ନୂଆଦିଲ୍ଲୀ, (ପିଆଇବି) : ଏହି ସ୍ୱର୍ଣ୍ଣଭୂମିରେ ମୋତେ ଦିଆଯାଇଥିବା ଭବ୍ୟ ସ୍ୱାଗତ ଏବଂ ଆତିଥ୍ୟ ସତ୍କାର ପାଇଁ ମୁଁ ପ୍ରଧାନମନ୍ତ୍ରୀ ସିନାୱାତ୍ରାଙ୍କୁ ହୃଦୟରୁ ଗଭୀର କୃତଜ୍ଞତା ଜଣାଉଛି । ମାର୍ଚ୍ଚ ୨୮ରେ ଘଟିତ ଭୂମିକମ୍ପରେ ପ୍ରାଣ ହରାଇଥିବା ବ୍ୟକ୍ତିବିଶେଷଙ୍କ ପରିବାରବର୍ଗଙ୍କୁ ମୁଁ ଭାରତବାସୀଙ୍କ ତରଫରୁ ଗଭୀର ସମବେଦନା ଜଣାଉଛି । ଆମେ ସମସ୍ତେ ଆହତଙ୍କ ଆଶୁ ଆରୋଗ୍ୟ କାମନା କରୁଛୁ । ଭାରତ ଏବଂ ଥାଇଲାଣ୍ଡ ମଧ୍ୟରେ ବହୁ ପୁରୁଣା ସମ୍ପର୍କ ଆମର ଗଭୀର ସାଂସ୍କୃତିକ ଏବଂ ଆଧ୍ୟାତ୍ମିକ ସମ୍ପର୍କ ସହ ଜଡିତ । ବୌଦ୍ଧ ଧର୍ମର ପ୍ରଚାର-ପ୍ରସାର ଆମ ଲୋକଙ୍କୁ ଏକତ୍ରିତ କରିଛି । ଆୟୁଥ୍ୟାଠାରୁ ନାଳନ୍ଦା ପର୍ଯ୍ୟନ୍ତ ପଣ୍ଡିତଙ୍କ ଆଦାନ ପ୍ରଦାନ ହୋଇଛି । ରାମାୟଣର କାହାଣୀ ଥାଇ ଲୋକକଥାରେ ଗଭୀର ଭାବରେ ଜଡ଼ିତ । ଏଥିସହିତ ସଂସ୍କୃତ ଓ ପାଲିର ପ୍ରଭାବ ଆଜି ବି ଆମ ଭାଷା ଓ ପରମ୍ପରାରେ ପ୍ରତିଫଳିତ ହେଉଛି । ମୋର ଏହି ଯାତ୍ରା ପରିପ୍ରେକ୍ଷୀରେ ୧୮ଶ ଶତାବ୍ଦୀର ‘ରାମାୟଣ’ ମୂର୍ତ୍ତିଚିତ୍ର ଉପରେ ଆଧାରିତ ଏକ ସ୍ୱତନ୍ତ୍ର ଡାକଟିକଟ ଉନ୍ମୋଚନ କରିଥିବାରୁ ମୁଁ ଥାଇଲାଣ୍ଡ ସରକାରଙ୍କୁ କୃତଜ୍ଞତା ଜଣାଉଛି ।
ପ୍ରଧାନମନ୍ତ୍ରୀ ସିନାୱାତ୍ରା ମୋତେ ଏକ ତ୍ରି-ପିଟକ ଉପହାର ଦେଇଛନ୍ତି । ବୁଦ୍ଧଙ୍କ ଦେଶ ଭାରତବର୍ଷ ତରଫରୁ ମୁଁ ଏହାକୁ ହାତ ଯୋଡି ସ୍ୱିକାର କରୁଛି । ଗତବର୍ଷ ଭଗବାନ ବୁଦ୍ଧଙ୍କ ପବିତ୍ର ଅବଶେଷ ଭାରତରୁ ଥାଇଲାଣ୍ଡକୁ ପଠାଯାଇଥିଲା । ଏହା ଅତ୍ୟନ୍ତ ଆନନ୍ଦର ବିଷୟ ଯେ ୪୦ ଲକ୍ଷରୁ ଅଧିକ ଶ୍ରଦ୍ଧାଳୁ ଶ୍ରଦ୍ଧାଞ୍ଜଳି ଦେବାର ସୁଯୋଗ ପାଇଛନ୍ତି । ମୁଁ ଏହା ଘୋଷଣା କରି ଅତ୍ୟନ୍ତ ଆନନ୍ଦିତ ଯେ ୧୯୬୦ ମସିହାରେ ଗୁଜରାଟର ଅରାବଳୀରେ ମିଳିଥିବା ପବିତ୍ର ଅବଶେଷକୁ ମଧ୍ୟ ଏକ ପ୍ରଦର୍ଶନୀ ପାଇଁ ଥାଇଲାଣ୍ଡ ପଠାଯିବ । ଚଳିତ ବର୍ଷ ଆମର ପୁରୁଣା ସମ୍ପର୍କ ଭାରତରେ ମହାକୁମ୍ଭରେ ମଧ୍ୟ ଦୃଶ୍ୟମାନ ହୋଇଥିଲା । ଏହି ଆଧ୍ୟାତ୍ମିକ ଓ ସାଂସ୍କୃତିକ ସମାବେଶରେ ଥାଇଲାଣ୍ଡ ସମେତ ବିଦେଶରୁ ଆସିଥିବା ୬୦୦ରୁ ଅଧିକ ବୌଦ୍ଧ ଶ୍ରଦ୍ଧାଳୁ ଯୋଗ ଦେଇଥିଲେ । ଏହି କାର୍ଯ୍ୟକ୍ରମ ବିଶ୍ୱ ଶାନ୍ତି ଓ ସୌହାର୍ଦ୍ଦ୍ୟର ବାର୍ତ୍ତା ବହନ କରିଥିଲା । ଭାରତର ‘ଆକ୍ଟ ଇଷ୍ଟ’ ନୀତି ଏବଂ ଭାରତ-ପ୍ରଶାନ୍ତ ମହାସାଗରୀୟ ଦୃଷ୍ଟିକୋଣରେ ଥାଇଲାଣ୍ଡର ଏକ ସ୍ୱତନ୍ତ୍ର ସ୍ଥାନ ରହିଛି । ଆମେ ଆମର ସମ୍ପର୍କକୁ ଏକ ରଣନୈତିକ ଭାଗିଦାରୀରେ ପରିଣତ କରିବାକୁ ନିଷ୍ପତ୍ତି ନେଇଛୁ । ଏଥିସହ ଆମ ସୁରକ୍ଷା ଏଜେନ୍ସିଗୁଡ଼ିକ ମଧ୍ୟରେ ଏକ ‘ଷ୍ଟ୍ରାଟେଜିକ୍ ଡାଏଲଗ୍’ ପ୍ରତିଷ୍ଠା ନେଇ ମଧ୍ୟ ଆମେ ଆଲୋଚନା କରିଛୁ । ସାଇବର ଅପରାଧର ଶିକାର ହୋଇଥିବା ଭାରତୀୟଙ୍କୁ ଫେରାଇ ଆଣିବାରେ ସହଯୋଗ କରିଥିବାରୁ ଆମେ ଥାଇଲାଣ୍ଡ ସରକାରଙ୍କୁ ଧନ୍ୟବାଦ ଜଣାଉଛୁ । ମାନବ ଚାଲାଣ ଏବଂ ବେଆଇନ ପ୍ରବାସକୁ ରୋକିବା ପାଇଁ ଆମର ଏଜେନ୍ସିମାନେ ସହଯୋଗର ହାତ ବଢାଇବେ ବୋଲି ଆମେ ରାଜି ହୋଇଛୁ । ଥାଇଲାଣ୍ଡ ଏବଂ ଭାରତର ଉତ୍ତର-ପୂର୍ବରାଜ୍ୟ ମଧ୍ୟରେ ପର୍ଯ୍ୟଟନ, ସଂସ୍କୃତି ଏବଂ ଶିକ୍ଷା କ୍ଷେତ୍ରରେ ସହଯୋଗ ଉପରେ ଆମେ ଗୁରୁତ୍ୱ ଦେଇଛୁ । ପାରସ୍ପରିକ ବାଣିଜ୍ୟ, ପୁଞ୍ଜିନିବେଶ ଏବଂ ବ୍ୟବସାୟିକ ବିନିମୟ ବୃଦ୍ଧି ଉପରେ ଆମେ ଆଲୋଚନା କରିଛୁ । ଏମ୍.ଏସ୍.ଏମ୍.ଇ, ହସ୍ତତନ୍ତ ଏବଂ ହସ୍ତଶିଳ୍ପ କ୍ଷେତ୍ରରେ ସହଯୋଗ ବୃଦ୍ଧି ପାଇଁ ମଧ୍ୟ ଚୁକ୍ତି ହୋଇଛି । ଅକ୍ଷୟ ଶକ୍ତି, ଡିଜିଟାଲ ଟେକ୍ନୋଲୋଜି, ଇ-ଯାନ, ରୋବୋଟିକ୍ସ, ମହାକାଶ, ଜୈବ ପ୍ରଯୁକ୍ତିବିଦ୍ୟା ଏବଂ ଷ୍ଟାର୍ଟଅପ୍ କ୍ଷେତ୍ରରେ ସହଯୋଗକୁ ସୁଦୃଢ଼ କରିବାକୁ ଆମେ ନିଷ୍ପତ୍ତି ନେଇଛୁ । ଭୌତିକ ଯୋଗାଯୋଗ ବୃଦ୍ଧି ସହିତ ଉଭୟ ଦେଶ ଫିନ୍ଟେକ୍ ସଂଯୋଗକୁ ପ୍ରୋତ୍ସାହିତ କରିବା ପାଇଁ କାର୍ଯ୍ୟ କରିବେ । ଲୋକଙ୍କ ମଧ୍ୟରେ ଆଦାନ ପ୍ରଦାନକୁ ପ୍ରୋତ୍ସାହିତ କରିବା ଉଦ୍ଦେଶ୍ୟରେ ଭାରତ ଥାଇ ପର୍ଯ୍ୟଟକଙ୍କୁ ମାଗଣା ଇ-ଭିସା ସୁବିଧା ପ୍ରଦାନ କରିବା ଆରମ୍ଭ କରିଛି । ଆସିଆନ୍ ହେଉଛି ଭାରତର ବ୍ୟାପକ ରଣନୈତିକ ସହଯୋଗୀ । ପଡ଼ୋଶୀ ସାମୁଦ୍ରିକ ରାଷ୍ଟ୍ର ଭାବେ ଏହି ଅଞ୍ଚଳରେ ଆଞ୍ଚଳିକ ଶାନ୍ତି, ସ୍ଥିରତା ଏବଂ ସମୃଦ୍ଧିରେ ଆମର ସମ୍ମିଳିତ ସ୍ୱାର୍ଥ ନିହିତ । ଆସିଆନ ଏକତା ଏବଂ ଆସିଆନ୍ କେନ୍ଦ୍ରୀୟତାକୁ ଭାରତ ଦୃଢ଼ ସମର୍ଥନ କରୁଛି । ଭାରତ-ପ୍ରଶାନ୍ତ ମହାସାଗରୀୟ ଅଞ୍ଚଳରେ ଉଭୟ ଦେଶ ଏକ ମୁକ୍ତ, ଖୋଲା, ସମାବେଶୀ ଏବଂ ନିୟମ ଭିତ୍ତିକ ଶୃଙ୍ଖଳାକୁ ସମର୍ଥନ କରୁଛନ୍ତି । ଆମେ ବିକାଶରେ ବିଶ୍ୱାସ କରୁ, ସମ୍ପ୍ରସାରଣବାଦରେ ନୁହେଁ । ‘ଭାରତ-ପ୍ରଶାନ୍ତ ମହାସାଗର’ ଅଭିଯାନର ‘ମେରିଟାଇମ୍ ଇକୋଲୋଜି’ ସ୍ତମ୍ଭକୁ ସହ-ନେତୃତ୍ୱ ଦେବା ପାଇଁ ଥାଇଲାଣ୍ଡର ନିଷ୍ପତ୍ତିକୁ ଆମେ ସ୍ୱାଗତ କରୁଛୁ । ମୁଁ ଆସନ୍ତାକାଲି ବିମ୍ଷ୍ଟେକ୍ ଶିଖର ସମ୍ମିଳନୀରେ ଅଂଶଗ୍ରହଣ କରିବାକୁ ଆଗ୍ରହୀ । ଥାଇଲାଣ୍ଡର ଅଧ୍ୟକ୍ଷତାରେ ଏହି ମଞ୍ଚ ଆଞ୍ଚଳିକ ସହଯୋଗ ଦିଗରେ ନୂତନ ଗତି ହାସଲ କରିଛି । ଏହି ସଫଳତା ପାଇଁ ଆମେ ପ୍ରଧାନମନ୍ତ୍ରୀ ଏବଂ ତାଙ୍କ ଟିମ୍କୁ ଅଭିନନ୍ଦନ ଜଣାଉଛୁ । ପୁଣି ଥରେ ମୁଁ ଆପଣମାନଙ୍କୁ ଏହି ଭବ୍ୟ ସ୍ୱାଗତ ଏବଂ ସମ୍ମାନ ପାଇଁ ଧନ୍ୟବାଦ ଜଣାଉଛି । ତ୍ରି-ପିଟକର ଏହି ଉପହାର ପାଇଁ ମଧ୍ୟ ମୁଁ କୃତଜ୍ଞତା ଜ୍ଞାପନ କରୁଛି ।