇସ୍ତଫା ଦେଇ ବିଦେଶୀ ଶାସନର ଅତ୍ୟାଚାର ବିରୋଧରେ ସ୍ୱର ଉତ୍ତୋଳନ କରିଛନ୍ତି । ସେ ଜାଲିଆନାୱାଲାବାଗ ମାମଲାକୁ ଏକାକୀ ଲଢ଼ି ବ୍ରିଟିଶ ସାମ୍ରାଜ୍ୟର ଭିତ୍ତିଭୂମିକୁ ଦୋହଲାଇ ଦେଇଥିଲେ ଏବଂ କୋର୍ଟରେ ଏହାକୁ ଉତ୍ତରଦାୟୀ କରିଥିଲେ । ସେ ଶଙ୍କରନ ନାୟାରଙ୍କ କାର୍ଯ୍ୟକୁ “ଏକ ଭାରତ, ଶ୍ରେଷ୍ଠ ଭାରତ”ର ଏକ ଉଲ୍ଲେଖନୀୟ ଉଦାହରଣ ଭାବରେ ବର୍ଣ୍ଣନା କରିଥିଲେ, ଯେଉଁଥିରେ ଦର୍ଶାଯାଇଛି ଯେ କିପରି କେରଳର ଜଣେ ବ୍ୟକ୍ତି ପଞ୍ଜାବରେ ଏକ ଗଣହତ୍ୟା ପାଇଁ ବ୍ରିଟିଶ ଶକ୍ତି ବିରୋଧରେ ଠିଆ ହୋଇଥିଲେ । ଏହି ଏକତା ଏବଂ ପ୍ରତିରୋଧ ଭାବନା ଭାରତର ସ୍ୱାଧୀନତା ସଂଗ୍ରାମର ପ୍ରକୃତ ପ୍ରେରଣା ଏବଂ ଏକ ବିକଶିତ ଭାରତ ଅଭିମୁଖେ ଯାତ୍ରାରେ ଏକ ପ୍ରେରଣା ଶକ୍ତି ହୋଇ ରହିଛି ବୋଲି ସେ କହିଥିଲେ । ଶଙ୍କରନ ନାୟାରଙ୍କ ଅବଦାନ ବିଷୟରେ ଜାଣିବାକୁ ପ୍ରଧାନମନ୍ତ୍ରୀ ସମସ୍ତଙ୍କୁ ଅନୁରୋଧ କରିଥିଲେ ଏବଂ ସମାଜର ସ୍ତମ୍ଭ ଗରିବ, କୃଷକ, ଯୁବକ ଏବଂ ମହିଳାମାନଙ୍କୁ ସଶକ୍ତ କରିବା ପାଇଁ କେନ୍ଦ୍ର ଏବଂ ରାଜ୍ୟ ସରକାରଙ୍କ ନିରନ୍ତର ପ୍ରୟାସ ଉପରେ ଗୁରୁତ୍ୱାରୋପ କରି ବକ୍ତବ୍ୟ ଶେଷ କରିଥିଲେ । ସାମୂହିକ ପ୍ରୟାସ ହରିୟାଣାକୁ ବିକାଶ ଦିଗରେ ଆଗେଇ ନେବ ବୋଲି ସେ ବିଶ୍ୱାସ ବ୍ୟକ୍ତ କରିଥିଲେ । ଏହି କାର୍ଯ୍ୟକ୍ରମରେ ହରିୟାଣା ମୁଖ୍ୟମନ୍ତ୍ରୀ ନୟାବ ସିଂହ ସାଇନି, କେନ୍ଦ୍ରମନ୍ତ୍ରୀ ମନୋହର ଲାଲ, ରାଓ ଇନ୍ଦ୍ରଜିତ୍ ସିଂହ, କ୍ରିଷନ ପାଲ ଗୁର୍ଜର ପ୍ରମୁଖ ଉପସ୍ଥିତ ଥିଲେ ।
ପୃଷ୍ଠଭୂମି
ଏହି ଅଞ୍ଚଳରେ ବିଦ୍ୟୁତ ଭିତ୍ତିଭୂମିକୁ ସୁଦୃଢ଼ କରିବା ସହିତ ଶେଷ ବର୍ଗ ପର୍ଯ୍ୟନ୍ତ ବିଜୁଳି ପହଞ୍ଚିବାର ଲକ୍ଷ୍ୟ ରଖି ପ୍ରଧାନମନ୍ତ୍ରୀ ଯମୁନାନଗରଠାରେ ଦୀନବନ୍ଧୁ ଛୋଟୁରାମ ତାପଜ ବିଦ୍ୟୁତ୍ କେନ୍ଦ୍ରର ୮୦୦ ମେଗାୱାଟ ଆଧୁନିକ ତାପଜ ବିଦ୍ୟୁତ୍ ୟୁନିଟ୍ର ଶିଳାନ୍ୟାସ କରିଥିଲେ । ପ୍ରାୟ ୮,୪୭୦ କୋଟି ଟଙ୍କା ମୂଲ୍ୟର ୨୩୩ ଏକର ପରିମିତ ଏହି ୟୁନିଟ୍ ହରିୟାଣାର ବିଦ୍ୟୁତ ଆତ୍ମନିର୍ଭରଶୀଳତାକୁ ଯଥେଷ୍ଟ ବୃଦ୍ଧି କରିବ ଏବଂ ସମଗ୍ର ରାଜ୍ୟରେ ନିରବଚ୍ଛିନ୍ନ ବିଜୁଳି ଯୋଗାଣ ଯୋଗାଇବ । ଗୋବର୍ଦ୍ଧନ ଅର୍ଥାତ୍ ଜୈବିକ ଜୈବ-କୃଷି ସମ୍ପଦ ଧନର ସ୍ୱପ୍ନକୁ ଆଗେଇ ନେଇ ପ୍ରଧାନମନ୍ତ୍ରୀ ଯମୁନାନଗରର ମୁକରାବପୁରଠାରେ ଏକ କମ୍ପ୍ରେସ୍ଡ଼ ବାୟୋଗ୍ୟାସ ପ୍ଲାଣ୍ଟର ଶିଳାନ୍ୟାସ କରିଥିଲେ । ଏହି କାରଖାନାର ବାର୍ଷିକ ଉତ୍ପାଦନ କ୍ଷମତା ୨,୬୦୦ ମେଟ୍ରିକ୍ଟନ୍ ହେବ ଏବଂ ସ୍ୱଚ୍ଛ ଶକ୍ତି ଉତ୍ପାଦନ ଏବଂ ପରିବେଶ ସଂରକ୍ଷଣରେ ଯୋଗଦାନ ଦେବା ସହିତ ପ୍ରଭାବଶାଳୀ ଜୈବିକ ବର୍ଜ୍ୟବସ୍ତୁ ପରିଚାଳନାରେ ସହାୟକ ହେବ । ପ୍ରଧାନମନ୍ତ୍ରୀ ଭାରତମାଳା ପରିଯୋଜନା ଅଧୀନରେ ପ୍ରାୟ ୧ ହଜାର ୭୦ କୋଟି ଟଙ୍କା ବ୍ୟୟରେ ୧୪.୪ କିଲୋମିଟର ରେୱାରୀ ବାଇପାସ୍ ପ୍ରକଳ୍ପକୁ ଉଦଘାଟନ କରିଥିଲେ । ଏହା ଦ୍ୱାରା ରେଓ୍ଵାରି ସହରରେ ଭିଡ଼ ହ୍ରାସ ପାଇବ, ଦିଲ୍ଲୀ-ନାରନୌଲ ଯାତ୍ରାସମୟ ପ୍ରାୟ ଏକ ଘଣ୍ଟା ହ୍ରାସ ପାଇବ ଏବଂ ଏହି ଅଞ୍ଚଳରେ ଅର୍ଥନୈତିକ ଓ ସାମାଜିକ କାର୍ଯ୍ୟକଳାପ ବୃଦ୍ଧି ପାଇବ ।