ଜାତୀୟ ସଫେଇ କର୍ମଚାରୀ ଆୟୋଗର କାର୍ଯ୍ୟକାଳକୁ ୩୧.୦୩.୨୦୨୫ ଠାରୁ ଅଧିକ ତିନି ବର୍ଷ ପାଇଁ ବୃଦ୍ଧି କରିବା ପ୍ରସ୍ତାବକୁ କ୍ୟାବିନେଟ ମଞ୍ଜୁରି

ନୂଆଦିଲ୍ଲୀ, (ପିଆଇବି) : ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ କେନ୍ଦ୍ର କ୍ୟାବିନେଟ ଜାତୀୟ ସଫେଇ କର୍ମଚାରୀ ଆୟୋଗ (ଏନସିଏସକେ)ର କାର୍ଯ୍ୟକାଳକୁ ୩୧.୦୩.୨୦୨୫ ଠାରୁ ଅଧିକ ତିନି ବର୍ଷ (ଅର୍ଥାତ୍ ୩୧.୦୩.୨୦୨୮ ପର୍ଯ୍ୟନ୍ତ) ପାଇଁ ବୃଦ୍ଧି କରିବା ପ୍ରସ୍ତାବକୁ ମଞ୍ଜୁରି ଦେଇଛନ୍ତି । ଏନସିଏସକେର ତିନି ବର୍ଷ ପାଇଁ ସମ୍ପ୍ରସାରଣ ଲାଗି ମୋଟ ଆର୍ଥିକ ବୋଝ ପ୍ରାୟ ୫୦.୯୧ କୋଟି ଟଙ୍କା ହେବ । ଏହା ସଫେଇ କର୍ମଚାରୀଙ୍କ ସାମାଜିକ-ଆର୍ଥିକ ଉନ୍ନତିକୁ ସୁଗମ କରିବାରେ ସାହାଯ୍ୟ କରିବ, ପରିମଳ କ୍ଷେତ୍ରରେ କାର୍ଯ୍ୟ ସ୍ଥିତିରେ ଉନ୍ନତି ଆଣିବ ଏବଂ ବିପଜ୍ଜନକ ସଫେଇ କରିବା ସମୟରେ ଶୂନ୍ୟ ମୃତ୍ୟୁ ହାସଲ କରିବାକୁ ଲକ୍ଷ୍ୟ ରଖିବ ।
ଆୟୋଗଙ୍କ କାର୍ଯ୍ୟ ପଦ୍ଧତି
ଏନସିଏସକେର ଉଦ୍ଦେଶ୍ୟ ହେଉଛି :
(କ) ସଫେଇ କର୍ମଚାରୀମାନଙ୍କ ସ୍ଥିତି, ସୁବିଧା ଏବଂ ସୁଯୋଗରେ ଥିବା ଅସମାନତା ଦୂର କରିବା ଦିଗରେ କାର୍ଯ୍ୟାନୁଷ୍ଠାନ ପାଇଁ କେନ୍ଦ୍ର ସରକାରଙ୍କୁ ନିର୍ଦ୍ଦିଷ୍ଟ କାର୍ଯ୍ୟକ୍ରମ ପାଇଁ ସୁପାରିସ କରିବା;
(ଖ) ସଫେଇ କର୍ମଚାରୀ ଏବଂ ସଫେଇ କର୍ମଚାରୀଙ୍କ ସାମାଜିକ ଓ ଆର୍ଥିକ ଥଇଥାନ ସମ୍ବନ୍ଧୀୟ କାର୍ଯ୍ୟକ୍ରମ ଏବଂ ଯୋଜନାର କାର୍ଯ୍ୟକାରିତାର ଅଧ୍ୟୟନ ଓ ମୂଲ୍ୟାଙ୍କନ କରିବା;
(ଗ) ନିର୍ଦ୍ଦିଷ୍ଟ ଅଭିଯୋଗଗୁଡ଼ିକର ଅନୁସନ୍ଧାନ କରିବା ଏବଂ (୧) ସଫେଇ କର୍ମଚାରୀମାନଙ୍କ କୌଣସି ଗୋଷ୍ଠୀ ସମ୍ବନ୍ଧରେ କାର୍ଯ୍ୟକ୍ରମ କିମ୍ବା ଯୋଜନା, (୨) ସଫେଇ କର୍ମଚାରୀମାନଙ୍କ ଅସୁବିଧାକୁ ହ୍ରାସ କରିବା ଉଦ୍ଦେଶ୍ୟରେ ନିଆଯାଇଥିବା ନିଷ୍ପତ୍ତି, ନିର୍ଦ୍ଦେଶାବଳୀ ଇତ୍ୟାଦି କାର୍ଯ୍ୟକାରୀ କରିବା କ୍ଷେତ୍ରରେ ଅସୁବିଧା ବିଷୟ ଉପରେ ସ୍ୱତଃପ୍ରବୃତ୍ତ ଭାବେ ଧ୍ୟାନ ଦେବା । (ସସସ) ସଫେଇ କର୍ମଚାରୀ ଇତ୍ୟାଦିଙ୍କ ସାମାଜିକ ଏବଂ ଆର୍ଥିକ ଉନ୍ନତି ପାଇଁ ପଦକ୍ଷେପ,
(ଘ) ସଫେଇ କର୍ମଚାରୀମାନଙ୍କ ସ୍ୱାସ୍ଥ୍ୟ ସୁରକ୍ଷା ଏବଂ ମଜୁରୀ ସହିତ ଜଡ଼ିତ କାର୍ଯ୍ୟସ୍ଥଳର ଅଧ୍ୟୟନ ଏବଂ ତଦାରଖ କରିବା,
(ଙ) ସଫେଇ କର୍ମଚାରୀମାନଙ୍କ ଦ୍ୱାରା ସମ୍ମୁଖୀନ ହେଉଥିବା କୌଣସି ଅସୁବିଧା କିମ୍ବା ଅକ୍ଷମତାକୁ ଧ୍ୟାନରେ ରଖି ସଫେଇ କର୍ମଚାରୀମାନଙ୍କ ସମ୍ବନ୍ଧୀୟ କୌଣସି ପ୍ରସଙ୍ଗରେ କେନ୍ଦ୍ର କିମ୍ବା ରାଜ୍ୟ ସରକାରଙ୍କୁ ରିପୋର୍ଟ ଦେବା; ଏବଂ
(ଚ) ଅନ୍ୟ କୌଣସି ବିଷୟ ଯାହାକୁ କେନ୍ଦ୍ର ସରକାର ଆୟୋଗକୁ ପଠାଇଥିବେ ।
ହାତରେ ମଇଳା କାଢ଼ୁଥିବା ସଫେଇ କର୍ମଚାରୀ ଭାବରେ ନିଯୁକ୍ତି ନିଷେଧ ଏବଂ ସେମାନଙ୍କର ଥଇଥାନ ଅଧିନିୟମ, ୨୦୧୩ (ଏମ୍.ଏସ୍. ଅଧିନିୟମ, ୨୦୧୩)ର ବ୍ୟବସ୍ଥା ଅନୁଯାୟୀ, ଏନସିଏସକେ ନିମ୍ନଲିଖିତ କାର୍ଯ୍ୟ ସମ୍ପାଦନ କରିବ :
ଆଇନର କାର୍ଯ୍ୟାନ୍ୱୟନ ଉପରେ ନଜର ରଖିବା;
I. ଏହି ଆଇନର ବ୍ୟବସ୍ଥାଗୁଡ଼ିକର ଉଲ୍ଲଂଘନ ସମ୍ବନ୍ଧୀୟ ଅଭିଯୋଗଗୁଡ଼ିକର ଅନୁସନ୍ଧାନ କରିବା ଏବଂ ପରବର୍ତ୍ତୀ କାର୍ଯ୍ୟାନୁଷ୍ଠାନ ଆବଶ୍ୟକ କରୁଥିବା ସୁପାରିସ ସହିତ ସମ୍ପୃକ୍ତ କର୍ତ୍ତୃପକ୍ଷଙ୍କୁ ଏହାର ଫଳାଫଳ ଜଣାଇବା;
II. ଏହି ଆଇନର ବ୍ୟବସ୍ଥାଗୁଡ଼ିକର ପ୍ରଭାବଶାଳୀ କାର୍ଯ୍ୟକାରିତା ପାଇଁ କେନ୍ଦ୍ର ଏବଂ ରାଜ୍ୟ ସରକାରଙ୍କୁ ପରାମର୍ଶ ଦେବା; ଏବଂ
III. ଏହି ଆଇନର କାର୍ଯ୍ୟାନ୍ୱୟନ ନ ହେବା ସମ୍ବନ୍ଧୀୟ ବିଷୟ ଉପରେ ସ୍ୱତଃପ୍ରବୃତ୍ତ ଭାବେ ଧ୍ୟାନ ଦେବା ।