ବରଗଡ଼, (ସତ୍ୟ ନାରାୟଣ ପ୍ରଧାନ) : ବରଗଡ଼ ଜିଲ୍ଲାର ୧୨ଟି ବ୍ଲକର ଜିଲ୍ଲା ପରିଷଦ ପ୍ରଥମ ଜୋନ ଆସନରେ ବିଜୁ ଜନତା ଦଳ ତାଙ୍କ ନିକଟତମ ପ୍ରତିଦ୍ୱନ୍ଦୀ ଭାରତୀୟ ଜନତା ପାର୍ଟି ଠାରୁ ୧୦-୨ରେ ବିଜୟୀ ହୋଇଛନ୍ତି । ଭାଜପା କେବଳ ପଦ୍ମପୁର ଏବଂ ପାଇକମାଲରେ ବିଜୟୀ ହୋଇଛି । ବିଜୁ ଜନତା ଦଳର ପ୍ରାର୍ଥୀ ଓ ପ୍ରାର୍ଥିନୀ ମାନଙ୍କ ମଧ୍ୟରେ ଅମ୍ଭାଭୋନା ବ୍ଲକ ଜୋନ ନଂ. ୧ ରୁ ନୀଳ କୁମାରୀ ନାଏକ, ଅତାବିରା ବ୍ଲକରୁ ସୁଦାମ ଜାଲ, ବରଗଡ଼ ବ୍ଲକରୁ ପୁଷ୍ପା ଭୋଇ, ବରପାଲି ବ୍ଲକରୁ ଗୋବିନ୍ଦ ସାହୁ, ଭଟଲି ବ୍ଲକରୁ ଭାରତି ଭୁଏ, ଭେଡେନ ବ୍ଲକରୁ ପଦ୍ମିନୀ ଗଡତିଆ, ବିଜେପୁର ବ୍ଲକରୁ ମାନିନୀ ଭୋଇ, ଗାଇସିଲେଟ ବ୍ଲକରୁ ନୀଳମଣି ବରିହା, ଝାରବନ୍ଧ ବ୍ଲକରୁ ସୁଶିଲ ମରଇ, ସୋହେଲା ବ୍ଲକରୁ ଜାଇଫୁଲ ବରିହା ତାଙ୍କ ନିକଟତମ ପ୍ରତିଦ୍ୱନ୍ଦୀ ଭାଜପା ପ୍ରାର୍ଥୀଙ୍କୁ ପରାସ୍ତ କରି ବିଜୟୀ ହୋଇଛନ୍ତି । ଭାଜପା ପ୍ରାର୍ଥୀଙ୍କ ମଧ୍ୟରେ ପାଇକମାଲ ବ୍ଲକର ତ୍ରିପୁରା ବରିହା ତାଙ୍କ ନିକଟତମ ପ୍ରତିଦ୍ୱନ୍ଦୀ ବିଜେଡ଼ିର ପ୍ରାର୍ଥିନୀ ପୂର୍ବତନ ଜିଲ୍ଲା ପରିଷଦ ସଭାନେତ୍ରୀ ଗୀତାଞ୍ଜଳି ପୁଟାଙ୍କୁ ପରାସ୍ତ କରି ବିଜୟୀ ହୋଇଥିଲେ । ସେହିପରି ପଦ୍ମପୁର ବ୍ଲକ ସରସ୍ୱତୀ ସାହୁ ତାଙ୍କ ନିକଟତମ ପ୍ରତିଦ୍ୱନ୍ଦୀ ବିଜେଡ଼ିର ରଜନୀ ସାହୁଙ୍କୁ ପରାସ୍ତ କରି ବିଜୟୀ ହୋଇଛନ୍ତି । ଏଠାରେ ଉଲ୍ଲେଖଯୋଗ୍ୟ ଯେ ଚଳିତ ଥର ପ୍ରଥମ କରି ଆମ ଆଦମୀ ପାର୍ଟିର ପ୍ରାର୍ଥୀ ପଦ୍ମପୁର ବ୍ଲକରେ ପ୍ରତିଦ୍ୱନ୍ଦିତା କରି କଂଗ୍ରେସ ପ୍ରାର୍ଥୀଙ୍କୁ ପଛରେ ପକାଇ ୩ ନମ୍ବର ସ୍ଥାନରେ ରହିଛନ୍ତି ।
