ନୂଆଦିଲ୍ଲୀ, (ପିଆଇବି) : ଆଜି ୫୧ ହଜାରରୁ ଅଧିକ ଯୁବକ ଯୁବତୀଙ୍କୁ ନିଯୁକ୍ତି ପତ୍ର ପ୍ରଦାନ କରାଯାଇଛି ।ଏପରି ରୋଜଗାର ମେଳା ମାଧ୍ୟମରେ ଲକ୍ଷ ଲକ୍ଷ ଯୁବକଯୁବତୀ ସରକାରୀ ସ୍ତରରେ ସ୍ଥାୟୀ ଚାକିରି ପାଇଛନ୍ତି । ଏବେ ଏହି ଯୁବକଯୁବତୀମାନେ ରାଷ୍ଟ୍ର ନିର୍ମାଣରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରୁଛନ୍ତି : ପ୍ରଧାନମନ୍ତ୍ରୀ ଆଜି ବିଶ୍ୱ ବିଶ୍ୱାସ କରେ ଯେ ଭାରତରେ ଦୁଇଟି ଅସୀମିତ ଶକ୍ତି ଅଛି, ଗୋଟିଏ ହେଉଛି ଜନସଂଖ୍ୟା, ଅନ୍ୟଟି ହେଉଛି ଗଣତନ୍ତ୍ର । ଅନ୍ୟ ଅର୍ଥରେ, ସର୍ବାଧିକ ଯୁବ ଜନସଂଖ୍ୟା ଏବଂ ବୃହତ୍ତମ ଗଣତନ୍ତ୍ର : ପ୍ରଧାନମନ୍ତ୍ରୀ ଆଜି, ଦେଶରେ ସୃଷ୍ଟି ହେଉଥିବା ଷ୍ଟାର୍ଟଅପ୍, ଗବେଷଣା ଓ ଉଦ୍ଭାବନ ଇକୋସିଷ୍ଟମ ଦେଶର ଯୁବପିଢ଼ିଙ୍କ କ୍ଷମତାକୁ ବୃଦ୍ଧି କରୁଛି: ପ୍ରଧାନମନ୍ତ୍ରୀ ନିକଟରେ ଅନୁମୋଦିତ ନୂତନ ଯୋଜନା – ଏମ୍ପ୍ଲୋୟମେଣ୍ଟ ଲିଙ୍କଡ୍ ଇନସେଣ୍ଟିଭ୍ ସ୍କିମ୍ (ନିଯୁକ୍ତି ସଂପର୍କିତ ପ୍ରେତ୍ସାହନ ଯୋଜନା) ସହିତ, ସରକାର ଘରୋଇ କ୍ଷେତ୍ରରେ ନୂତନ ନିଯୁକ୍ତି ସୁଯୋଗ ସୃଷ୍ଟି ଉପରେ ମଧ୍ୟ ଧ୍ୟାନ ଦେଉଛନ୍ତି: ପ୍ରଧାନମନ୍ତ୍ରୀ ଆଜି, ଭାରତର ସବୁଠାରୁ ବଡ଼ ଶକ୍ତି ମଧ୍ୟରୁ ଗୋଟିଏ ହେଉଛି ଆମର ଉତ୍ପାଦନ କ୍ଷେତ୍ର । ଏହି କ୍ଷେତ୍ର ବହୁ ସଂଖ୍ୟକ ନୂତନ ନିଯୁକ୍ତି ସୃଷ୍ଟି କରୁଛି: ପ୍ରଧାନମନ୍ତ୍ରୀ ଉତ୍ପାଦନ କ୍ଷେତ୍ରକୁ ପ୍ରୋତ୍ସାହିତ କରିବା ପାଇଁ ଚଳିତ ବର୍ଷର ବଜେଟରେ ମିଶନ ମାନୁଫାକଚରିଂ ଘୋଷଣା କରାଯାଇଛି: ପ୍ରଧାନମନ୍ତ୍ରୀ ଅନ୍ତର୍ଜାତୀୟ ଶ୍ରମ ସଂଗଠନ( ଆଇଏଲଓ)ର ଏକ ରିପୋର୍ଟ ଦର୍ଶାଉଛି ଯେ ଗତ ଦଶନ୍ଧି ମଧ୍ୟରେ ଭାରତର ୯୦ କୋଟିରୁ ଅଧିକ ନାଗରିକଙ୍କୁ କଲ୍ୟାଣକାରୀ ଯୋଜନାର ପରିସରକୁ ଅଣାଯାଇଛି: ପ୍ରଧାନମନ୍ତ୍ରୀ ଆଜି ବିଶ୍ୱ ବ୍ୟାଙ୍କ ଭଳି ପ୍ରମୁଖ ବିଶ୍ୱ ପ୍ରତିଷ୍ଠାନଗୁଡ଼ିକ ଭାରତକୁ ପ୍ରଶଂସା କରୁଛନ୍ତି, ଭାରତ ବିଶ୍ୱର ଉତ୍ତମ ସମାନତା ଥିବା ଦେଶମାନଙ୍କ ମଧ୍ୟରେ ସ୍ଥାନିତ ହେଉଛି: ପ୍ରଧାନମନ୍ତ୍ରୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ଭିଡିଓ କନଫରେନ୍ସିଂ ମାଧ୍ୟମରେ ରୋଜଗାର ମେଳାକୁ ସମ୍ବୋଧିତ କରିଥିଲେ ଏବଂ ବିଭିନ୍ନ ସରକାରୀ ବିଭାଗ ଏବଂ ସଂଗଠନରେ ୫୧୦୦୦ରୁ ଅଧିକ ନବନିଯୁକ୍ତ ଯୁବକ ଯୁବତୀଙ୍କୁ ନିଯୁକ୍ତି ପତ୍ର ବଣ୍ଟନ କରିଥିଲେ । ଏହି ସମାବେଶକୁ ସମ୍ବୋଧିତ କରି ସେ ଗୁରୁତ୍ୱାରୋପ କରିଥିଲେ ଯେ ଆଜି ଭାରତ ସରକାରଙ୍କ ବିଭିନ୍ନ ବିଭାଗରେ ଏହି ଯୁବକଯୁବତୀମାନଙ୍କ ପାଇଁ ନୂତନ ଦାୟିତ୍ୱ ଆରମ୍ଭ ହେବାର ଦିନ । ସେ ବିଭିନ୍ନ ବିଭାଗରେ ସେବାରେ ଯୋଗ ଦେଇଥିବା ଯୁବକଯୁବତୀମାନଙ୍କୁ ଅଭିନନ୍ଦନ ଜଣାଇଥିଲେ ଏବଂ ଗୁରୁତ୍ୱାରୋପ କରିଥିଲେ ଯେ ସେମାନଙ୍କର ଭିନ୍ନ ଭୂମିକା ସତ୍ତ୍ୱେ, ସେମାନଙ୍କର ସାଧାରଣ ଲକ୍ଷ୍ୟ ହେଉଛି “ନାଗରିକ ପ୍ରଥମ” ନୀତି ଉପରେ ଆଧାରିତ ଦେଶ ସେବା କରିବା । ପ୍ରଧାନମନ୍ତ୍ରୀ ଭାରତର ଜନସଂଖ୍ୟାଗତ ଏବଂ ଗଣତାନ୍ତ୍ରିକ ଭିତ୍ତିଭୂମିର ଅତୁଳନୀୟ ଶକ୍ତି ଉପରେ ଆଲୋକପାତ କରିଥିଲେ । ସେ ଗୁରୁତ୍ୱାରୋପ କରିଥିଲେ ଯେ ବିଶ୍ୱର ସର୍ବାଧିକ ଯୁବ ଜନସଂଖ୍ୟା ଏବଂ ସର୍ବବୃହତ ଗଣତନ୍ତ୍ର ସହିତ, ଭାରତରେ ଘରୋଇ ଏବଂ ବିଶ୍ୱ ସ୍ତରରେ ଭବିଷ୍ୟତକୁ ଗଢ଼ିବାର ଅନନ୍ୟ ସମ୍ଭାବନା ରହିଛି । ପ୍ରଧାନମନ୍ତ୍ରୀ କହିଥିଲେ ଯେ ଏହି ବିଶାଳ ଯୁବ ବାହିନୀ ଭାରତର ସର୍ବୋତ୍ତମ ସମ୍ପତ୍ତି ଏବଂ ସରକାର ଏହି ପୁଞ୍ଜିକୁ ଦୀର୍ଘକାଳୀନ ସମୃଦ୍ଧିର ଉତ୍ପ୍ରେରକରେ ପରିଣତ କରିବା ପାଇଁ ପ୍ରୟାସରେ ସ୍ଥିର ରହିଛି । ଶ୍ରୀ ମୋଦୀ କହିଥିଲେ, “ଦୁଇ ଦିନ ପୂର୍ବରୁ, ମୁଁ ପାଞ୍ଚଟି ଦେଶ ଗସ୍ତ କରି ଫେରିଛି । ମୁଁ ଯେଉଁ ସବୁ ଦେଶ ଗସ୍ତ କରିଛି, ସେଠାରେ ମୁଁ ଭାରତର ଯୁବଶକ୍ତିର ଶକ୍ତିର ଏକ ଦୃଢ଼ ପ୍ରଦର୍ଶନ ଦେଖିଛି । ଏହି ଗସ୍ତ ସମୟରେ ହୋଇଥିବା ଚୁକ୍ତିନାମା ଦେଶ ଏବଂ ବିଦେଶରେ ଥିବା ଭାରତୀୟ ଯୁବପିଢ଼ିଙ୍କୁ ଲାଭଦାୟକ ହେବ ।” ସେ କହିଥିଲେ ଯେ ଏହି ଗସ୍ତ ସମୟରେ ପ୍ରତିରକ୍ଷା, ଔଷଧ, ଡିଜିଟାଲ୍ ପ୍ରଯୁକ୍ତିବିଦ୍ୟା, ଶକ୍ତି ଏବଂ ବିରଳ ଖଣିଜପଦାର୍ଥ ଭଳି ଗୁରୁତ୍ୱପୂର୍ଣ୍ଣ କ୍ଷେତ୍ରରେ ସ୍ୱାକ୍ଷରିତ ବିଭିନ୍ନ ଚୁକ୍ତିନାମା ସୁଦୂରପ୍ରସାରୀ ଲାଭଦାୟକ ହେବ । ଶ୍ରୀ ମୋଦୀ ଆହୁରି କହିଥିଲେ, “ଏହି ପଦକ୍ଷେପଗୁଡ଼ିକ କେବଳ ଭାରତର ବିଶ୍ୱ ଅର୍ଥନୈତିକ ସ୍ଥିତିକୁ ସୁଦୃଢ଼ କରିବ ନାହିଁ ବରଂ ଉତ୍ପାଦନ ଏବଂ ସେବା କ୍ଷେତ୍ରରେ ଯୁବ ଭାରତୀୟଙ୍କ ପାଇଁ ଅର୍ଥପୂର୍ଣ୍ଣ ସୁଯୋଗ ସୃଷ୍ଟି କରିବ ।” ଉଦୀୟମାନ ନିଯୁକ୍ତି ପ୍ରେକ୍ଷାପଟ୍ଟ ବିଷୟରେ ଉଲ୍ଲେଖକରି ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଥିଲେ ଯେ ଏକବିଂଶ ଶତାବ୍ଦୀରେ ନିଯୁକ୍ତିର ପ୍ରକୃତି ଦ୍ରୁତ ଗତିରେ ପରିବର୍ତ୍ତନ ହେଉଛି । ନବସୃଜନ, ଷ୍ଟାର୍ଟଅପ୍ ଏବଂ ଗବେଷଣାର ଗୁରୁତ୍ୱ ଉପରେ ଗୁରୁତ୍ୱାରୋପ କରି, ସେ ଭାରତରେ ବିକାଶଲାଭ କରୁଥିବା ଇକୋସିଷ୍ଟମ ବିଷୟରେ କହିଥିଲେ ଯାହା ଯୁବପିଢ଼ିଙ୍କୁ ବଡ଼ ସ୍ୱପ୍ନ ଦେଖିବା ପାଇଁ ସଶକ୍ତ କରିଥାଏ । ସେ ନୂତନ ପିଢ଼ି ପ୍ରତି ତାଙ୍କର ବ୍ୟକ୍ତିଗତ ଗର୍ବ ଏବଂ ଆତ୍ମବିଶ୍ୱାସ ବାଣ୍ଟିଥିଲେ ଏବଂ ଯୁବପିଢ଼ିଙ୍କୁ ମହତ୍ୱାକାଂକ୍ଷା, ଦୃଷ୍ଟିକୋଣ ଏବଂ କିଛି ନୂତନ ସୃଷ୍ଟି କରିବାର ଦୃଢ଼ ଇଚ୍ଛାଶକ୍ତି ସହିତ ଆଗକୁ ବଢ଼ୁଥିବା ଦେଖି ଖୁସି ପ୍ରକାଶ କରିଥିଲେ । ଶ୍ରୀ ମୋଦୀ କହିଥିଲେ ଯେ ଭାରତ ସରକାର ଘରୋଇ କ୍ଷେତ୍ରରେ ନୂତନ ନିଯୁକ୍ତି ସୁଯୋଗ ସୃଷ୍ଟି କରିବା ଉପରେ ମଧ୍ୟ ଧ୍ୟାନ ଦେଉଛନ୍ତି । ନିକଟରେ, ସରକାର ଏମ୍ପ୍ଲୋୟମେଣ୍ଟ ଲିଙ୍କଡ୍ ଇନସେଣ୍ଟିଭ୍ ସ୍କିମ୍ (ନିଯୁକ୍ତି ସଂପର୍କିତ ପ୍ରେତ୍ସାହନ ଯୋଜନା) ନାମକ ଏକ ନୂତନ ଯୋଜନାକୁ ଅନୁମୋଦନ କରିଛନ୍ତି । ଏହି ଯୋଜନା ଅନୁଯାୟୀ, ସରକାର ବେସରକାରୀ କ୍ଷେତ୍ରରେ ପ୍ରଥମ ଚାକିରି ପାଇଥିବା ଯୁବକମାନଙ୍କୁ ୧୫୦୦୦ ଟଙ୍କା ପ୍ରଦାନ କରିବେ । “ଅନ୍ୟ ଶବ୍ଦରେ, ସରକାର ସେମାନଙ୍କ ପ୍ରଥମ ଚାକିରିର ପ୍ରଥମ ଦରମାରେ ଯୋଗଦାନ ଦେବେ । ଏଥିପାଇଁ ସରକାର ପ୍ରାୟ ୧ ଲକ୍ଷ କୋଟି ଟଙ୍କାର ବଜେଟ୍ ବ୍ୟବସ୍ଥା କରିଛନ୍ତି । ଏହି ଯୋଜନା ପ୍ରାୟ ୩.୫ କୋଟି ନୂତନ ନିଯୁକ୍ତି ସୃଷ୍ଟି କରିବ ବୋଲି ଆଶା କରାଯାଉଛି ।” ପ୍ରଧାନମନ୍ତ୍ରୀ ଜାତୀୟ ଅଭିବୃଦ୍ଧିକୁ ଗତିଶୀଳ କରିବା, ନିଯୁକ୍ତି ସୃଷ୍ଟି କରିବା ଏବଂ ବିଶ୍ୱର ତୃତୀୟ ବୃହତ୍ତମ ଅର୍ଥନୀତି ହେବା ଦିଗରେ ଭାରତର ଯାତ୍ରାକୁ ତ୍ୱରାନ୍ୱିତ କରିବାରେ ଭାରତର ଉତ୍ପାଦନ କ୍ଷେତ୍ରର ପରିବର୍ତ୍ତନକାରୀ ଶକ୍ତି ଉପରେ ଆଲୋକପାତ କରିଥିଲେ । ପ୍ରଧାନମନ୍ତ୍ରୀ କହିଥିଲେ ଯେ ଗତ କିଛି ବର୍ଷ ମଧ୍ୟରେ ମେକ୍ ଇନ୍ ଇଣ୍ଡିଆ ପ୍ରୟାସ ଯଥେଷ୍ଟ ଶକ୍ତି ହାସଲ କରିଛି । କେବଳ ପିଏଲଆଇ (ପ୍ରଡକ୍ସନ ଲିଙ୍କ୍ଡ ଇନସେଣ୍ଟିଭ୍) ଯୋଜନା ମାଧ୍ୟମରେ ସାରା ଦେଶରେ ୧୧ ଲକ୍ଷରୁ ଅଧିକ ନିଯୁକ୍ତି ସୃଷ୍ଟି ହୋଇଛି । ମୋବାଇଲ୍ ଫୋନ୍ ଏବଂ ଇଲେକ୍ଟ୍ରୋନିକ୍ସ କ୍ଷେତ୍ରରେ ଅଭୂତପୂର୍ବ ପ୍ରସାର ହୋଇଛି । ଶ୍ରୀ ମୋଦୀ କହିଛନ୍ତି, “ଆଜି ଭାରତରେ ଇଲେକ୍ଟ୍ରୋନିକ୍ସ ଉତ୍ପାଦନ ପ୍ରାୟ ୧୧ ଲକ୍ଷ କୋଟି ଟଙ୍କା ମୂଲ୍ୟରେ ପହଞ୍ଚିଛି । ଗତ ୧୧ ବର୍ଷ ମଧ୍ୟରେ ଏହା ପାଞ୍ଚ ଗୁଣରୁ ଅଧିକ ବୃଦ୍ଧି ପାଇଛି । ପୂର୍ବରୁ ଦେଶରେ କେବଳ ୨ ରୁ ୪ଟି କାରଖାନା ମୋବାଇଲ୍ ଫୋନ୍ ନିର୍ମାଣ କରୁଥିଲା । ଆଜି ଭାରତରେ ପ୍ରାୟ ୩୦୦ ୟୁନିଟ୍ ମୋବାଇଲ୍ ଫୋନ୍ ଉତ୍ପାଦନରେ ନିୟୋଜିତ ଅଛନ୍ତି ଯାହା ଲକ୍ଷ ଲକ୍ଷ ଯୁବକଙ୍କୁ ନିଯୁକ୍ତି ପ୍ରଦାନ କରୁଛି ।”
ପ୍ରଧାନମନ୍ତ୍ରୀ ବିଶ୍ବରେ ପ୍ରତିରକ୍ଷା ଉତ୍ପାଦନ କ୍ଷେତ୍ରରେ ଭାରତର ଉତଥାନ ସଂପର୍କରେ ମଧ୍ୟ ଉଲ୍ଲେଖ କରିଥିଲେ । ଭାରତର ପ୍ରତିରକ୍ଷା ଉତ୍ପାଦନ ଉତ୍ପାଦନ ୧.୨୫ ଲକ୍ଷ କୋଟି ଟଙ୍କା ଟପିଯାଇଛି । ସେ ବିଶ୍ୱର ସର୍ବବୃହତ ରେଳ ଇଞ୍ଜିନ ନିର୍ମାତା ଭାବରେ ଭାରତର ଉଦୟ ଏବଂ ରେଳ ଇଞ୍ଜିନ, ରେଳ କୋଚ୍ ଏବଂ ମେଟ୍ରୋ କୋଚ୍ ରପ୍ତାନିରେ ଦେଶର ଦୃଢ଼ ପ୍ରଦର୍ଶନକୁ ପ୍ରଶଂସା କରିଥିଲେ । ସେ କହିଥିଲେ ଯେ ଅଟୋମୋବାଇଲ୍ କ୍ଷେତ୍ର ମାତ୍ର ପାଞ୍ଚ ବର୍ଷ ମଧ୍ୟରେ ୪୦ ବିଲିୟନ ଡଲାରର ପ୍ରତ୍ୟକ୍ଷ ବିଦେଶୀ ପୁ୍ଞ୍ଜିନିବେଶ ( ଏଫଡିଆଇ) ଆକର୍ଷିତ କରିଛି, ଯାହା ଫଳରେ ନୂତନ କାରଖାନା, ନୂତନ ନିଯୁକ୍ତି ସୃଷ୍ଟି ଏବଂ ରେକର୍ଡ ଯାନବାହାନ ବିକ୍ରୟ ହୋଇଛି । ଭାରତର କଲ୍ୟାଣକାରୀ ପଦକ୍ଷେପର ସୁଦୂରପ୍ରସାରୀ ପ୍ରଭାବ ଉପରେ ଗୁରୁତ୍ୱାରୋପ କରି ପ୍ରଧାନମନ୍ତ୍ରୀ ଅନ୍ତର୍ଜାତୀୟ ଶ୍ରମ ସଂଗଠନ (ଆଇଏଲଓ) ଦ୍ୱାରା ଏକ ସାମ୍ପ୍ରତିକ ରିପୋର୍ଟକୁ ଉଲ୍ଲେଖ କରିଛନ୍ତି ଯାହା ଦର୍ଶାଉଛି ଯେ ଗତ ଦଶନ୍ଧିରେ ୯୦ କୋଟିରୁ ଅଧିକ ଭାରତୀୟ ନାଗରିକ ସରକାରୀ କଲ୍ୟାଣକାରୀ ଯୋଜନାର ପରିସରକୁ ଆସିଛନ୍ତି । ସେ କହିଥିଲେ ଯେ ଏହି ଯୋଜନାଗୁଡ଼ିକ କେବଳ କଲ୍ୟାଣକାରୀ ଲାଭ ପର୍ଯ୍ୟନ୍ତ ସୀମିତ ନୁହେଁ ବରଂ ବିଶେଷକରି ଗ୍ରାମୀଣ ଭାରତରେ ବଡ଼ ପରିମାଣରେ ନିଯୁକ୍ତି ସୃଷ୍ଟି କରିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛି । ପ୍ରଧାନମନ୍ତ୍ରୀ ପ୍ରଧାନମନ୍ତ୍ରୀ ଆବାସ ଯୋଜନା ଭଳି ପ୍ରମୁଖ କାର୍ଯ୍ୟକ୍ରମଗୁଡ଼ିକ ବିଷୟରେ ବିସ୍ତାରିତ ଭାବରେ କହିଥିଲେ ଯାହା ଅଧୀନରେ ୪ କୋଟି ଘର ନିର୍ମାଣ କରାଯାଇଛି ଏବଂ ୩ କୋଟି ଘର ନିର୍ମାଣାଧୀନ ଅଛି । ସ୍ୱଚ୍ଛ ଭାରତ ଅଭିଯାନ ଅଧୀନରେ ୧୨ କୋଟି ଶୌଚାଳୟ ନିର୍ମାଣ ଦ୍ୱାରା ପ୍ଲମ୍ବର ଏବଂ ନିର୍ମାଣ ଶ୍ରମିକଙ୍କୁ ନିଯୁକ୍ତି ମିଳିଛି, ଯେତେବେଳେ ଉଜ୍ଜ୍ୱଳା ଯୋଜନା ଅଧୀନରେ ପ୍ରଦାନ କରାଯାଇଥିବା ୧୦ କୋଟିରୁ ଅଧିକ ଏଲପିଜି ସଂଯୋଗ ବଟଲିଂ ଭିତ୍ତିଭୂମି ଏବଂ ବଣ୍ଟନ ନେଟୱାର୍କକୁ ବିସ୍ତାର କରିଛି, ଯାହା ଫଳରେ ହଜାର ହଜାର ବଣ୍ଟନ କେନ୍ଦ୍ର ଏବଂ ଲକ୍ଷ ଲକ୍ଷ ନୂତନ ନିଯୁକ୍ତି ସୃଷ୍ଟି ହୋଇଛି । ଶ୍ରୀ ମୋଦୀ ଆହୁରି କହିଥିଲେ, “ପ୍ରଧାନମନ୍ତ୍ରୀ ସୂର୍ଯ୍ୟ ଘର ମାଗଣା ବିଦ୍ୟୁତ ଯୋଜନା, ଯାହା ଛାତ ଉପରେ ସୌରଶକ୍ତି ସ୍ଥାପନ ପାଇଁ ପ୍ରତି ପରିବାରକୁ ୭୫,୦୦୦ ଟଙ୍କାରୁ ଅଧିକ ପ୍ରଦାନ କରେ, ତାହା ପରିବାରର ବିଦ୍ୟୁତ ବିଲ୍ ହ୍ରାସ କରୁଛି ଏବଂ ଟେକ୍ନିସିଆନ୍, ଇଞ୍ଜିନିୟର ଏବଂ ସୌର ପ୍ୟାନେଲ୍ ନିର୍ମାତାଙ୍କ ପାଇଁ ନିଯୁକ୍ତି ସୁଯୋଗ ସୃଷ୍ଟି କରୁଛି । ନମୋ ଡ୍ରୋନ୍ ଦିଦି ଗ୍ରାମୀଣ ମହିଳାମାନଙ୍କୁ ଡ୍ରୋନ୍ ପାଇଲଟ୍ ଭାବରେ ତାଲିମ ଦେଇ ସେମାନଙ୍କୁ ସଶକ୍ତ କରିଛନ୍ତି ।” ଶ୍ରୀ ମୋଦୀ କହିଥିଲେ ଯେ ଦେଶ ୩ କୋଟି ଲଖପତି ଦିଦି ସୃଷ୍ଟି କରିବାର ଲକ୍ଷ୍ୟରେ ମଧ୍ୟ ଆଗକୁ ବଢ଼ୁଛି ଏବଂ ୧.୫ କୋଟି ମହିଳା ଏହି ମାଇଲଖୁଣ୍ଟ ହାସଲ କରିସାରିଛନ୍ତି । ବ୍ୟାଙ୍କ ସଖୀ, ବୀମା ସଖୀ, କୃଷି ସଖୀ ଏବଂ ପଶୁ ସଖୀ ଭଳି ବିଭିନ୍ନ ଯୋଜନା ମହିଳାଙ୍କୁ ସ୍ଥାୟୀ ନିଯୁକ୍ତି ପାଇବାକୁ ସକ୍ଷମ କରିଛି । ସେ ସୂଚନା ଦେଇଥିଲେ ଯେ ପ୍ରଧାନମନ୍ତ୍ରୀ ସ୍ୱନିଧି ଯୋଜନା ରାସ୍ତାକଡ଼ ବିକ୍ରେତା ଏବଂ ହକରମାନଙ୍କୁ ଆନୁଷ୍ଠାନିକ ସହାୟତା ପ୍ରଦାନ କରିଛି, ଯାହା ଦ୍ୱାରା ଲକ୍ଷ ଲକ୍ଷ ଲୋକଙ୍କୁ ମୁଖ୍ୟଧାରାର ଅର୍ଥନୈତିକ କାର୍ଯ୍ୟକଳାପରେ ସାମିଲ କରାଯାଇଛି । ଏହା ସହିତ, ପ୍ରଧାନମନ୍ତ୍ରୀ ବିଶ୍ୱକର୍ମା ଯୋଜନା ପାରମ୍ପରିକ କାରିଗର, କାରିଗର ଏବଂ ସେବା ପ୍ରଦାନକାରୀଙ୍କୁ ତାଲିମ, ଉପକରଣ ଏବଂ ଋଣ ମାଧ୍ୟମରେ ସଶକ୍ତ କରୁଛି । ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଥିଲେ ଯେ ଏପରି ଅନେକ ଯୋଜନା ଯୋଗୁଁ ଗତ ଦଶ ବର୍ଷ ମଧ୍ୟରେ ୨୫ କୋଟି ଲୋକ ଦାରିଦ୍ର୍ୟରୁ ବାହାରି ଆସିଛନ୍ତି । ଶ୍ରୀ ମୋଦୀ କହିଥିଲେ, “ନିଯୁକ୍ତି ସୁଯୋଗ ବିନା ଏପରି ପରିବର୍ତ୍ତନ ସମ୍ଭବ ହୋଇପାରି ନଥାନ୍ତା । ଏହି କାରଣରୁ ଆଜି ବିଶ୍ୱ ବ୍ୟାଙ୍କ ଭଳି ପ୍ରମୁଖ ବିଶ୍ୱ ପ୍ରତିଷ୍ଠାନ ଭାରତକୁ ପ୍ରଶଂସା କରୁଛନ୍ତି । ଭାରତ ଏବେ ବିଶ୍ୱର ଶ୍ରେଷ୍ଠ ଦେଶମାନଙ୍କ ମଧ୍ୟରେ ଗଣାଯାଉଛି ଯେଉଁଠାରେ ସମାନତାର ସ୍ତର ସର୍ବାଧିକ ।” ପ୍ରଧାନମନ୍ତ୍ରୀ ବର୍ତ୍ତମାନର ପର୍ଯ୍ୟାୟକୁ ବିକାଶର ମହାଯଜ୍ଞ, ଦାରିଦ୍ର୍ୟ ଦୂରୀକରଣ ଏବଂ ନିଯୁକ୍ତି ସୃଷ୍ଟି ପାଇଁ ଉତ୍ସର୍ଗୀକୃତ ଏକ ଜାତୀୟ ମିଶନ ଭାବରେ ବର୍ଣ୍ଣନା କରିଥିଲେ ଏବଂ ଦେଶର ଯୁବପିଢ଼ି ଏବଂ ସରକାରଙ୍କ ନବନିଯୁକ୍ତ ସଦସ୍ୟମାନଙ୍କୁ ନୂତନ ଶକ୍ତି ଏବଂ ସମର୍ପଣ ସହିତ ଏହି ମିଶନକୁ ଆଗକୁ ନେବାକୁ ଆହ୍ୱାନ କରିଥିଲେ । ତାଙ୍କ ଅଭିଭାଷଣ ଶେଷ କରି ପ୍ରଧାନମନ୍ତ୍ରୀ “ନାଗରିକ ଦେବୋ ଭାବ” ନୀତି ଗ୍ରହଣ କରିବାକୁ ଅର୍ଥାତ ପ୍ରତ୍ୟେକ ନାଗରିକଙ୍କୁ ଭଗବାନ ଭଳି ବ୍ୟବହାର କରିବାକୁ ଆହ୍ବାନ କରିଥିଲେ ଏବଂ ନୂତନ ଭାବରେ ନିଯୁକ୍ତ ସଦସ୍ୟମାନଙ୍କୁ ଲୋକସେବାରେ ଏକ ଉଜ୍ଜ୍ୱଳ ଏବଂ ଫଳପ୍ରଦ ଭବିଷ୍ୟତ ପାଇଁ ହାର୍ଦ୍ଦିକ ଅଭିନନ୍ଦନ ଏବଂ ଶୁଭେଚ୍ଛା ଜଣାଇଥିଲେ । ପୃଷ୍ଠଭୂମି ନିଯୁକ୍ତି ସୃଷ୍ଟିକୁ ସର୍ବାଧିକ ପ୍ରାଥମିକତା ଦେବା ପାଇଁ ପ୍ରଧାନମନ୍ତ୍ରୀଙ୍କ ପ୍ରତିବଦ୍ଧତା ଅନୁଯାୟୀ, ଦେଶର ୪୭ଟି ସ୍ଥାନରେ ୧୬ତମ ରୋଜଗାର ମେଳା ଆୟୋଜନ କରାଯିବ । ଯୁବପିଢ଼ିଙ୍କୁ ସଶକ୍ତ କରିବା ଏବଂ ରାଷ୍ଟ୍ର ନିର୍ମାଣରେ ସେମାନଙ୍କର ଅଂଶଗ୍ରହଣ ପାଇଁ ଅର୍ଥପୂର୍ଣ୍ଣ ସୁଯୋଗ ପ୍ରଦାନ କରିବାରେ ଏହି ରୋଜଗାର ମେଳା ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ । ସାରା ଦେଶରେ ଆୟୋଜିତ ରୋଜଗାର ମେଳା ମାଧ୍ୟମରେ ଏପର୍ଯ୍ୟନ୍ତ ୧୦ ଲକ୍ଷରୁ ଅଧିକ ନିଯୁକ୍ତି ପତ୍ର ପ୍ରଦାନ କରାଯାଇଛି । ସାରା ଦେଶରୁ ମନୋନୀତ ନୂତନ କର୍ମଚାରୀମାନେ ରେଳ ମନ୍ତ୍ରଣାଳୟ, ଗୃହ ମନ୍ତ୍ରଣାଳୟ, ଡାକ ବିଭାଗ, ସ୍ୱାସ୍ଥ୍ୟ ଏବଂ ପରିବାର କଲ୍ୟାଣ ମନ୍ତ୍ରଣାଳୟ, ଆର୍ଥିକ ସେବା ବିଭାଗ, ଶ୍ରମ ଏବଂ ନିଯୁକ୍ତି ମନ୍ତ୍ରଣାଳୟ ଏବଂ ଅନ୍ୟାନ୍ୟ ବିଭାଗ ଏବଂ ମନ୍ତ୍ରଣାଳୟରେ ବିଭିନ୍ନ ପଦବୀରେ ଯୋଗ ଦେବେ ।
