ବ୍ରହ୍ମପୁର, (କେ.ସତ୍ୟନାରାୟଣ ରେଡ୍ଡୀ) : ହତ୍ୟାକାଣ୍ଡରେ ସଂପୃକ୍ତ ଥିବା ବହୁ ବର୍ଷ ଧରି ଆତ୍ମଗୋପନ କରିଥିବା ଅପରାଧୀ ଶଙ୍କର ବେହେରା ଓରଫ୍ କୋକୋଙ୍କୁ ଗିରଫ କରିଛି ଗୋଷାଣିନୂଆଁଗାଁ ଥାନା ପୋଲିସ । ଦୁଇ ଦିନ ତଳେ ସେସନ୍ କୋର୍ଟଙ୍କ ନିର୍ଦ୍ଦେଶ କ୍ରମେ ଶଙ୍କରଙ୍କ ନେହେରୁନଗରରେ ଥିବା ତାଙ୍କ ବାସଭବନର ସମସ୍ତ ସ୍ଥାବର ଓ ଅସ୍ଥାବର ସମ୍ପତ୍ତିକୁ ପୋଲିସ ଜବତ କରିଥିଲା । ଫଳରେ ଖବର ପାଇ ଶଙ୍କର ବିଳମ୍ବିତ ରାତ୍ରୀରେ ପରିବାର ସଦସ୍ୟଙ୍କୁ ଦେଖା କରିବାକୁ ଆସିଥିବା ବେଳେ କୌଣସି ସୂତ୍ରରୁ ଗୋଷାଣିନୂଆଁଗାଁ ପୋଲିସ ଖବର ପାଇ ଶଙ୍କରକୁ ଗିରଫ କରିବାରେ ଆଜି ସକାଳୁ ସଫଳ ହୋଇଛି । ସୂଚନାଯୋଗ୍ୟ ଯେ, ଶଙ୍କର ବେହେରା ଗତ ୨୦୦୬ ମସିହା ଅକ୍ଟୋବର ମାସରେ ବ୍ରହ୍ମପୁର ରେଳ ଷ୍ଟେସନ ସ୍ଥିତ କାଳୀ ମନ୍ଦିର ନିକଟରେ ହୋଇଥିବା ଗଣେଶ ସାହୁ ହତ୍ୟାକାଣ୍ଡରେ ସେ ସଂପୃକ୍ତ ଥିଲା ବୋଲି ପୋଲିସ କହିଛି । ପରେ ୨୦୦୯ ମସିହାରେ ମାନ୍ୟବର କୋର୍ଟ ତାଙ୍କ ନାମରେ ୱାରେଣ୍ଟ ଜାରି କରିଥିଲେ । ସେହିଦିନଠାରୁ ଶଙ୍କର ଫେରାର ଥିଲା ବୋଲି ପୋଲିସ ପକ୍ଷରୁ କୁହାଯାଇଛି । ଆଜି ଦୀର୍ଘ ୧୭ ବର୍ଷ ପରେ ଶଙ୍କର ବେହେରାଙ୍କୁ ପୋଲିସ ଗିରଫ କରିବାରେ ସଫଳ ହୋଇଛି ।