ଡେଲାଙ୍ଗ, (ଦିଲ୍ଲୀପ କୁମାର ଧାଉଡିଆ) : ଭାରତୀୟ ଖାଦ୍ୟର ବିବିଧତାରେ, ଓଡ଼ିଶା ଏହାର ସମୃଦ୍ଧ ରାନ୍ଧଣା ଐତିହ୍ୟ ପାଇଁ ସ୍ୱତନ୍ତ୍ର । ଏହି ପୂର୍ବାଞ୍ଚଳ ରାଜ୍ୟ ଯେଉଁ ଅନେକ ସ୍ୱାଦିଷ୍ଟ ଖାଦ୍ୟ ପାଇଁ ଗର୍ବ କରେ, ସେଥିମଧ୍ୟରୁ “ପଖାଳ” ହେଉଛି ଏକ ଉଜ୍ଜ୍ୱଳ ତାରା । ଓଡ଼ିଆ ଅସ୍ମିତା ଓ ଓଡ଼ିଆ ଖାଦ୍ୟ ପରମ୍ପରାର ଏକ ବୈଶ୍ୱିକ ରୂପ ‘ବିଶ୍ୱ ପଖାଳ ଦିବସ’ । ଆହା ଜୀବନ ଧନ ମୋ ପଖାଳ କଂସା’ ସ୍ୱରୂପ ବିଶ୍ୱ ପଖାଳ ଦିବସ -୨୦୨୫ ମହା ସମାରୋହରେ ବିଜୟ ମଣ୍ଡପ, ରାମଚନ୍ଦ୍ରପୁର, ଡେଲାଙ୍ଗ ଠାରେ ନିଖିଳ ଓଡିଶା ଉପଭୋକ୍ତ ସୁରକ୍ଷା ମହାସଂଘ ଏହି ଦିବସଟି ଗୁରୁବାର ପାଳନ କରିଛି । କୃଷକ ନେତା ତଥା ପ୍ରାକ୍ତନ ଜିଲ୍ଲାପରିଷଦ ସଦସ୍ୟ ଅଶୋକ ପ୍ରଧାନଙ୍କ ଅଧ୍ୟକ୍ଷତା ଅନୁଷ୍ଠିତ ଏହି ପଖାଳ ସଭାରେ ମୁଖ୍ୟଅତିଥି ଭାବେ ପୁରୀ -ନିମାପଡା କେନ୍ଦ୍ର ସମବାୟ ବ୍ୟାଙ୍କ ଜିଲ୍ଲା ସଭାପତି କିଶୋର ଚନ୍ଦ୍ର ଛୋଟରାୟ, ସମ୍ମାନିତ ଅତିଥି ରୂପେ ନାରୀ ନେତ୍ରୀ ନିରୁପମା ପାତ୍ର, ବରିଷ୍ଠ ସାମ୍ବାଦିକ ତଥା ମହାସଂଘର ଉପଦେଷ୍ଟା । ପ୍ରସନ୍ନ ତ୍ରିପାଠୀ, ଯୁବ ସଂଗଠକ ବିଶ୍ୱରଞ୍ଜନ ବଳବନ୍ତରାୟ, ପ୍ରକାଶ ଧଳ, ଆର୍ତ୍ତବନ୍ଧୁ ସାମନ୍ତରାୟ, ପ୍ରକାଶ ଚନ୍ଦ୍ର ସାମଲ, ବିରଜା ପ୍ରସାଦ ପଟ୍ଟନାୟକ ପ୍ରମୁଖ ଯୋଗ ଦେଇଥିଲେ । ଉପଭୋକ୍ତା ମହାସଂଘର ରାଜ୍ୟ ସଭାପତି ଚିତ୍ରସେନ ନିଶଙ୍କ ସ୍ୱାଗତ ଭାଷଣ ଦେବା ସହ ଅତିଥି ପରିଚୟ ପ୍ରଦାନ କରିଥିବେଳେ ମହାସଂଘର ସମ୍ପାଦକ ପ୍ରଦୀପ କୁମାର ନାୟକ ମଞ୍ଚ ପରିଚାଳନା କରିଥିଲେ । ଭୃଷଙ୍ଗାପତ୍ର, ଦହି, ଛୁଙ୍କା, ପଖାଳ ସହ ପାରମ୍ପରିକ ବଡ଼ିଚୁରା, କୋଶଳା ଶାଗ ରାଇ , ଆଳୁ, ବାଇଗଣ ଭର୍ତା, ଭେଣ୍ଡି ଭଜା, ସଜନା ଛୁଇଁ ଭଜା , ଆଳୁ, କଲରା ଭଜା, ଚଟଣୀ ଖଟା, ସୋରା ସୋରା କାକୁଡ଼ି, ପିଆଜ ସହ ମିଟିକାଳି, ଚିଙ୍ଗୁଡ଼ିର କଡ଼ା ଭଜାର ମହକରେ ପଖାଳ ଦିବସଟି ମହକି ଗଲା ବେଳେ ତୋରାଣି,ଛଣା.ପରିବେଶକୁ ଓଡ଼ିଆ ଭାବରେ ଉଷ୍ଣ କରିଥିଲା । କାର୍ଯ୍ୟକ୍ରମର ଅନ୍ୟତମ ଆକର୍ଷଣ ଥିଲା ପଖାଳକୁ ନେଇ ଅତିଥିମାନଙ୍କ ଚର୍ଚ୍ଚା । କାର୍ଯ୍ୟକ୍ରମଟି ଅଞ୍ଚଳବାସୀଙ୍କ ପାଇଁ ପ୍ରେରଣାପ୍ରଦ ଓ ଦୃଷ୍ଟାନ୍ତମୂଳକ ହେବ ବୋଲି ଅତିଥିମାନେ ମତାମତ ରଖିଥିଲେ ।ଏଥିରେ ଦୁଇ ଶହରୁ ଉର୍ଦ୍ଧ୍ୱ ମହାସଂଘର ବିଭିନ୍ନ ଜିଲ୍ଲାର କର୍ମକର୍ତ୍ତା, ଗଣ ମାଧ୍ୟମ ପ୍ରତିନିଧି, ବୁଦ୍ଧିଜିଵୀ, ସମାଜସେବୀ, କୃଷକ, ଉପଭୋକ୍ତା ମାନେ ସାମିଲି ହୋଇ ଆନନ୍ଦ ଉଲ୍ଲାସର ସହ ପଖାଳ ଦିବସ ପାଳନ କରିଥିଲେ । ଶେଷରେ ଶିକ୍ଷକ ଅଭୟ ଚରଣ ସାହୁ ଧନ୍ୟବାଦ ଅର୍ପଣ କରିଥିଲେ ।