ଖପ୍ରାଖୋଲ, (ଅଶୋକ କୁମାର ବାଗ) : ବଲାଙ୍ଗିର ଜିଲ୍ଲା ରେଙ୍ଗାଲି ପଞ୍ଚାୟତ ଅନ୍ତର୍ଗତ ଆମବାହାଲି ଗ୍ରାମ ନିକଟରେ ଭାରସାମ୍ୟ ହରାଇ ଏକ ନିମ୍ବ ଗଛରେ ପିଟି ହେବା ଫଳରେ ଜଣେ ବାଇକ ଆରୋହୀଙ୍କର ଘଟଣାସ୍ଥଳରେ ମୃତ୍ୟୁ ହୋଇଛି । ମୃତକ କନ୍ଦ୍ରାଭଟା ଗ୍ରାମର ଖଗ ଭୁଏଙ୍କ ପୁତ୍ର କେଶବ ଭୁଏ (୨୫) ବୋଲି ଜଣାପଡିଛି । ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ଅଧିକ ତଦନ୍ତ ଜାରି ରଖିଛି । ମିଳିଥିବା ସୂଚନା ଅନୁଯାୟୀ ମୃତକ କେଶବ ଦୁର୍ଗେଖୋଲ ନିଜ ମାମୁ ଘର ଗାଁକୁ ଯାଇଥିଲେ । ସେଠାରୁ ଯାତ୍ରା ଦେଖି ଶୁକ୍ରବାର ସନ୍ଧ୍ୟା ସମୟରେ ନିଜ ଗାଁ କନ୍ଦ୍ରାଭଟାକୁ ଫେରୁଥିବା ସମୟରେ ଦୁର୍ଘଟଣାରେ ତାଙ୍କ ମୃତ୍ୟୁ ହୋଇଥିବା ଜଣାପଡିଛି । ଘରର ଏକମାତ୍ର ରୋଜଗାରିଆ ମଣିଷର ମୃତ୍ୟୁ ଘଟିଛି । କାନ୍ଦବୋବାଳିରେ ଫାଟି ପଡୁଛି ପୂରା ପରିବାର । ସ୍ତବ୍ଧ ହୋଇଯାଇଛନ୍ତି ସମ୍ପର୍କୀୟ ଓ ପରିଜନ । ଆଖିରୁ ଶୁଖୁନି ଲୁହ । ଗୁରୁତ୍ୱପୂର୍ଣ୍ଣ କଥା ହେଉଛି ଯାହାର ମୃତ୍ୟୁ ହୋଇଛି ସେ ମୂଲ ଲାଗିଲେ ପରିବାର ଚଳେ । ଦିନେ କାମକୁ ନଗଲେ ଚଳିବା ମୁସ୍କିଲ, ଘରେ ତାଙ୍କର ୩ ମାସର ଗୋଟିଏ କନ୍ୟା ସନ୍ତାନ, ଦୁଇଟି ଭଉଣୀ, ସ୍ତ୍ରୀ ଏବଂ ବୃଦ୍ଧ ମାଁବାପା ସେମାନେ ଚଳିବେ କିପରି । ଏନେଇ ଲାଠୋର ଥାନା କେସ ନଂ ୨୬୫/୨୦୨୪ରେ ଏକ ମାମଲା ଋଜୁ କରି ଅଧିକ ତଦନ୍ତ ଜାରି ରଖିଥିବା ଲାଠୋର ଏଏସ୍ଆଇ ରୁବ୍ରତ ନାଗ ସୂଚନା ଦେଇଛନ୍ତି ।