ପ୍ରସିଦ୍ଧ ଶୈବପୀଠ ହରିଶଙ୍କରର ମହାଦେବଙ୍କଠୁ ୨୦୨୪ ନିର୍ବାଚନରେ ସଫଳତା ପାଇଁ ଆଶୀର୍ବାଦ ନେଲେ ଭି. କେ. ପାଣ୍ଡିଆନ
ଖପ୍ରାଖୋଲ, (ଅଶୋକ କୁମାର ବାଗ) : ବିଜେଡିର ଷ୍ଟାର୍ ପ୍ରଚାରକ ୫-ଟି ଅଧ୍ୟକ୍ଷ ଭି. କେ. ପାଣ୍ଡିଆନ ୨ ଦିନିଆ ବଲାଙ୍ଗିର ଗସ୍ତରେ ଆସି ଆଜି ପଶ୍ଚିମ ଓଡିଶାର ପ୍ରସିଦ୍ଧ ଶୈବପୀଠ ହରିଶଙ୍କରଠାରେ ଅପରାହ୍ନ ୨ଟା ସମୟରେ ପହଞ୍ଚି ଥିଲେ । ହରିଶଙ୍କର ମନ୍ଦିର ପରିଦର୍ଶନ ସହ ଦେବାଧି ଦେବ ମହାଦେବଙ୍କ ପୂଜାର୍ଚ୍ଚନା କରି ୨୦୨୪ ନିର୍ବାଚନରେ ସଫଳତା ପାଇଁ ଭଗବାନଙ୍କ ଆଶୀର୍ବାଦ ନେଇଥିଲେ । ଏହି ଅବସରରେ ହରିଶଙ୍କର ସ୍ଥିତ ପାନ୍ଥନିବାସରେ ମିଶନ ଶକ୍ତି ମହିଳାମାନଙ୍କ ପକ୍ଷରୁ ଶ୍ରୀ ପାଣ୍ଡିଆନଙ୍କୁ ସ୍ୱାଗତ ସମ୍ବର୍ଦ୍ଧନା ପ୍ରଦାନ କରାଯାଇଥିଲା । ଏହି ସମୟରେ ପାଟଣାଗଡ଼ ନିର୍ବାଚନ ମଣ୍ଡଳୀର ବିଜେଡି ବିଧାୟକ ପ୍ରାର୍ଥୀ ସରୋଜ ମେହେର ଏବଂ ବିଜେଡି କର୍ମୀମାନେ ଉପସ୍ଥିତ ରହି ଶ୍ରୀ ପାଣ୍ଡିଆନଙ୍କୁ ସାକ୍ଷାତ କରିବା ସହ ପାଟଣାଗଡ଼ କ୍ଷେତ୍ରର ରାଜନୈତିକ ସ୍ଥିତି ନେଇ ଆଲୋଚନା କରିଥିଲେ । ପରେ ମିଶନ ଶକ୍ତି ମହିଳାମାନଙ୍କ ଦ୍ୱାରା ପରିଚାଳିତ ମିଶନ ଶକ୍ତି କାଫେରେ ମଧ୍ୟାହ୍ନ ଭୋଜନ କରି ପାଟଣାଗଡ଼ ନିକଟସ୍ଥ ଗଙ୍ଗାସାଗର ଠାରେ ଥିବା ନିର୍ବାଚନୀ ସଭାରେ ଯୋଗଦେବା ପାଇଁ ପ୍ରସ୍ଥାନ କରିଥିଲେ ଶ୍ରୀ ପାଣ୍ଡିଆନ । ସୁରକ୍ଷା ଦୃଷ୍ଟିରୁ ୮ ପ୍ଲାଟୁନ୍ ପୋଲିସ ଫୋର୍ସ ମୁତୟନ ଥିଲେ ।