ମାଲକାନଗିରି : ପୋଖରୀରୁ ଯୁବକଙ୍କ ମୃତଦେହ ଉଦ୍ଧାର ହୋଇଥିବା ଜଣାପହିଛି ତେବେ ଯୁବକଙ୍କ ପରିଚୟ ଅସ୍ପଷ୍ଟ ଥିବା ଜଣାପଡିଛି । ସୂଚନା ଅନୁସାରେ ମାଲକାନଗିରି ସଦର ବ୍ଲକସ୍ଥ ତମସା ଗ୍ରାମ ନିକଟରେ କେନାଲ ରାସ୍ତା କଡ଼ରେ ଥିବା ଏକ ପୋଖରୀରୁ ଜଣେ ଅଚିହ୍ନା ଯୁବକର ମୃତ ଶରୀର ଉଦ୍ଧାର କରାଯାଇଛି । ଆଜି ସକାଳେ ତମସା ଗ୍ରାମ କେନାଲ କଡ଼ରେ କିଛି ଲୋକ ଗାଈ ଚରାଉଥିବା ବେଳେ ନିକଟସ୍ଥ ପୋଖରୀ ପାଣିରେ କେହିଜଣେ ଯୁବକ ପଡି ଭାସୁଥିବାର ଦେଖିବାକୁ ପାଇଥିଲେ ।ସେମାନେ ପୁଲିସକୁ ଫୋନ କରିଥିଲେ । ଘଟଣାସ୍ଥଳରେ ମାଲକାନଗିରି ଆଦର୍ଶ ଥାନା ପୁଲିସ ଅଗ୍ନିଶମ ବିଭାଗ କର୍ମଚାରୀଙ୍କୁ ନେଇ ପହଞ୍ଚିଥିଲେ । ଅଗ୍ନିଶମ ବିଭାଗ କର୍ମଚାରୀ ପାଣିରୁ ଯୁବକଙ୍କ ମୃତ ଶରୀରକୁ ଉଦ୍ଧାର କରିଥିଲେ । ମୃତ ଯୁବକଙ୍କର ପରିଚୟ କେହି ଜାଣିନଥିବାରୁ ପୁଲିସ ମୃତ ଶରୀରଟିକୁ ଉଦ୍ଧାର କରି ହସ୍ପିଟାଲରେ ସୁରକ୍ଷିତ ଭାବେ ରଖି ଯୁବକଙ୍କ ପରିଚୟ ଖୋଜା ଚଳାଇଛି । ଯୁବକ ଜଣଙ୍କର ବୟସ ପ୍ରାୟ ୩୦ରୁ ୩୫ ବର୍ଷ ହେବ, ସେ କଳା ପ୍ୟାଣ୍ଟ ଓ ନାଲି ବେନିୟନ ପିନ୍ଧିଥିବାର ଦେଖିବାକୁ ମିଳିଛି ।