- ଦେଓଗାଁରେ ରହିବ ସମ୍ବଲପୁର-ରାୟଗଡ଼ା ଏକ୍ସପ୍ରେସ
- ପରୀକ୍ଷାମୂଳକ ଭାବେ ରହଣୀ, ଟିକଟ ବୁକିଙ୍ଗ ଉପରେ ଧ୍ୟାନ
ଦେଓଗାଁ, (ମନୀଷ କୁମାର ସାହୁ) : ଦୀର୍ଘ ବର୍ଷର ଦାବୀ, ଆନ୍ଦୋଳନ ଓ ଅପେକ୍ଷା ପରେ ଦେଓଗାଁ ରେଳଷ୍ଟେସନରେ କିଛିଦିନ ମଧ୍ୟରେ ଏକ ଏକ୍ସପ୍ରେସ ଟ୍ରେନ ରହିବା ବୋଲି ଜଣାପଡ଼ିଛି । ଶୁକ୍ରବାର ଦିନ ଭାରତ ସରକାରଙ୍କ ରେଲୱେ ମନ୍ତ୍ରଣାଳୟ ରେଲୱେ ବୋର୍ଡ଼ର ସଂଯୁକ୍ତ ନିର୍ଦ୍ଦେଶକ ବିବେକ ସିହ୍ନା ଦେଇଥିବା ସୂଚନା ଅନୁସାରେ ସମ୍ବଲପୁର ରାୟଗଡ଼ା ଏକ୍ସପ୍ରେସ (୧୮୩୦୧ ଓ ୧୮୩୦୨) କିଛିଦିନ ମଧ୍ୟରେ ଦେଓଗାଁ ଷ୍ଟେସନରେ ପରୀକ୍ଷାମୂଳକ ଭାବେ ରହଣି କରିବା ନେଇ ସୂଚନା ମିଳିଛି । ଏହାସହ ଷ୍ଟେସନରେ କେତେ ସଂଖ୍ୟାରେ ଟିକେଟ ବୁକିଙ୍ଗ ହେଉଛି, ସେ ଉପରେ ମଧ୍ୟ ଗୁରୁତ୍ୱ ଦିଆଯିବ ବୋଲି ସରକାରୀ ଚିଠିରୁ ଜଣାପଡ଼ିଛି । ପ୍ରକାଶ ଯୋଗ୍ୟ ଯେ, ଗତ ୨୦୧୮ ଅଗଷ୍ଟ ୩ରେ ସକାଳରୁ ଦେଓଗାଁ ଓ ଗୁଡ଼ଭେଲା ବ୍ଲକର ହଜାର ହଜାର ଲୋକ ଦେଓଗାଁ ଷ୍ଟେସନରେ ଏକ୍ସପ୍ରେସ ଟ୍ରେନ ରହଣି ଦାବୀ ନେଇ ଦୀର୍ଘ ସମୟ ରାସ୍ତା ରୋକ କରିଥିଲେ । ସେହିଦିନ ୧ଟା ପରେ ରେଳ ବିଭାଗ ପକ୍ଷରୁ ଅତିରିକ୍ତ ଆଞ୍ଚଳିକ ଯନ୍ତ୍ରୀ ଆସି ମାତ୍ର ୭ଦିନ ଭିତରେ ୧୮୩୦୧/ ୧୮୩୦୨ତପସ୍ୱିନୀ ଏକ୍ସପ୍ରେସ ରହିବ ବୋଲି ପ୍ରତିଶୃତି ଦେଇଥିବା ବେଳେ ଅନ୍ୟତ୍ତମ ଦାବି ପୁରୀ ଦୁର୍ଗ ଏକ୍ସପ୍ରେସ ରହଣି ପାଇଁ ଡିଆରଏମ ଉପରିସ୍ଥ ଅଧିକାରୀଙ୍କ ସହ ଆଲୋଚନା ପରେ ଜଣାଇବେ ବୋଲି କହିବାରୁ ଆନ୍ଦୋଳନ ବନ୍ଦ ହୋଇଥିଲା । ସେହି ପ୍ରତିଶୃତି ରେଳ ବିଭାଗର ମନେ ନ ପଡ଼ିବାରୁ ପୁଣି ୧୭।୨।୧୯ରୁ ଦୁଇ ଦିନ ଅର୍ଥାତ ୧୯ପର୍ଯ୍ୟନ୍ତ ଷ୍ଟେସନ ସାମ୍ନାରେ ଧାରଣା ଦେବା ପରେ ୨୦ତାରିଖ ଦିନ ରେଲରୋକ ହୋଇଥିଲା । ପୂର୍ବପରି ସେହିଦିନ ଦେଓଗାଁ, ଗୁଡ଼ଭେଲା ଓ ସଇଁନ୍ତଳା ଅଞ୍ଚଳରୁ ଶତାଧିକ ବରିଷ୍ଠ ନାଗରିକ ଓ ବୁଦ୍ଦିଜବୀ ସାମିଲ ହୋଇ ଏକ୍ସପ୍ରେସ ଟ୍ରେନ ନ ରହିବା ପର୍ଯ୍ୟନ୍ତ ରାସ୍ତା ରୋକ ଆନ୍ଦୋଳନ ବନ୍ଦ କରାଯିବ ନାହିଁ ବୋଲି ଜିଦ ଧରିଥିଲେ । ସେହିଦିନ ମଧ୍ୟ ଏସିଏମ ଅର୍ଥାତ ଅତିରିକ୍ତ ବାଣିଜ୍ୟ ପରିଚାଳକ ଓ ବାଣିଜ୍ୟ ନିରୀକ୍ଷକ ଆସି ପୁଣି ୭ଦିନ ମଧ୍ୟରେ ଏକ୍ସପ୍ରେସ ଟ୍ରେନ ରହିବ ବୋଲି ପ୍ରତିଶୃତି ଦେଇ ଯାଇଥିଲେ । ୭ଦିନର ପ୍ରତିଶ୍ରୁତି ଦେବାର ୭ବର୍ଷ ପରେ ଏକମାତ୍ର ଏକ୍ସପ୍ରେସ ପରୀକ୍ଷାମୂଳକ ଭାବେ ରହଣୀ କରାଯିବାକୁ ନେଇ ଏକ ଚିଠି ଆସିଥିବାରୁ ଅଞ୍ଚଳରେ ଅସନ୍ତୋଷ ପ୍ରକାଶ ପାଇଛି । ଅନ୍ୟପକ୍ଷରେ ଗତ ଦୁଇ ଦଶନ୍ଧି ଧରି ଦେଓଗାଁ ଅଞ୍ଚଳବାସୀ ଏକ୍ସପ୍ରେସ ଟ୍ରେନ୍ ରହଣି ପାଇଁ ଦାବିକରି ଆସୁଥିଲେ । ହେଲେ ରେଳ ବିଭାଗ ଏବେ ଦେଓଗାଁ ଷ୍ଟେସନରେ ସମ୍ବଲପୁର-ରାୟଗଡା ଏକ୍ସପ୍ରେସ ଅଟକିବ ବୋଲି ନିଷ୍ପତି ନେଇଥିବାରୁ ଏହାକୁ ଦେଓଗାଁ ବାସିନ୍ଦା ବିରୋଧ କରୁଛନ୍ତି । ୟୁଥ୍ ଏକ୍ସନ କମିଟିର ଡାକରାରେ ଶୁକ୍ରବାର ସନ୍ଧ୍ୟାରେ ଦେଓଗାଁ ଦୁର୍ଗା ମଣ୍ଡପରେ ବରିଷ୍ଠ ନାଗରିକ ଗୋପାଳ ଅଗ୍ରୱାଲଙ୍କ ସଭାପତିତ୍ୱରେ ଏକ ବୈଠକ ଅନୁଷ୍ଠିତ ହୋଇଥିଲା । ଏଥିରେ ଦେଓଗାଁର ରାଜନେତା, ବୁଦ୍ଧିଜୀବୀ, ଶିକ୍ଷାବିତ ସାମିଲ ହୋଇ ନିଜର ମତ ପ୍ରକାଶ କରି ଏହି ଟ୍ରେନ ଅଟକିଲେ ବିରୋଧ କରାଯିବ ବୋଲି ନିଷ୍ପତ୍ତ ନେଇଛନ୍ତି । ଦେଓଗାଁରେ ଇସ୍ପାତ୍ ଓ ପୁରୀ- ଦୁର୍ଗ ନଅଟକିଲେ ମାର୍ଚ୍ଚ ମାସ ଶେଷରେ ଏକ ବଡ଼ ଧରଣର ରେଳ ରୋକ କରାଯିବ ବୋଲି ନିଷ୍ପତି ନିଆଯାଇଥିଲା । ଶେଷରେ ୟୁଥ୍ ଏକ୍ସନ୍ କମିଟି ସଭାପତି ଶବକ ବାରିକ ଧନ୍ୟବାଦ ଦେଇଥିଲେ ।