- ଜୈବିକ ପଦ୍ଧତିରେ ହଳଦୀ ଚାଷ କରି ଲାଭବାନ୍ ହେଲେ ମହିଳା
- କମ୍ପାନୀ ଦ୍ୱାରା ଦେଶ ବିଦେଶରେ ପହଞ୍ଚିବ ହଳଦୀ
କନ୍ଧମାଳ, (ସୁରେନ୍ଦ୍ର କୁମାର ପାଣିଗ୍ରାହୀ) : କନ୍ଧମାଳ ଜିଲ୍ଲାରୁ ପ୍ରଥମ ଥର ପାଇଁ ଦେଶର ଏକ ବଡ଼ ବ୍ୟବସାୟିକ ଅନୁଷ୍ଠାନ କନ୍ଧମାଳ ହଳଦୀକୁ ଉଚ୍ଚ ଦରରେ କ୍ରୟ କରି ଚାଷୀଙ୍କ ମନରେ ଆଶା ସଞ୍ଚାର କରିଛି । ହଳଦୀ ଚାଷୀମାନେ କମଦର ଯୋଗୁଁ ହଳଦୀ ଚାଷ କରିବାକୁ ଆଗ୍ରହ ପ୍ରକାଶ ନକରି କ୍ରମେ ସେମାନେ ମକା ଓ ଉଦ୍ୟାନ ଚାଷ ପ୍ରତି ମନ ବଳାଉଥିଲେ । ତେବେ ଭାରତ ସରକାରଙ୍କ ଆଦିବାସୀ ବ୍ୟାପାର ମନ୍ତ୍ରଣାଳୟର ଆଦିବାସୀ ସମବାୟ ମାର୍କେଟିଂ ଡେଭଲପ୍ମେଣ୍ଟ ଫେଡେରେସନ ଅଫ ଇଣ୍ଡିଆ ଜରିଆରେ ଆଇଟିସି (ଇଣ୍ଡିଆ ଟବାକୋ କମ୍ପାନୀ ଲିମିଟେଡ୍) ଆଦିବାସୀ ମହିଳାଙ୍କ ଠାରୁ ହଳଦୀ ଉଚ୍ଚ ଦରରେ କ୍ରୟ କରିଛି, ଯାହାଦ୍ୱାରା ଚାଷୀମାନେ ଉତ୍ସାହିତ ହୋଇଛନ୍ତି । ଦାରିଙ୍ଗବାଡି ବ୍ଲକ ଶ୍ରାନିକେତା ପଞ୍ଚାୟତ ସୁଲୁମାହା ଗ୍ରାମର ପ୍ରଗତି ବନ ଧନ ବିକାଶ କେନ୍ଦ୍ରର ମହିଳା ସ୍ୱୟଂ ସହାୟକ ଗୋଷ୍ଠୀଙ୍କ ଠାରୁ ୧୫ ମେଟ୍ରିକ ଟନ୍ ହଳଦୀ ଅଧିକାରୀ ମାନେ ହଳଦୀ ପରିବହନ କରୁଥିବା ଆଇଟିସି କ୍ରୟ କରିଛି । ଏହାର ମୂଲ୍ୟ ୨୫ ଲକ୍ଷ ଟଙ୍କାରୁ ଅଧିକ ସବୁତକ ଅର୍ଥ ଏହି ସଂସ୍ଥା ସ୍ଵୟଂ ସହାୟକ ଗୋଷ୍ଠୀକୁ ପ୍ରଦାନ କରିଛି । ଏବେ ହଳଦୀକୁ ଚାଷୀ ବଜାରରେ ମାତ୍ର ୧୧୦ ଟଙ୍କାରେ ବିକ୍ରି କରୁଥିବା ବେଳେ ଆଇଟିସି କମ୍ପାନୀ ମହିଳା ଚାଷୀଙ୍କଠାରୁ ୧୬୮ ଟଙ୍କାରେ ଏହା କ୍ରୟ କରିଛି । ବାଲିଗୁଡା ଆଇଟିଡିଏ ପ୍ରକଳ୍ପ ପ୍ରଶାସକ କୃପାସିନ୍ଧୁ ବେହେରାଙ୍କ ତତ୍ତ୍ୱାବଧାନରେ ଭେଲୁଗୁ ଆସୋସିଏସନ ପକ୍ଷରୁ ପ୍ରଥମ ହଳଦୀ ବୋଝେଇ ଟ୍ରକ୍ ସୁଲୁମାହାରୁ ବାହାରିଛି । ଏହାକୁ ଅଧିକାରୀ ମାନେ ପତାକା ଦେଖାଇ ଶୁଭାରମ୍ଭ କରିଥିଲେ । ଏହି କମ୍ପାନୀ ଦ୍ୱାରା ସାରା ଦେଶ ଓ ବିଦେଶକୁ ଏହି ହଳଦୀ ବିଭିନ୍ନ ଉପାୟରେ ପହଞ୍ଚିପାରିବ ବୋଲି ସେ କହିଛନ୍ତି । ଅନୁଷ୍ଠିତ ବୈଠକରେ ପ୍ରକଳ୍ପ ପ୍ରଶାସକ ଶ୍ରୀ ବେହେରା ଆଦିବାସୀ ସମବାୟ ମାର୍କେଟିଂ ଡେଭଲପ୍ମେଣ୍ଟ ଫେଡେରେସନ ଅଫ ଇଣ୍ଡିଆର ଆଞ୍ଚଳିକ ପରିଚାଳକ ରାହୁଲ କୁମାର, ଦେବାଶିଷ ନନ୍ଦ, କମ୍ବୁପାଣି ବାବୁ ଭେଲୁଗୁ ଆସୋସିଏସନ ସମ୍ପାଦକ ବି.ସଞ୍ଜୀବ ରାଓ, ପ୍ରକଳ୍ପ ସଂଯୋଜକ ତିରୂପତି ରାଓ, ଆଞ୍ଚଳିକ ସଂଯୋଜକ ଜୀବନ୍ତ ନାୟକ ପ୍ରମୁଖ ଯୋଗଦେଇ ପ୍ରଗତିବନ ଧନ ବିକାଶ କେନ୍ଦ୍ରର ମହିଳାଙ୍କୁ ଜୈବିକ ହଳଦୀ ଚାଷ ସମ୍ପର୍କରେ ବିଭିନ୍ନ ପରାମର୍ଶ ଦେଇଥିଲେ । ଏହି ଅବସରରେ ଜୈବିକ ପଦ୍ଧତିରେ ହଳଦୀ ଚାଷ ପାଇଁ କୃଷି ବୈଜ୍ଞାନିକଙ୍କ ଦ୍ୱାରା ଲିଖିତ ପୁସ୍ତକ ଉନ୍ମୋଚନ କରାଯାଇଥିଲା । ଉପସ୍ଥିତ କେନ୍ଦ୍ରର ମହିଳା ମାନେ ସେମାନଙ୍କୁ ଏକ ଦୋକାନ ଗୃହ ସହ ଗୋଦାମ ଗୃହ ଯୋଗାଇ ଦେବାକୁ ପ୍ରସ୍ତାବ ଦେଇଥିଲେ । ଏହା ହେଲେ ଆହୁରି ଅଧିକ ହଳଦୀ ଚାଷ କରି ଗୋଦାମରେ ଗଚ୍ଛିତ ରଖିବା ସହ ତାକୁ ପ୍ରସ୍ତୁତି କରି ବିକ୍ରି କରିବା ଲାଗି ସୁବିଧା ହେବ ବୋଲି କହିଥିଲେ । ଏ ଦିଗରେ ପଦକ୍ଷେପ ନେବେ ବୋଲି ପ୍ରକଳ୍ପ ପ୍ରଶାସକ ଶ୍ରୀ ବେହେରା ପ୍ରତିଶୃତି ଦେଇଥିଲେ ।