ଲୋଇସିଂହା, (ବିମଳେନ୍ଦୁ ସାହୁ) : ବଲାଙ୍ଗିର ଓ ଲୋଇସିଂହା ଫରେଷ୍ଟ ରେଞ୍ଜ ପକ୍ଷରୁ ମିଳିତ ଭାବେ ଗତକାଲି ଲୋଇସିଂହା ଥାନା ଅନ୍ତର୍ଗତ ବଘାପାଲି ଓ ବାଞ୍ଜିପାଲି ଗ୍ରାମରେ ଚଢ଼ାଉ କରାଯାଇ ବିପୁଳ ପରିମାଣର କାଠଗଣ୍ଡି, ପଟା ଓ ଯନ୍ତ୍ରପାତି ଜବତ କରାଯାଇଥିବା ଜଣାପଡିଛି । ବଘାପାଲି ଗ୍ରାମର ଶିବାଜଳ ରଣାଙ୍କ ଘରୁ ୧୦ ଘନଫୁଟ ଶାଗୁଆନ ଓ ଗମ୍ଭାରୀ କାଠପଟା, ୩ କ୍ୱିଣ୍ଟାଲ ଜାଳେଣି କାଠ ସମେତ ହାତ କରତ ଓ ଆବଶ୍ୟକ ଯନ୍ତ୍ରପାତି ଜବତ କରାଯାଇଛି । ସେହିପରି ବାଞ୍ଜିପାଲି ଗ୍ରାମର ଶ୍ରୀରାମ ସାହୁଙ୍କ ଘର ନିକଟସ୍ଥ ଜମିରୁ ୩୦ ଖଣ୍ଡ ଜାମୁ, ଲିମ୍ବ ଓ ଖିନ କାଠଗଣ୍ଡି ଜବତ କରାଯାଇଛି । ଏ ନେଇ ଉଭୟ ଶିବାଜଳ ରଣା ଓ ଶ୍ରୀରାମ ସାହୁଙ୍କ ନାମରେ ବନ ବିଭାଗ ପକ୍ଷରୁ ମାମଲା ରୁଜୁ କରାଯାଇଥିବା ଜଣାପଡିଛି ।
