ମଠଖାଇ ମହୋତ୍ସବ-୨୦୨୩ର ତୃତୀୟ ସଂଧ୍ୟାରେ ମଂଚସ୍ଥ ହେଲା ଓଡ଼ିଆ ନାଟକ ‘ଫୁଲ୍ ଟେନ୍ସନ୍’ : ମଠଖାଇ ସମ୍ମାନରେ ସମ୍ମାନିତ ହେଲେ ମଂଚ କଳାକାର ଶ୍ରୀମତୀ କନକ ଦଣ୍ଡସେନା
ବଲାଙ୍ଗିର, (କେପିଏନ୍ଏସ୍) : ସର୍ବଭାରତୀୟ ନାଟକ ମହୋତ୍ସବ ମଠଖାଇ ମହୋତ୍ସବ-୨୦୨୩ର ତୃତୀୟ ସଂଧ୍ୟାରେ ମଂଚସ୍ଥ ହୋଇଛି ଓଡ଼ିଆ ନାଟକ ‘ଫୁଲ୍ ଟେନ୍ସନ୍’ । ଏହି ନାଟକକୁ ପରିବେଷଣ କରିଛନ୍ତି ଭୁବନେଶ୍ୱରର ‘ପଞ୍ଚମବେଦ’ ଅନୁଷ୍ଠାନ । ଆନନ୍ଦ ଚନ୍ଦ୍ର ପହିଙ୍କ ଲିଖିତ ତଥା ହରେନ୍ ସାହୁଙ୍କ ନିର୍ଦ୍ଦେଶିତ ଏହି ନାଟକ ବେଶ୍ ଚିତ୍ତାକର୍ଷକ ହୋଇଥିବା ଦର୍ଶକମାନେ ମତ ଦେଇଛନ୍ତି । ନାଟକ ପ୍ରଦର୍ଶନ ପୂର୍ବରୁ ଅନୁଷ୍ଠିତ ସାଧାରଣ ସଭାରେ ଓଡ଼ିଶା ସରକାରଙ୍କ ଜଳ ସଂପଦ ବିଭାଗୀୟ ମନ୍ତ୍ରୀ ଶ୍ରୀମତୀ ଟୁକୁନି ସାହୁ ମୁଖ୍ୟ ଅତିଥି ଭାବେ ଯୋଗ ଦେଇଥିବା ବେଳେ ସମ୍ମାନିତ ଅତିଥି ଭାବେ ବଲାଙ୍ଗିର ଜିଲ୍ଲାପାଳ ଚଞ୍ଚଳ ରାଣା ଓ ଏସ୍ପି ନୀତିନ କୁଶଲ୍କର ଯୋଗ ଦେଇଛନ୍ତି । ଅତିଥିମାନଙ୍କ ସହ ମଂଚାସୀନ ହୋଇଛନ୍ତି ମଠଖାଇ ମହୋତ୍ସବ କମିଟିର ଅଧ୍ୟକ୍ଷ ତଥା ବଲାଙ୍ଗିର ବିଧାୟକ ନରସିଂହ ମିଶ୍ର, ‘ଭୂମିକା’ର ବରିଷ୍ଠ ସଦସ୍ୟ ବିରେନ୍ଦ୍ର ବନଛୋର ଓ ନୟନ ମହାନ୍ତି । ଆଜିର ସଂଧ୍ୟାରେ ମଂଚ କଳାକାର ଶ୍ରୀମତୀ କନକ ଦଣ୍ଡସେନାଙ୍କ ମଠଖାଇ ସମ୍ମାନ ପ୍ରଦାନ କରାଯାଇଛି ।
