ବାରିପଦା, (ଦେବସ୍ମିତ ଚୌଧୁରୀ) : ବିକଶିତ ଭାରତ ପାଇଁ ସହରାଞ୍ଚଳର ବିକାଶ ଯେମିତି ଏକ ଅବିଚ୍ଛେଦ୍ୟ ଅଙ୍ଗ, ଗଣତାନ୍ତ୍ରିକ ଶାସନ ପଦ୍ଧତିରେ ସ୍ୱାୟତ୍ତ ଶାସନ ବ୍ୟବସ୍ଥା ହେଉଛି କ୍ଷମତା ବିକେନ୍ଦ୍ରୀକରଣର ଏକ ଅଭିନ୍ନ ସୋପାନ ଏହି ଐତିହାସିକ ବ୍ୟବସ୍ଥାକୁ ସ୍ମରଣୀୟ ଓ ଲୋକାଭିମୁଖୀ କରିବା ତଥା ଆଗାମୀ ଦିନରେ ଏହାକୁ ଆହୁରି ସୁଦୃଢ କରିବା ସହିତ ବିଭିନ୍ନ କ୍ଷେତ୍ରରେ ବାରିପଦା ସହରାଞ୍ଚଳ ବିକାଶକୁ ତରାନ୍ୱିତ କରିବା ଲକ୍ଷ୍ୟ ନେଇ ଆଜି ବାରିପଦା ପୌରପାଳିକା ତରଫରୁ ନିଖିଳ ଭାରତ ସ୍ୱାୟତ୍ତ ଶାସନ ଦିବସ-୨୦୨୫ ମହାସମାରୋହରେ ପାଳିତ ହୋଇଯାଇଛି । ୩ ଦିନ ବ୍ୟାପି ପାଳନ ହେବାକୁଥିବା ଉତ୍ସବର ଉଦଘାଟନୀ ଦିବସରେ ଆଜି ପୌରପାଳିକା କାର୍ଯ୍ୟାଳୟ ପ୍ରାଙ୍ଗଣରେ ନଗରପାଳ କୃଷ୍ଣାନନ୍ଦ ମହାନ୍ତିଙ୍କ ପୌରହିତ୍ୟରେ ଆୟୋଜିତ ସଭାରେ ମୁଖ୍ୟ ଅତିଥି ଭାବେ ସମ୍ମାନୀୟ ଜିଲ୍ଲାପାଳ ହେମକାନ୍ତ ସୟ ଯୋଗ ଦେଇଥିବା ବେଳେ ସମ୍ମାନିତ ଅତିଥି ଭାବେ ଜିଲ୍ଲା ଆରକ୍ଷୀ ଅଧିକ୍ଷକ ବରୁଣ ଗୁଣ୍ଟୁପାଲ୍ଲୀ, ଜିଲ୍ଲାପରିଷଦ ମୁଖ୍ୟ ଉନ୍ନୟନ ଅଧିକାରୀ ଧର୍ମାନନ୍ଦ ବେହେରା, ପୌରପାଳିକା ଉପାଧ୍ୟକ୍ଷା ସୀମା ଦାସ ଓ କାର୍ଯ୍ୟ ନିର୍ବାହୀ ଅଧିକାରୀ ସପନ କୁମାର ସାହୁ ପ୍ରମୁଖ ଯୋଗ ଦେଇଥିଲେ । ପ୍ରାରମ୍ଭରେ ପୌରପାଳିକା ନଗରପାଳ କୃଷ୍ଣାନନ୍ଦ ମହାନ୍ତି ସ୍ୱାଗତ ଭାଷଣ ପ୍ରଦାନ କରିବା ସହ ଦିବସ ପାଳନ ଆଭିମୁଖ୍ୟ ସମ୍ପର୍କରେ ବକ୍ତବ୍ୟ ରଖିବା ସହ ବାରିପଦା ସହରରେ ହୋଇଥିବା ଉନ୍ନତି ମୂଳକ କାର୍ଯ୍ୟ ଏବଂ ଆଗକୁ ବାରିପଦା ସହରକୁ ଏକ ସୁସ୍ଥ, ସୁନ୍ଦର ଓ ସମୃଦ୍ଧ ସହର ଭାବେ ଗଢି ତୋଳିବା ନିମନ୍ତେ ହାତକୁ ନିଆଯାଇଥିବା ବିଭିନ୍ନ ଜନ କଲ୍ୟାଣକାରି ପ୍ରକଳ୍ପ ଗୁଡିକ ବିଷୟରେ ଅବଗତ କରିବା ସହ ଏଗୁଡିକ କାର୍ଯ୍ୟନ୍ଵୟନ୍ନ ପାଇଁ ସହରବାସୀଙ୍କ ସହଯୋଗ କାମନା କରିଥିଲେ । ଏହି ଅବସରରେ ମୁଖ୍ୟ ଅତିଥି ଶ୍ରୀ ସୟ ତା’ଙ୍କ ବକ୍ତବ୍ୟରେ କହିଥିଲେ ଯେ, ବାରିପଦା ସହରର ସ୍ୱଚ୍ଛତାକୁ ଆଖି ଦୃଶିଆ ଭାବେ ଉନ୍ନତି କରିବା ପାଇଁ ପଡିବ । ଭବିଷ୍ୟତରେ ସମସ୍ତଙ୍କ ସହଭାଗୀତାରେ ସହରକୁ ଆବର୍ଜନା ମୁକ୍ତ, ପ୍ଲାଷ୍ଟିକ ମୁକ୍ତ ଏବଂ ଜବରଦଖଲ ମୁକ୍ତ କରି ଟ୍ରାଫିକ ବ୍ୟବସ୍ଥାର ସୁନିୟନ୍ତ୍ରିତ ପାଇଁ ଉଦ୍ୟମ କରାଯିବ ଏବଂ ବାରିପଦା ସହରକୁ ଓଡିଶାର ଏକ ନମ୍ବର ସହର ଭାବେ କରିବା ପାଇଁ ସମସ୍ତଙ୍କ ସହଯୋଗ କାମନା କରିଥିଲେ । ମଂଚାସୀନ ଅନ୍ୟାନ୍ୟ ଅତିଥି ବୃନ୍ଦ ମଧ୍ୟ ଭାରତ ଭଳି ଏକ ବିଶାଳ ଗଣତନ୍ତ୍ର ରାଷ୍ଟ୍ରରେ ସୁଶାସନ ଉପଲବ୍ଧ ପାଇଁ ସ୍ୱାୟତ୍ତ ଶାସନ ବ୍ୟବସ୍ଥା ଜରିଆରେ କ୍ଷମତା ବିକେନ୍ଦ୍ରୀକରଣର ଭୂମିକା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବୋଲି ଉଲ୍ଲେଖ କରି ଆଗାମୀ ଦିନରେ ବାରିପଦା ସହରକୁ ଏକ ବିକଶିତ ସହର ଭାବେ ଗଢିବା ଉପରେ ମତାମତ ରଖିଥିଲେ । ଏହି ଅବସରରେ ନିମନ୍ତ୍ରିତ ଅତିଥି ବୃନ୍ଦ କିଛି ହିତାଧିକାରୀଙ୍କୁ ପ୍ରଧାନମନ୍ତ୍ରୀ ଆବାସ ଯୋଜନା କାର୍ଯ୍ୟାଦେଶ, ଭିନ୍ନକ୍ଷମ ବ୍ୟକ୍ତିଙ୍କୁ ହୁଇଲ ସାଇକେଲ ପ୍ରଦାନ କରିବା ସହିତ କୃତୀ ପ୍ରତିଯୋଗିଙ୍କୁ ପୁରସ୍କୃତ କରିଥିଲେ । ଏହି ଅବସରରେ ମୁଖ୍ୟ ଅତିଥି ବିଭିନ୍ନ ମହିଳା ସମିତି ଉଦ୍ୟୋଗୀଙ୍କ ଦ୍ୱାରା ଉତ୍ପାଦିତ ସାମଗ୍ରୀର ପ୍ରଦର୍ଶନୀକୁ ଉଦଘାଟନ କରି ବିଭିନ୍ନ ଷ୍ଟଲ ବୁଲି ଦେଖିଥିଲେ । ଆଜିର ଅନୁଷ୍ଠିତ କାର୍ଯ୍ୟକ୍ରମ ରେ ପୌରପାଳିକାର ସମସ୍ତ ପାରିଷଦ, ପଦାଧିକାରୀ, ଏସ ଏଚ ଜି ଗ୍ରୁପ ର ସଦସ୍ୟା, ସ୍ୱଚ୍ଛ ସାଥି ଓ ପୌର ପାଳିକାର ବିଭିନ୍ନ ବିଭାଗର କର୍ମକର୍ତ୍ତା ଉପସ୍ଥିତ ରହି କାର୍ଯ୍ୟକ୍ରମକୁ ସୁଚାରୁ ରୂପେ ପରିଚାଳନା କରିଥିଲେ । ପ୍ରକାଶ ଥାଉକି ବିଭିନ୍ନ ପ୍ରକାର କାର୍ଯ୍ୟକ୍ରମ ଜରିଆରେ ୩ ଦିନ ଧରି ଏହା ପାଳନ ହେବ ଏବଂ ସନ୍ଧ୍ୟାରେ ବିଭିନ୍ନ ପ୍ରକାର ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହେବ । ଉଦଯାପନୀ ଦିବସରେ ମାନ୍ୟବର ମନ୍ତ୍ରୀ, ଗୃହ ନିର୍ମାଣ ଓ ନଗର ଉନ୍ନୟନ, ସାଂସଦ ରାଜ୍ୟସଭା, ମାନ୍ୟବର ସାଂସଦ( ଲୋକସଭା) ମୟୂରଭଞ୍ଜ ଓ ମାନ୍ୟବର ବିଧାୟକ ବାରିପଦା ଯୋଗ ଦେବାର କାର୍ଯ୍ୟକ୍ରମ ରହିଛି ।