କରଞ୍ଜିଆ : କରଞ୍ଜିଆ ବନଖଣ୍ଡ ଦୁଧିଆଣି ବନାଞ୍ଚଳ ବରମୁଣ୍ଡା ସେକ୍ସନ ବୁଢିଗାଁ ବିଟ୍ ବନ୍ଧମୁଣ୍ଡା ସାହିଦେଓ ନଦୀ କୂଳରୁ ଏକ ମୃତ କଲରାପତରିଆ ବିରାଡ଼ି ଠାବ ହୋଇଛି । ମୃତ କଲରାପତରିଆ ବିଲେଇକୁ ଯଶିପୁର ପଶୁ ଚିକିତ୍ସାଳୟକୁ ବ୍ୟବଚ୍ଛେଦ ପାଇଁ ପଠାଯାଇଛି । ବ୍ୟବଚ୍ଛେଦ ପରେ ମୃତ୍ୟୁର କାରଣ ଜଣାପଡ଼ିବ ବୋଲି ସ୍ପଷ୍ଟ ହୋଇଛି । ସୂଚନା ଅନୁଯାୟୀ, ରବିବାର ସନ୍ଧ୍ୟା ପ୍ରାୟ ସାଢେ ୬ ଟା ସମୟରେ ବନ ବିଭାଗ କୌଣସି ସୂତ୍ରରୁ ଏକ କଲରାପତରିଆ ବିଲେଇ ମରି ପଡିଥିବାର ସୂଚନା ପାଇଥିଲା । ଏହାପରେ କରଞ୍ଜିଆ ବନଖଣ୍ଡ ଅଧିକାରୀ ଶ୍ରୀକାନ୍ତ ନାୟକ, ସହକାରୀ ବନଖଣ୍ଡ ଅଧିକାରୀ ଫାଲଗୁନୀ ବେହେରା, ଦୁଧିଆଣି ବନାଞ୍ଚଳ ଅଧିକାରୀ ପ୍ରଦୀପ କୁମାର ପୃଷ୍ଟି, କରଞ୍ଜିଆ ବନାଞ୍ଚଳ ଅଧିକାରୀ ପ୍ରବୀର ମୁର୍ମୁ, ବନପାଳ ରମେଶ ମୁଣ୍ଡା ଓ ଠାକୁରଦାସ ହେମ୍ବ୍ରମ ସଦଳବଳ ଘଟଣାସ୍ଥଳରେ ପହଞ୍ଚି ମୃତ କଲରାପତରିଆ ବିଲେଇକୁ ଜବତ କରି ଦୁଧିଆଣି ବନାଞ୍ଚଳ କାର୍ଯ୍ୟଳୟକୁ ଆଣିଥିଲେ । ତେବେ ଆଜି ବିଲେଇ ମୃତ୍ୟର କାରଣ ଜାଣିବା ଉଦ୍ଦେଶ୍ୟରେ ଯଶିପୁର ପଶୁ ଚିକିତ୍ସାଳୟକୁ ବ୍ୟବଚ୍ଛେଦ ପାଇଁ ପଠାଯାଇଥିବା ପ୍ରକାଶ କରିଛନ୍ତି ଦୁଧିଆଣି ବନାଞ୍ଚଳ ଅଧିକାରୀ ପ୍ରଦୀପ କୁମାର ପୃଷ୍ଟି । ବ୍ୟବଚ୍ଛେଦ ପରେ ଆଗକୁ ତଦନ୍ତ ଜାରି ରହିବ ବୋଲି କରଞ୍ଜିଆ ବନଖଣ୍ଡ ଅଧିକାରୀ ଶ୍ରୀକାନ୍ତ ନାୟକ ସୂଚନା ଦେଇଛନ୍ତି ।