ପାଟଣାଗଡ଼, (ଅଶୋକ କୁମାର ବାଗ) : ପାଟଣାଗଡ଼ ରେଞ୍ଜ ଅନ୍ତର୍ଗତ କୁକୁରମୁଣ୍ଡା କଉଡ଼ିଆ ରାସ୍ତାରେ ବେଆଇନ ଭାବେ ଦୁଇଟି ମିନିଟ୍ରକରେ କେନ୍ଦୁ ଓ ଖଇର ଗଣ୍ଡି ଟ୍ରାକ୍ଟର ମଧ୍ୟରେ ଲୋଡ଼ ହେଉଥିବା ସମୟରେ କୌଣସି ସୂତ୍ରରୁ ଖବର ପାଇ ବଲାଙ୍ଗିର ଏସିଏଫ୍ ଅଜିତ କୁମାର ବିସିଙ୍କ ନିର୍ଦ୍ଦେଶ କ୍ରମେ ପାଟଣାଗଡ଼ ରେଞ୍ଜର ଆନନ୍ଦ ଚନ୍ଦ୍ର ବିଶି ଓ ଟାଉନ ଫରେଷ୍ଟର ଗୁଣନିଧି ପରିଡା କର୍ମଚାରୀଙ୍କ ସହ କୁକୁରମୁଣ୍ଡା କଉଡ଼ିଆ ରାସ୍ତାରେ ପହଞ୍ଚି ଚୋରା କାଠ ଗଣ୍ଡି ଓ ଦୁଇଟି ମିନିଟ୍ରକ ଗାଡ଼ିକୁ ଧରିବାରେ ସଫଳ ହୋଇଥିବା ବେଳେ ଗଛ ମାଫିଆ ଓ ଗାଡି ଚାଳକମାନେ ଘଟଣା ସ୍ଥଳରୁ ଫେରାର ମାରିଥିଲେ । ୩ଟି ଗାଡିକୁ ଜବତ କରି ସ୍ଥାନୀୟ ବନ ବିଭାଗର କାର୍ଯ୍ୟାଳୟକୁ ଆଣି ଅଧିକ ତଦନ୍ତ ଜାରି ରଖିଛନ୍ତି । ଜବତ କାଠର ଆନୁମାନିକ ମୂଲ୍ୟ ଲକ୍ଷାଧିକ ଟଙ୍କା ହେବ ବୋଲି ଫରେଷ୍ଟର ଶ୍ରୀ ପରିଡା ସୂଚନା ଦେଇଛନ୍ତି ।