ଡେଲାଙ୍ଗ, (ଦିଲ୍ଲୀପ କୁମାର ଧାଉଡିଆ) : ପ୍ରତିବର୍ଷ ସେପ୍ଟେମ୍ବର ୨ରେ ‘ବିଶ୍ୱ ନଡ଼ିଆ ଦିବସ’ ପାଳନ କରାଯାଏ । ନଡ଼ିଆ ହେଉଛି ଏକ ଗୁରୁତ୍ୱପୂର୍ଣ୍ଣ ଉଷ୍ମ ମଣ୍ଡଳୀୟ ଲାଭକାରୀ ଫସଲ । ନଡ଼ିଆ ଗଛର ଉତ୍ପତ୍ତି ଦକ୍ଷିଣ ପୂର୍ବ ଏସିଆ ବୋଲି କୁହାଯାଏ । ଆରବ ନାବିକ ମାନଙ୍କ ମାଧ୍ୟମରେ ଭାରତ ସମେତ ଦକ୍ଷିଣ ପୂର୍ବ ଏସିଆରୁ ପୂର୍ବ ଆଫ୍ରିକାର ଉପକୂଳ ପର୍ଯ୍ୟନ୍ତ ନଡ଼ିଆ ବ୍ୟାପିବାରେ ଲାଗିଲା । ନଡ଼ିଆ ଗଛ ଖାଦ୍ୟ, ଇନ୍ଧନ, ପ୍ରସାଧନ ସାମଗ୍ରୀ, ଔଷଧ ଏବଂ ନିର୍ମାଣ ସାମଗ୍ରୀ ଇତ୍ୟାଦି ଯୋଗାଇଥାଏ । ନଡ଼ିଆ ଅନ୍ୟ ଫଳ ଠାରୁ ଭିନ୍ନ କାରଣ ଏଥିରେ ଅତ୍ୟାବଶ୍ୟକ ପୋଷଣ ଦ୍ରବ୍ୟ ସମୃଦ୍ଧ ‘ନଡିଆ ପାଣି’ ଥାଏ । ନଡ଼ିଆକୁ ଖାଇବା ଖାଦ୍ୟ ଭାବରେ ବ୍ୟବହାର କରାଯାଇପାରେ, କିମ୍ବା ତେଲ ପାଇଁ ପ୍ରକ୍ରିୟାକରଣ କରାଯାଇପାରେ ଏବଂ ନଡ଼ିଆ କ୍ଷୀର ମଧ୍ୟ ସଂଗ୍ରହ କରାଯାଇପାରେ । ନଡ଼ିଆର କଠିନ ବାହ୍ୟ ଆବରଣ ତଥା କତାରୁ ଅଙ୍ଗାର ମଧ୍ୟ ସୃଷ୍ଟି କରାଯାଇପାରିବ । ନଡ଼ିଆ ତେଲ ସାଧାରଣତଃ କେରଳରେ ଏବଂ ଅନ୍ୟାନ୍ୟ ସ୍ଥାନରେ ରାନ୍ଧିବାରେ ବ୍ୟବହୃତ ହୁଏ । ଏହା ସାବୁନ୍ ଏବଂ ପ୍ରସାଧନ ସାମଗ୍ରୀରେ ମଧ୍ୟ ବ୍ୟବହୃତ ହୁଏ । ମଧୁର ନଡ଼ିଆ ରସରୁ ପାନୀୟ ସାମଗ୍ରୀ ତିଆରି କରାଯାଇ ପାରେ । ନଡିଆ ଗଛର ସୁଦୀର୍ଘ ପତ୍ର କଠିନ ଆବରଣ ଏବଂ କତାରୁ ଅନେକ ଆସବାବପତ୍ର ତିଆରି ହୁଏ । ଆଣ୍ଟିଅକ୍ସିଡାଣ୍ଟର ଉତ୍ସ ଭାବରେ ନଡ଼ିଆ ଖାଇବା ଏବଂ ଏହାର ପାଣି ପିଇବା ଦ୍ୱାରା ରୋଗ ପ୍ରତିରୋଧକ ଶକ୍ତି ବଢିଥାଏ । ମଧୁମେହ ପାଇଁ ନଡ଼ିଆ ଉତ୍ତମ ଅଟେ କାରଣ ଏହା
କମ୍ କ୍ୟାଲୋରୀ ଏବଂ ଅଧିକ ତନ୍ତୁ ଯୁକ୍ତ ଅଟେ । ମଧୁମେହ ରୋଗୀମାନେ ନଡ଼ିଆ ଖାଇ ସେମାନଙ୍କ ରକ୍ତରେ ଶର୍କରା ସ୍ତର କମାଇ ପାରିବେ । କେଶ ବୃଦ୍ଧି ପାଇଁ ନଡିଆ ତେଲ ଚମତ୍କାର ଅଟେ । ମଶା କାମୁଡ଼ିବା ଠାରୁ ଆରମ୍ଭ କରି ସମସ୍ତ ପ୍ରକାରର ଚର୍ମ ରୋଗ, ଘା’ ଏବଂ କ୍ଷତର ଉପଶମ ପାଇଁ ନଡ଼ିଆ ତେଲ ବହୁତ ଉପଯୋଗୀ ଅଟେ । ଲୌହ, ମ୍ୟାଗ୍ନେସିୟମ୍, ତନ୍ତୁ ଏବଂ ପ୍ରୋଟିନ୍ ପରିମାଣ ନଡ଼ିଆରେ ଅଧିକ ଥାଏ । ନଡିଆ ପାଣିରେ ପୋଟାସିୟମ୍ ଏବଂ ସୋଡିୟମ୍ ଭରପୂର ଥାଏ । ୨୦୨୪ ପାଇଁ ଥିମ୍ ହେଉଛି ‘ଏକ ବୃତ୍ତାକାର ଅର୍ଥନିତି ପାଇଁ ନଡିଆ: ସର୍ବାଧିକ ମୂଲ୍ୟ ପାଇଁ ଭାଗିଦାରୀ ନିର୍ମାଣ’ । ଏହା ନଡିଆ ଶିଳ୍ପରେ ସ୍ଥିରତା ଏବଂ ସହଭାଗିତା ଉପରେ ଧ୍ୟାନ ଦେବା ପାଇଁ ଉଦ୍ଧିଷ୍ଟ ଅଟେ । ନଡ଼ିଆ କେବଳ ଧାର୍ମିକ ପ୍ରତୀକ ନୁହେଁ, ଏହା ଶୁଭତା, ସମୃଦ୍ଧତା, ଶାନ୍ତି ଏବଂ ପ୍ରଗତିର ଏକ ବାର୍ତ୍ତା ଭାବରେ ବିବେଚନା କରାଯାଏ । ଯେକୌଣସି ଶୁଭ କାର୍ଯ୍ୟରେ ଏବଂ ଧର୍ମାନୁଷ୍ଠାନ ତଥା ମନ୍ଦିର ପରିଦର୍ଶନ ବେଳେ ପ୍ରଥମେ ନଡ଼ିଆ ସମର୍ପଣ କରି ମଙ୍ଗଳ କାର୍ଯ୍ୟକ୍ରମ ଆରମ୍ଭ କରାଯାଏ । ମହତ୍ଵ ପୂର୍ଣ୍ଣ ଉତ୍ସବରେ ଯଥା ବିବାହ ଏବଂ ବିଦାୟ ମାନଙ୍କରେ ନଡ଼ିଆ ବଣ୍ଟନ କରାଯାଏ ସମ୍ମାନ ଏବଂ ଶୁଭେଚ୍ଛାର ପ୍ରତୀକ ଭାବରେ ।