ରାୟଗଡ଼ା, (ଅକ୍ଷୟ କୁମାର ପିଡ଼ିସିକା) : ରାୟଗଡା ଜିଲ୍ଲା କଲ୍ୟାଣସିଂହପୁର ବ୍ଲକ ପଲମା ପଞ୍ଚାୟତର କୁସବେଟି ଓ ସାତବିଶି ମଝି ବୁଲାଣି ରାସ୍ତା ନିକଟରେ ନକଲି ମଦ ଚୋରା ଚାଲାଣ ବେଳେ ଗଛକୁ ପିଟିଲା ବୋଲେରୋ । ସୂଚନା ମୁତାବକ ଦୀପାବଳି ଚାଲିଥିବା ବେଳେ ବେପାରୀମାନେ ଏହାର ସୁଯୋଗ ନେଇ ବେଆଇନ ଭାବେ ଚୋରା ବେପାରୀଙ୍କୁ ମଦ ଯୋଗଉଥିବା ବେଳେ ଏହି ଦୁର୍ଘଟଣା ଘଟିଛି । ଘଟଣାସ୍ଥଳରେ ଡ୍ରାଇଭର ରବୀନ୍ଦ୍ର ଅଝା (୪୦)ଙ୍କ ଅବସ୍ଥା ଗୁରୁତର ଥିବାରୁ ତାଙ୍କୁ ରାୟଗଡା ମେଡିକାଲରେ ଭର୍ତ୍ତି କରାଯାଇଥିଲା । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ମୃତ ରବୀନ୍ଦ୍ରଙ୍କ ଗାଁ ଚମ୍ପୁଆ ଥାନା କୁଟୁମ୍ବା ଜିଲ୍ଲା ଅରୁଙ୍ଗାବାଦ ବିହାର ବୋଲି ସୂଚନା ମିଳିଥିବା ବେଳେ ତାଙ୍କ ସହଯୋଗୀ ମହାଡେଭ ପୋଷ୍ଟ ତଣ୍ଡୁବା ଜିଲ୍ଲା ଅରୁଙ୍ଗାବାଦ ବିହାରର ସୋନୁ କୁମାର ସିଂ (୨୬) ବୋଲି ଜଣାପଡ଼ିଛି । ଘଟଣାସ୍ଥଳରେ କଲ୍ୟାଣସିଂହପୁର ପୁଲିସ ଏସ୍ଆଇ ପୁରୁଷୋତ୍ତମ ଯାନୀ ଓ ଏଏସ୍ଆଇ ଶିବରାମ ସ୍ୱାଇଁ ପହଞ୍ଚି ଦୁର୍ଘଟଣାଗ୍ରସ୍ତ ବୋଲେରୋ ଗାଡି ଓଡ଼ି ୦୫ଇ ୩୨୫୫କୁ ଜବତ କରି କେସ ନଂ ୨୮/୨୪ ବିଏନ୍ଏସ୍ ୧୧୯/୨୪, ୧୨୫ଏ/୧୨୫ବି/୧୦୬ଏ ଅନୁସାରେ ରୁଜୁ କରିଥିବା ଥାନା ଅଧିକାରୀ ନୀଳକଣ୍ଠ ବେହେରା କହିଛନ୍ତି ।