ଲୋଇସିଂହା, (କେପିଏନ୍ଏସ୍) : ଲୋଇସିଂହା ବ୍ଲକ ଅନ୍ତର୍ଗତ ତଳିଉଡ଼ାର ପଞ୍ଚାୟତ ରାଜୀବ ସେବା କେନ୍ଦ୍ରରେ ଆଜୀବିକା କାର୍ଯ୍ୟକର୍ତ୍ତାଙ୍କ ଏକ ପ୍ରଶିକ୍ଷଣ ଆୟୋଜିତ ହୋଇଛି । ରିଲାଏନ୍ସ ଫାଉଣ୍ଡେସନ ଓ ସ୍ୱେଚ୍ଛାସେବୀ ସଂସ୍ଥା ସଂକଳ୍ପର ସହଯୋଗରେ ଅନୁଷ୍ଠିତ ଏହି ଶିବିରରେ ମହିଳା ସ୍ୱୟଂ ସହାୟିକା ଗୋଷ୍ଠୀ ମାନଙ୍କ ଜୀବିକା ଉପରେ ଆଲୋଚନା ହୋଇଥିଲା । ଛତୁଚାଷ, କୁକୁଡ଼ା ପାଳନ, ଧୂପକାଠୀ ତିଆରି, ମାଛଚାଷ ପାରି ଯୋଜନା ଉପରେ ପ୍ରଶିକ୍ଷଣ ଦିଆଯାଇଥିଲା । ଏଥିରେ ଲୋଇସିଂହା ବ୍ଲକ ଓଡ଼ିଶା ଜୀବିକା ମିଶନ ବ୍ଲକ ପ୍ରକଳ୍ପ ଅଧିକାରୀ ମଧୁସ୍ମିତା ବିଶ୍ଵାଳ ପ୍ରଶିକ୍ଷଣ ଦେଇଥିବା ବେଳେ ସରପଞ୍ଚ ଦିପାଞ୍ଜଳି ସାଏ, ସମିତି ସଭ୍ୟା ସୁଦେଷ୍ଣା ପଟେଲ ଓ ନାଏବ ସରପଞ୍ଚ ସୋମନାଥ ପଟେଲ ପ୍ରମୁଖ ଅତିଥି ଭାବେ ଯୋଗଦେଇ ଥିଲେ । କାର୍ଯ୍ୟକ୍ରମକୁ ରିଲାଏନ୍ସ ଫାଉଣ୍ଡେସନର ପିୟୁରାନୀ ମଲ୍ ସଂଯୋଜନା କରିଥିବା ବେଳେ ସଂକଳ୍ପ ଅନୁଷ୍ଠାନର ଅଶୋକ କୁମାର ପଣ୍ଡା ଓ ଶ୍ୟାମ ସୁନ୍ଦର ମେହେର ସହଯୋଗ କରିଥିଲେ ।