ରାଉରକେଲା, (ସସ୍ମିତା ପ୍ରଧାନ) : ଆଇରନ୍ ବୋଝେଇ ଟ୍ରକ୍ର ଚାଳକଙ୍କୁ ମାଡ଼ପିଟ୍ କରିବା ସହ ତାଙ୍କ ପାଖରୁ ନଗଦ ଟଙ୍କା ଓ ଚାଲାନ୍ କାଗଜପତ୍ର ଏବଂ ଟ୍ରକ୍ ଲୁଟି ନେବା ଘଟଣାରେ ଲାଠିକଟା ଥାନା ପୁଲିସ୍ ଦୁଇ ଜଣଙ୍କୁ ଗିରଫ କରିଛି । ଗିରଫ ଦୁଇ ଜଣ ହେଲେ ସାରନଗରୀ ଅଞ୍ଚଳର । ସେମାନଙ୍କ ପାଖରୁ ଆଇରନ୍ ବୋଝେଇ ଟ୍ରକ୍ ପୁଲିସ ଜବତ କରିଛି । ଏନେଇ ଲାଠିକଟା ଥାନା ପୁଲିସ୍ ମାମଲା ରୁଜୁ କରି କୋର୍ଟ ଚାଲାଣ କରିଛି ।
ସୂଚନା ଯୋଗ୍ୟ ଯେ, ଶନିବାର ଭୋର ସମୟରେ ଟ୍ରକ୍ ନଂ.ଓଡ଼ି୦୫ବିଏ-୪୮୪୧ ଯୋଗେ ଆଇରନ୍ ବୋଝେଇ ହୋଇ କଲୁଙ୍ଗା ଶିଳ୍ପାଞ୍ଚଳରେ ଥିବା ମହାବୀର ଫେରୋ ଆଲୋଏଜ କାରଖାନାକୁ ଆସୁଥିଲା । ଟ୍ରକ୍ଟି ସକାଳ ୬ଟା ସମୟରେ ୧୪୩ ନଂ.ଜାତୀୟ ରାଜପଥ ଦେଇ ଆସୁଥିଲା । ବାଇକ୍ ନଂ.ଓଡ଼ି୧୪କେ-୧୨୦୩ ଯୋଗେ ସକାଳ ପ୍ରାୟ ୬ଟା ସମୟରେ ଲାଠିକଟା ଥାନା ଅନ୍ତର୍ଗତ ତୁରିବେର୍ଣ୍ଣା ଛକରେ ଟ୍ରକ୍କୁ ଅଟକାଇଥିଲେ । ଗାଡ଼ି ଚାଳକ ଟୁଲୁ ପରିଡ଼ା ଗାଡ଼ି ଛିଡ଼ା କରିବା କ୍ଷଣି ୨ ଲୁଟେରା ଟୁଲୁଙ୍କୁ ଗାଳିଗୁଲଜ କରିବା ସହ ନଗଦ ୫ ହଜାର ଟଙ୍କା, ଚାଲାନ୍ କାଗଜପତ୍ର ସହ ଟ୍ରକ୍କୁ ଲୁଟି ନେଇଥିଲେ । ଘଟଣା ସମ୍ପର୍କରେ ଟ୍ରକ୍ ଚାଳକ ଟୁଲୁ ଲାଠିକଟା ଥାନାରେ ଲିଖିତ ଅଭିଯୋଗ କରିଥିଲେ । ପୁଲିସ୍ ଘଟଣାର ତଦନ୍ତ କରି ୨ ଲୁଟେରାଙ୍କୁ ଗିରଫ କରିବା ସହ ସେମାନଙ୍କ ପାଖରୁ ଚୋରି ଟ୍ରକ୍ ଜବତ କରିଥିଲା ।