ବରଗଡ଼, (ନିରୋଜ କୁମାର ପାଣୀ) : ରୋଜଗାର ପାଇଁ ମଧ୍ୟପ୍ରଦେଶ ଯାଇ ହାତ ହରାଇ ଫେରିଥିବା ରୀନା ମହାନନ୍ଦଙ୍କୁ ତାଙ୍କ ବିଜେପୁର ନିକଟସ୍ଥ ଗ୍ରାମକୁ ଯାଇ ବରଗଡ଼ ମହିଳା ସମିତିର ଏକ ପ୍ରତିନିଧି ଦଳ ଭେଟି ତାଙ୍କ ଏ ଦୁର୍ଦ୍ଦଶା ଏବଂ ସ୍ଥିତିବସ୍ଥା ସଂପର୍କରେ ପଚାରି ବୁଝିଥିଲେ । ସମିତି ପକ୍ଷରୁ ତାଙ୍କୁ କିଛି ଆର୍ଥିକ ସହାୟତା ମଧ୍ୟ ପ୍ରଦାନ କରାଯାଇଥିଲା । ସେଠାରୁ ଫେରି ଏହି ପ୍ରତିନିଧି ଦଳ ବରଗଡ଼ରେ ଜିଲ୍ଲାପାଳଙ୍କୁ ଭେଟି ପୀଡ଼ିତା ରୀନାର ଦୁଃସ୍ଥିତି ସମ୍ପର୍କରେ ଅବଗତ କରାଇଥିଲେ । ରୀନାଙ୍କ ଅସ୍ତ୍ରୋପଚାର ହୋଇ ବାମ ହାତ ହରାଇଥିବା ଆଘାତ ଜନିତ ପୀଡା ଅତ୍ୟଧିକ ଥିବା ସାଙ୍ଗକୁ ତାଙ୍କୁ ଜ୍ଵର ମଧ୍ୟ ହେଉଥିବାରୁ ସମିତି ପକ୍ଷରୁ ଚିନ୍ତା ପ୍ରକାଶ କରାଯାଇଥିଲା । ଉଚିତ ଚିକିତ୍ସା ବ୍ୟବସ୍ଥା ସ୍ୱରୂପ ତାଙ୍କୁ ବୁର୍ଲା ଭିମସାରକୁ ସ୍ଥାନାନ୍ତର କରାଯିବାକୁ ଏବଂ ତାଙ୍କ ସମ୍ପୂର୍ଣ୍ଣ ଚିକିତ୍ସା ତତ୍ତ୍ଵ ଜିଲ୍ଲା ପ୍ରଶାସନ ବହନ କରିବାକୁ ସମିତି ପକ୍ଷରୁ ଅନୁରୋଧ କରାଯାଇଥିଲା । ଜିଲ୍ଲାପାଳ ତୁରନ୍ତ ବିଜେପୁର ବିଡ଼ିଓଙ୍କୁ ରୀନାଙ୍କ ଆବଶ୍ୟକତତ୍ତ୍ଵ ନେବାକୁ ଫୋନ ଯୋଗେ ନିର୍ଦ୍ଦେଶ ଦେଇ ଯାହା ଆବଶ୍ୟକ ସବୁ କରାଯିବ ବୋଲି ପ୍ରତିଶ୍ରୁତି ଦେଇଥିଲେ । ଜିଲ୍ଲାପାଳଙ୍କ କାର୍ଯ୍ୟାଳୟ ବାହାରେ ବିଜେପୁର ବିଧାୟକ ସନତ ଗଡତିଆଙ୍କୁ ମହିଳା ସମିତିର ପ୍ରତିନିଧି ଦଳ ଭେଟି ଘଟଣା ସମ୍ପର୍କରେ ଅବଗତ କରାଇଥିଲେ । ସେ ମଧ୍ୟ ନିଶ୍ଚିତ ଭାବେ ଆବଶ୍ୟକ ଦାୟୀତ୍ୱ ତୁଲାଇବେ ବୋଲି ପ୍ରତିଶ୍ରୁତି ଦେଇଥିଲେ । ବରଗଡ଼ ମହିଳା ସମିତି ପକ୍ଷରୁ ଏହି ଘଟଣାର ପୋଲିସ ପ୍ରଶାସନ ସ୍ଵତନ୍ତ୍ର ଭାବେ ତଦନ୍ତ କରି ରୀନା ହାତ ହରାଇବା ପ୍ରସଙ୍ଗର ରହସ୍ୟ ଉନ୍ମୋଚନ କରିବା ସାଙ୍ଗକୁ ଦୋଷୀ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବାକୁ ଦାବି କରାଯାଇଛି । ଏହା ସାଙ୍ଗକୁ ଏହି ଗରିବ ପରିବାରକୁ ମୁଖ୍ୟମନ୍ତ୍ରୀ ସ୍ଵତନ୍ତ୍ର ଆର୍ଥିକ ସହାୟତା ଯୋଗାଇ ଏ ଦୁଃସ୍ଥିତିରେ ସହାୟ ହେବାକୁ ସମିତି ଅନୁରୋଧ ଜଣାଇଛି । ଏହି ପ୍ରତିନିଧି ଦଳରେ ସମିତିର ସଭାନେତ୍ରୀ ଅଞ୍ଜନା ଦାସ, ସମ୍ପାଦିକା ସୁଧାଂଶୁବାଲା ଦାସ, ବରିଷ୍ଠ ସଦସ୍ୟା ମମତା ମିଶ୍ର ଓ ମନ୍ଦାକିନୀ ପତି ପ୍ରମୁଖ ଯାଇଥିଲେ ।