ବଲାଙ୍ଗିର, (କେପିଏନ୍ଏସ୍) : ସାଗରପାଲିଠାରେ ରାସ୍ତା କଡରେ ଅଟକି ଥିବା ଟ୍ରକ୍କୁ ପଛ ପଟୁ ପିଟିଛି ଏକ ଟ୍ରକ୍ । ଏଥିରେ ଟ୍ରକ୍ ଡ୍ରାଇଭର୍ ଗୁରୁତର ହୋଇ ପଡ଼ିଥିବା ବେଳେ ତାଙ୍କୁ ବଲାଙ୍ଗିର ଭୀମଭୋଇ ମେଡ଼ିକାଲ କଲେଜ ହସ୍ପିଟାଲ୍ରେ ଭର୍ତ୍ତି କରାଯାଇଥିବା ଜଣାପଡ଼ିଛି । ସୂଚନାରୁ ପ୍ରକାଶ ଯେ, ଗତକାଲି ବିଳମ୍ବିତ ରାତିରେ ଏକ କୋଇଲା ବୋଝେଇ ଟ୍ରକ ତାଲଚେରରୁ ରାୟଗଡା ଅଭିମୁଖେ ଯାଉଥିଲା । ତେବେ ରାତି ପ୍ରାୟ ୨ଟା ସମୟରେ ବଲାଙ୍ଗିର ଜିଲ୍ଲା ଦେଓଗାଁ ବ୍ଲକ ସାଗରପାଲି ନିକଟରେ ରାସ୍ତା କଡ଼ରେ ଛିଡା ହୋଇଥିବା ଏକ ଟ୍ରକକୁ ଏହି କୋଇଲା ବୋଝେଇ ଟ୍ରକଟି ଜୋର୍ରେ ଧକ୍କା ଦେଇଥିଲା । ଦୁର୍ଘଟଣା ଘଟାଇ ଥିବା ଟ୍ରକ୍ ଡ୍ରାଇଭର୍ଙ୍କ ନାମ ବିଭୀଷଣ ଦେହୁରୀ ବୟସ ୪୨ ହୋଇଥିବା ବେଳେ ସେ ବୌଦ୍ଧ ଜିଲ୍ଲା ଭାଲଟି ଗାଁର ନିବାସୀ ବୋଲି ଜଣାପଡ଼ିଛି । ଘଟଣାସ୍ଥଳରେ ବଲାଙ୍ଗିର ଅଗ୍ନିଶମ ବିଭାଗ ପହଂଚି ଡ୍ରାଇଭର୍ଙ୍କୁ ଉଦ୍ଧାର କରିବା ସହ ବଲାଙ୍ଗିର ଭୀମ ଭୋଇ ମେଡ଼ିକାଲ କଲେଜ ଓ ହସ୍ପିଟାଲର ସର୍ଜରୀ ୱାର୍ଡରେ ଭର୍ତ୍ତି କରିଥିଲା । ଡ୍ରାଇଭର୍ ବିଭୀଷଣଙ୍କ ଡାହାଣ ଗୋଡ କଟିବା ସହ ମୁଣ୍ଡରେ ଗଭୀର ଆଘାତ ଲାଗିଛି । ସେ ବଲାଙ୍ଗିର ଅସ୍ଥିଶଲ୍ୟ ବିଭାଗରେ ଭର୍ତ୍ତି ହୋଇ ଚିକିତ୍ସାଧୀନ ଥିବା କୁହାଯାଇଛି ।