- ସମ୍ମାନିତ ହେବେ ଲାଲା ବିରେନ ରାୟ ଓ ଅଶୋକ କର
ରାଉରକେଲା, (ସସ୍ମିତା ପ୍ରଧାନ) : ଆଗାମୀ ଦିନରେ ରାଉରକେଲାରେ ହେବାକୁ ଥିବା ସାଂସ୍କୃତିକ ମହୋତ୍ସବରେ ସମ୍ମାନିତ ହେବେ ଦୁଇ ରାଜ୍ୟସ୍ତରୀୟ ନାଟ୍ୟ ପ୍ରତିଭା ଲାଲା ବିରେନ ପ୍ରସାଦ ରାୟ ଓ ଅଶୋକ କୁମାର କର । ସାଂସ୍କୃତିକ ମହୋତ୍ସବ ପାଇଁ ପ୍ରସ୍ତୁତି ଜୋର୍ଦାର୍ ଚାଲିଛି । ରାଉରକେଲାର ଅନ୍ୟତମ ନାଟ୍ୟ ଓ ସାଂସ୍କୃତିକ ଅନୁଷ୍ଠାନ ‘କସ୍ତୁରୀ’ ପକ୍ଷରୁ ଚଳିତ ବର୍ଷର ସାଂସ୍କୃତିକ ମହୋତ୍ସବ-୨୦୨୨ରେ ପ୍ରତିବର୍ଷ ପରି ପ୍ରଦାନ କରାଯିବ ‘କସ୍ତୁରୀ ସମ୍ମାନ’ । ନାଟକ ପ୍ରତି ବିଶେଷ ଅବଦାନ ଥିବା ଦୁଇ ଜଣ ବିଶିଷ୍ଟ ବ୍ୟକ୍ତି ଲାଲା ବିରେନ ପ୍ରସାଦ ରାୟ ଓ ଅଶୋକ କୁମାର କରଙ୍କୁ ଏଥିପାଇଁ ମନୋନୀତ କରାଯାଇଛି । ଓଡିଶା ସଂଗୀତ ନାଟକ ଏକାଡ଼େମୀ ପୁରସ୍କାରପ୍ରାପ୍ତ ଶ୍ରୀ ରାୟ ଏକାଧାରରେ ଜଣେ ଦକ୍ଷ କଳାକାର, ନିର୍ଦ୍ଦେଶକ ଓ ମଞ୍ଚଶିଳ୍ପୀ । ଓଡିଶା ସଂସ୍କୃତି ବିଭାଗ ଆନୁକୂଲ୍ୟରେ ଓଡିଶାର ପ୍ରାୟ ପନ୍ଦରଟି ସ୍ଥାନ ସମେତ ସୁଦୂର ବାଙ୍ଗାଲୋରରେ ଶ୍ରୀ ରାୟଙ୍କ ଦ୍ୱାରା ନିର୍ଦ୍ଦେଶିତ ନାଟକ ‘ଆହେ ନୀଳ ଶୈଳ’ ସଫଳତାର ସହ ମଞ୍ଚସ୍ଥ ହୋଇଯାଇଛି । ଶ୍ରୀ କର ମଧ୍ୟ ଏକାଧାରରେ ଜଣେ ସୁଦକ୍ଷ କଳାକାର, ନିର୍ଦ୍ଦେଶକ, ନାଟ୍ୟକାର ଓ ମଞ୍ଚଶିଳ୍ପୀ ରୂପେ ସୁନାମ ଅର୍ଜନ କରିଛନ୍ତି, ଯାହାଙ୍କୁ ସ୍ୱୀକୃତି ସ୍ୱରୂପ ପ୍ରାୟ କୋଡିଏରୁ ଉର୍ଦ୍ଧ୍ବ ପୁରସ୍କାର ପ୍ରଦାନ କରାଯାଇଛି । ଏବେ ସମ୍ମାନ ପାଇଁ ମନୋନୀତ ପ୍ରତ୍ୟେକ ବ୍ୟକ୍ତିଙ୍କୁ ଏକ ତାମ୍ରଫଳକ ଓ ଉତ୍ତରୀୟ ସହ ନଗଦ ଦଶ ହଜାର ଟଙ୍କା ରାଶି ପ୍ରଦାନ କରାଯିବ ।
ଆସନ୍ତା ଡିସେମ୍ବର ମାସ ୧୫ ତାରିଖରୁ ୧୭ ତାରିଖ ପର୍ଯ୍ୟନ୍ତ ଅନୁଷ୍ଠିତ ହେବାକୁ ଥିବା ଏହି ମହୋତ୍ସବରେ ବିଭିନ୍ନ ସ୍ୱାଦର କାର୍ଯ୍ୟକ୍ରମ ପରିବେଷଣ କରାଯିବ । ଉଦ୍ଘାଟନୀ ରଜନୀରେ ଏକ ବିଷୟଭିତ୍ତିକ ସ୍ମରଣିକା ‘ମଣିଷ ଖୋଜୁଛି ମଣିଷ’ ଉନ୍ମୋଚିତ କରାଯିବା ସହ ଏକ ସାମାଜିକ ସଚେତନତା କାର୍ଯ୍ୟକ୍ରମ ‘ସତ କହିବାକୁ କିଆଁ ଡରିବି’ ରେ ତିନିଜଣ ଭିନ୍ନ ଭିନ୍ନ ଚରିତ୍ର ମଞ୍ଚରେ ନିଜ ଅନ୍ତର୍ନିହିତ ସତ୍ୟ ଉପସ୍ଥାପନ କରିବେ । ରାଧାକୃଷ୍ଣ ଦୃଷ୍ଟିହୀନ ବିଦ୍ୟାଳୟର ପ୍ରାୟ ପନ୍ଦର ଜଣ ଛାତ୍ରଛାତ୍ରୀଙ୍କ ଦ୍ୱାରା ପରିବେଷିତ ହେବ ନାଟକ ‘ମୋ ଆଖିର କେତେ କଥା’ । ପରିଶେଷରେ ରାଉରକେଲାର ମାରାଙ୍ଗବୁରୁ ସାଂସ୍କୃତିକ ଅନୁଷ୍ଠାନ ପକ୍ଷରୁ ନୃତ୍ୟନାଟିକା ‘ସୋହରୟ ପରବ୍ ଓ ଦନ୍ତା ନୃତ୍ୟ’ ପରିବେଷଣ କରାଯିବ ।
ଦ୍ୱିତୀୟ ରଜନୀରେ ଲିଖିତା ସେଠୀ ଓ ତାଙ୍କ ଦଳ ଦ୍ୱାରା ‘କଥକ ନୃତ୍ୟ’, ସ୍ୱତନ୍ତ୍ର ଭାବେ ସକ୍ଷମ ପିଲାମାନଙ୍କ ଅନୁଷ୍ଠାନ ‘ଶ୍ରଦ୍ଧା’ ଦ୍ୱାରା ନାଟକ ‘ଆମ ଭବିଷ୍ୟତ’ ଓ ଶେଷରେ ସରନା ନବ ଯୁବକ ସଂଘ ପକ୍ଷରୁ ଏକ ନାଟକ ‘ଲଜ୍ଜ୍ୟା’ ପରିବେଷଣ କରାଯିବ ।
ଉଦଯାପନୀ ସନ୍ଧ୍ୟାରେ ପ୍ରଯୋଜନାଭିତ୍ତିକ ନାଟ୍ୟ କର୍ମଶାଳାର ଛାତ୍ରଛାତ୍ରୀମାନେ ଡ. ସଂଜୟ ହାତୀଙ୍କ ଦ୍ୱାରା ଲିଖିତ ଓ ନିର୍ଦ୍ଦେଶିତ ନାଟକ ‘ଦୃଶ୍ୟମ୍’ ମଞ୍ଚସ୍ଥ କରିବେ । ଉଦୀୟମାନ କଳାକାରମାନଙ୍କୁ ଚିହ୍ନଟ କରି ପ୍ରାରମ୍ଭିକ ସ୍ତରରୁ ନାଟ୍ୟ କ୍ଷେତ୍ରରେ ସେମାନଙ୍କର ସର୍ବାଙ୍ଗୀନ ବିକାଶ ପାଇଁ ‘କସ୍ତୁରୀ’ ଏହାର ନିରବଚ୍ଛିନ୍ନ ପ୍ରୟାସ ଜାରି ରଖିଛି ଓ ରଖିବ । ସାନ୍ତାଳୀ ଭାଷାରେ ଆବାହନୀ ସଂଗୀତ ଗାନ ସହ ଉତ୍ସବକୁ ପ୍ରାରମ୍ଭ କରିବା ପାଇଁ କସ୍ତୁରୀ ପ୍ରସ୍ତୁତି ଜାରି ରଖିଛି ବୋଲି ସଂପାଦକ ରାଧାଶ୍ୟାମ ମହାନ୍ତି ଏକ ପ୍ରେସ୍ ବିବୃତିରେ ଜଣାଇଛନ୍ତି ।