ବଡବିଲ : ଭାରସାମ୍ୟ ହରାଇ ଦୋକାନ ଭିତରକୁ ପଶିଗଲା ୧୬ ଚକିଆ ହାଇୱା । ଗାଡି ଚଲାଉଥିଲେ ହେଲ୍ପର । ଘଟଣାସ୍ଥଳରେ ତଦନ୍ତ କରୁଛି ପୋଲିସ । ସୂଚନାଯୋଗ୍ୟ ଯେ, ରବିବାର ବିଳମ୍ବିତ ରାତି ପ୍ରାୟ ସାଢେ ୧୨ଟା ସମୟରେ ବଡ଼ବିଲ ପିଏଚ୍ଡି ରୋଡ୍ ଭଞ୍ଜ କଲୋନୀ ଛକ ନିକଟରେ ଏହି ଦୁର୍ଘଟଣା ଘଟିଛି । ୧୬ ଚକିଆ ହାଇୱାଟି ଦ୍ରୁତ ଗତିରେ ପିଏଚ୍ଡି ପଟୁ ଟାଉନ୍ ପଟକୁ ଆସୁଥିବା ସମୟରେ ଭଞ୍ଜ କଲୋନୀ ଛକ ନିକଟ ଟଣ୍ଡିଂରେ ଭାରସାମ୍ୟ ହରାଇ ବସିଥିଲା । ଯାହା ଫଳରେ ରାସ୍ତାର ଡାହାଣ ପାଶ୍ୱକୁ ମାଡ଼ିଯାଇ ସେଠାରେ ଥିବା ୩ଟି ଦୋକାନକୁ ଭାଙ୍ଗି ଭିତରକୁ ପଶି ଯାଇଥିଲା । ତେବେ ହାଇୱାକୁ ଗାଡ଼ିର ହେଲ୍ପର୍ ଚଲାଉଥିବା ଯୋଗୁଁ ଏଭଳି ଦୁର୍ଘଟଣା ଘଟିଲା ବୋଲି କୁହାଯାଉଛି । ଏନେଇ ଖବର ପାଇବା ପରେ ବଡ଼ବିଲ ପୋଲିସ ଘଟଣାର ତଦନ୍ତ ଜାରି କରିଛି ।