ବରଗଡ, (କେପିଏନ୍ଏସ୍) : ଟ୍ରାଫିକ ସମସ୍ୟାକୁ ନେଇ ବରଗଡ଼ ଧର୍ମଶାଳା ରାସ୍ତାରୋକ କଲେ ବରଗଡ଼ର ଯୁବକ ମାନେ । ବରଗଡ଼ ସହରର ଲେଙ୍ଗୁମିଶ୍ର ଛକରୁ ଜିରାବ୍ରିଜ ପର୍ଯ୍ୟନ୍ତ ଥିବା ଦୋକାନ ମାନଙ୍କ ସମ୍ମୁଖରେ ପ୍ରତିଦିନ ବେଆଇନ ପାର୍କିଙ୍ଗ କରାଯାଉଛି । ତେବେ ଜନସାଧାରଣ ବହୁ ସମସ୍ୟାର ସମ୍ମୁଖୀନ ହେବା ସହ ଦୁର୍ଘଟଣା ମଧ୍ୟ ଘଟୁଛି । ଜବର ଦଖଲ ଉଚ୍ଛେଦ ମଧ୍ୟ ଅଧାରେ ରହି ଯାଇଥିବା ବେଳେ ବର୍ତ୍ତମାନ ରାସ୍ତା କଡ଼ରେ ବେଆଇନ ପାର୍କିଙ୍ଗ ଯୋଗୁଁ ଜନସାଧାରଣ ଯିବା ଆସିବା ପାଇଁ ବହୁ ସମସ୍ୟାର ସମ୍ମୁଖୀନ ହେଉଛନ୍ତି । ତେବେ ଜିଲ୍ଲାପ୍ରଶାସନ ମଧ୍ୟ ଏ ଦିଗରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ ନ କରୁଥିବା ବେଳେ ଟ୍ରାଫିକ ପୋଲିସ ମଧ୍ୟ ଛକରେ ରହୁ ନ ଥିବା ଅଭିଯୋଗ ନେଇ ବରଗଡ଼ବାସୀ ରାସ୍ତାରୋକ କରିବା ସହ ବେଆଇନ ପାର୍କିଙ୍ଗ ବନ୍ଦ କରାଯାଉ ବୋଲି ଦାବି କରିଥିଲେ । ଘଟଣାସ୍ଥଳରେ ଟାଉନ ପୋଲିସ ପହଞ୍ଚି ବେଆଇନ ପାର୍କିଙ୍ଗ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ସହ ଗାଡି ମାନଙ୍କର ଚାଲାଣ କଟାଯିବ ବୋଲି ପ୍ରତିଶୃତି ଦେବା ପରେ ରାସ୍ତାରୋକ ହଟିଥିଲା । ଏହି ସମସ୍ୟାର ସମାଧାନ ନ ହେଲେ ଆଗାମୀ ଦିନରେ ଜୋରଦାର ଆନ୍ଦୋଳନ ହେବ ବୋଲି ଜନସାଧାରଣ ଚେତାବନୀ ଦେଇଛନ୍ତି ।