ପାଟଣାଗଡ, (ଗେରେଖନାଥ ବରିହା) : ପାଟଣାଗଡ ବ୍ଲକ ଲରମ୍ଭା ଠାରେ ବିଶ୍ୱ ପରିବେଶ ଦିବସ ଅବସରରେ ଏକ ସଚେତନତା କାର୍ଯ୍ୟକ୍ରମ “କୋସଲି ଡେରା” ପାଟଣାଗଡ ତରଫରୁ ଅନୁଷ୍ଠିତ ହୋଇଯାଇଛି । ଏହି କାର୍ଯ୍ୟକ୍ରମରେ ଲରମ୍ଭା ଥାନା ସବ ଇନିସପେକ୍ଟର ଅନନ୍ତ ପ୍ରଧାନ ମୁଖ୍ୟ ଅତିଥି ଭାବେ ଯୋଗ ଦେଇଥିବା ବେଳେ ଲରମ୍ଭା ବନଖଣ୍ଡର ଭାରପ୍ରାପ୍ତ ଫରେଷ୍ଟର ଶ୍ୟାମ ସୁନ୍ଦର ସାହୁ, ସୁନ୍ଦର ରାମ ସାଏ, ଲରମ୍ଭା ସରପଞ୍ଚ ଶଶିକାନ୍ତ ଡୁଡୁକା, ସମିତି ସଭ୍ୟ ପ୍ରବୋଧ କୁମାର ସାହୁ ସମ୍ମାନିତ ଅତିଥି ଭାବରେ ଯୋଗ ଦେଇଥିଲେ । ସଭାପତି ଭକ୍ତବନ୍ଧୁ ବିଶ୍ୱାଲଙ୍କ ସଭାପତିତ୍ୱରେ ପରିଚାଳିତ କାର୍ଯ୍ୟକ୍ରମରେ ମୁଖ୍ୟବକ୍ତା ଧଣ୍ଡାମୁଣ୍ଡା ଉପ୍ରା ବିଦ୍ୟାଳୟର ଶିକ୍ଷକ ଗୋପିନାଥ ସାହୁ ପରିବେଶ ସଂରକ୍ଷଣ ନିମନ୍ତେ ବୃକ୍ଷରୋପଣର ଆବଶ୍ୟକତା ସଂପର୍କରେ ଆଲୋଚନା କରିଥିଲେ । ପରିବେଶ ସଂରକ୍ଷଣ ନିମନ୍ତେ ଏବେଠୁଁ ଯତ୍ନବାନ ନ ହେଲେ ପୃଥିବୀ ବିପର୍ଯ୍ୟସ୍ତ ହେବ ବୋଲି ଅତିଥିମାନେ ମତପୋଷଣ କରିଥିଲେ । ପ୍ରକୃତି ବନ୍ଧୁ ପୁରସ୍କାର ପ୍ରାପ୍ତ କବି ତଥା ବୈଦ୍ୟରାଜ ସାନ୍ତନୁ କୁମାର ବୁଧିଆ ଆମ ଅଞ୍ଚଳରେ ମିଳୁଥିବା ଔଷଧିୟ ଗୁଳ୍ମମାନଙ୍କ ସଂପର୍କରେ ମତ ରଖିଥିଲେ । କବି ଶେଷଦେବ ପସାୟତ ପରିବେଶ ଉପରେ ଏକ ଶିକ୍ଷଣୀୟ କବିତା ଶୁଣାଇଥିଲେ । ଲରମ୍ଭା ତଥା ଆଖପାଖର ଅନେକ ଗ୍ରାମବାସୀ ଏଥିରେ ସାମିଲ ହୋଇଥିଲେ । ସଂପାଦକ ଲାଲଚନ ବଗର୍ତ୍ତୀ ଧନ୍ୟବାଦ ଅର୍ପଣ କରିଥିଲେ ।