ବଲାଙ୍ଗିର, (କେପିଏନ୍ଏସ୍) : ବଲାଙ୍ଗିର ଭୀମଭୋଇ ମେଡ଼ିକାଲ କଲେଜ ହସ୍ପିଟାଲ୍ରେ ଷଷ୍ଠ ବ୍ୟାଚ୍ ଏମ୍ବିବିଏସ୍ ଛାତ୍ରଛାତ୍ରୀ ଯୋଗ ଦେଇଛନ୍ତି । ଏହି ଅବସରରେ ବିବିଏମ୍ସିଏଚ୍ରେ ଏକ ଭବ୍ୟ ସ୍ୱାଗତ ସମାରୋହ ଆୟୋଜିତ ହୋଇଯାଇଛି । ଏବେ ଏହି ମେଡ଼ିକାଲ୍ କଲେଜରେ ସମୁଦାୟ ୬୦୦ ଛାତ୍ରଛାତ୍ରୀ ପାଠ ପଢ଼ୁଥିବା ବେଳେ ଆଜିର ସ୍ୱାଗତ ସମାରୋହରେ ସମସ୍ତ ଛାତ୍ରଛାତ୍ରୀ ଯୋଗଦାନ କରିଥିବା ଦେଖିବାକୁ ମିଳିଛି । କାର୍ଯ୍ୟକ୍ରମରେ ନୂତନ ଭାବେ ଯୋଗ ଦେଇଥିବା ଛାତ୍ରଛାତ୍ରୀ ଓ ସେମାନଙ୍କ ଅଭିଭାବକମାନେ ମଧ୍ୟ ଯୋଗଦାନ କରିଛନ୍ତି । ମେଡ଼ିକାଲ୍ କଲେଜ ଡିନ୍ ପ୍ରଫେସର୍ ଡା.ସବିତା ମହାପାତ୍ର କହିଛନ୍ତି ଯେ, ସ୍ୱାଗତ ସମାରୋହ ସମୟରେ ସମସ୍ତ ଛାତ୍ରଛାତ୍ରୀଙ୍କ ସହ ସେମାନଙ୍କ ଅବିଭାବକମାନଙ୍କୁ ମେଡ଼ିକାଲ୍ ପାଠ୍ୟକ୍ରମ ଉପରେ ପୁଂଖାନୁପୁଂଖ ଭାବେ ବୁଝାଇ ଦିଆଯାଇଥାଏ । ଛାତ୍ରଛାତ୍ରୀଙ୍କ ପ୍ରତି ସେମାନଙ୍କ ଅବିଭାବକମାନଙ୍କର କ’ଣ ସବୁ ଦାୟିତ୍ୱ ରହିଥାଏ, ସେ ସଂପର୍କରେ ମଧ୍ୟ ସେମାନେ ଅବଗତ ହୋଇଥାଆନ୍ତି । ତେବେ ଆଜି ପୁଣି ଶହେ ଜଣ ଛାତ୍ରଛାତ୍ରୀ ନୂତନ ଭାବେ ବିବିବଏମ୍ସିଏଚ୍ରେ ସାମିଲ୍ ହୋଇଥିବାରୁ ମେଡ଼ିକାଲ୍ କଲେଜ ଡିନ୍ ପ୍ରଫେସର୍ ଡା. ମହାପାତ୍ର ଆଜି ଖୁସି ବ୍ୟକ୍ତ କରିଛନ୍ତି । ନୂତନ ଭାବେ ଏମ୍ବିବିଏସ୍ ପାଠ ପଢ଼ିବା ପାଇଁ ମେଡ଼ିକାଲ କଲେଜରେ ଯୋଗଦାନ କରିଥିବା ଛାତ୍ରଛାତ୍ରୀ ତଥା ସେମାନଙ୍କ ଅବିଭାବକମାନଙ୍କ ମଧ୍ୟରେ ବି ବେଶ୍ ଉତ୍ସାହ ରହିଥିବା ଦେଖିବାକୁ ମିଳିଛି ।