ଖଲ୍ଲିକୋଟ : ଖଲ୍ଲିକୋଟ ଥାନା ଅନ୍ତର୍ଗତ ଭେଜିପୁଟ ଗ୍ରାମରେ ଏକ ଅଭାବନୀୟ ଘଟଣା ଘଟିଛି । ଘରେ ଶୋଇଥିବା ବେଳେ ସାପ କାମୁଡ଼ାରେ ଜଣେ ବୟସ୍କ ବ୍ୟକ୍ତିଙ୍କ ମୃତ୍ୟୁ ଘଟିଥିବା ଜଣାପଡିଛି । ମୃତକ ଜଣକ ହେଲେ ପ୍ରଶାନ୍ତ କୁମାର ପଣ୍ଡା(୬୩) ।
ସୂଚନା ଅନୁଯାୟୀ ଭେଜିପୁଟ ଗ୍ରାମର ପ୍ରଶାନ୍ତ କୁମାର ପଣ୍ଡା(୬୩) ଓ ତାଙ୍କ ପୁତ୍ର ମୁକେଶ କୁମାର ପଣ୍ଡା(୨୭) ଘର ଭିତରେ ଶୋଇଥିବା ବେଳେ ଏକ ବିଷଧର ସାପ ବାପା ପ୍ରଶାନ୍ତଙ୍କୁ କାମୁଡ଼ି ଦେଇଥିଲା । ପ୍ରଶାନ୍ତ ନିଦରେ ଶୋଇଥିବାରୁ ସାପ କାମୁଡ଼ିଥିବା ଜାଣି ପାରି ନଥିଲେ । ଭୋର ପ୍ରାୟ ୩ଟା ବେଳକୁ ପ୍ରଶାନ୍ତ ଅସୁସ୍ଥ ଅନୁଭବ କରୁଥିବା ପାଖରେ ଶୋଇଥିବା ପୁଅକୁ ଜଣାଇଥିଲେ । ଘରର ଲାଇଟ୍ ଜଳାଇବାରୁ ସାପକୁ ଦେଖିବାକୁ ପାଇଥିଲେ । ଏହାପରେ ତୁରନ୍ତ ପ୍ରଶାନ୍ତଙ୍କୁ ଖଲ୍ଲିକୋଟ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ଚିକିତ୍ସା ପାଇଁ ନିଆଯାଇଥିଲା । ପ୍ରାଥମିକ ଚିକିତ୍ସା ପରେ ଅବସ୍ଥା ଗୁରୁତର ହେବାରୁ ତାଙ୍କୁ ବ୍ରହ୍ମପୁର ବଡ଼ ମେଡ଼ିକାଲକୁ ସ୍ଥାନାନ୍ତର କରାଯାଇଥିଲା । ଖଲ୍ଲିକୋଟରୁ ବ୍ରହ୍ମପୁର ନେବା ରାସ୍ତାରେ ପ୍ରଶାନ୍ତଙ୍କ ମୃତ୍ୟୁ ଘଟିଥିବା ପରିବାର ଲୋକେ ସୂଚନା ଦେଇଛନ୍ତି ।