ବ୍ରହ୍ମପୁର, (କେ. ସତ୍ୟନାରାୟଣ ରେଡ୍ଡୀ) : ଗଞ୍ଜାମ ଜିଲ୍ଲାର ସଦର ମହକୁମ୍ମା ଛତ୍ରପୁର ସହରରେ ଥିବା ସମବାୟ ବ୍ୟାଙ୍କର ଅବସରପ୍ରାପ୍ତ ଅଧିକାରୀ ତଥା ସମାଜସେବୀ ଭାସ୍କର ଆଚାର୍ଯ୍ୟ (୭୨)ଙ୍କ ଶୁକ୍ରବାର ମଧ୍ୟରାତ୍ରିରେ ପରଲୋକ ଘଟିଛି । ଶନିବାର ପୂର୍ବାହ୍ନରେ ପାଲିଆ ଛତ୍ରପୁର ଶ୍ମଶାନରେ ତାହାଙ୍କ ଅନ୍ତେଷ୍ଟି କ୍ରିୟା ସମ୍ପନ୍ନ ହୋଇଛି । ସ୍ୱର୍ଗତ ଆଚାର୍ଯ୍ୟ ସ୍ଥାନୀୟ ଅଞ୍ଚଳର ଜଣେ ଜଣାଶୁଣା ସମାଜସେବୀ ଭାବରେ ବେଶ ପରିଚିତ ଥିଲେ । ଛତ୍ରପୁର ସହରରେ ଆୟୋଜିତ ହୋଇଆସୁଥିବା ଅନେକ ମଞ୍ଚକଳା ନାଟକରେ ସେ ଅଭିନୟ ମଧ୍ୟ କରିଆସିଥିଲେ । ଛତ୍ରପୁର ସହରରେ ପ୍ରତିଷ୍ଠିତ ରିକାପଲ୍ଲୀ ଗ୍ରାମ୍ୟ ଉନ୍ନୟନ କମିଟୀର ଜଣେ ସକ୍ରୀୟ ସଦସ୍ୟ ଥିଲେ । ଛତ୍ରପୁର ସହରର ରିକାପଲ୍ଲୀ ଅଞ୍ଚଳରେ ଆୟୋଜିତ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ, ଯାତ୍ରା, ପର୍ବପର୍ବାଣୀରେ ସେ ସକ୍ରୀୟ ଅଂଶଗ୍ରହଣ କରିବା ଓ ପରିଚାଳନା ଦାୟିତ୍ଵରେ ରହିଆସିବା ଆଦି ସଧାରଣ କଥା ଥିଲା । ସେ ଜଣେ ବନ୍ଧୁ ବତ୍ସଳ ଓ ମେଳାପି ଥିଲେ । ତାହାଙ୍କ ବିୟୋଗରେ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି ।