ଡେଲାଙ୍ଗ, (ଦିଲ୍ଲୀପ କୁମାର ଧାଉଡିଆ) : କୋରାଲ୍ ତ୍ରିକୋଣ ପ୍ରାୟ ୩୨ ଲକ୍ଷ ୧୮ ହଜାର ୭୦୦ କିଲୋ ମିଟରରୁ ଅଧିକ ଅଞ୍ଚଳ ବ୍ୟାପି ରହିଥିବା ଏକ ସାମୁଦ୍ରିକ ଦୃଶ୍ୟପଟ୍ଟ ଯାହା ପଶ୍ଚିମ ପ୍ରଶାନ୍ତ ମହାସାଗରରେ ଅବସ୍ଥିତ । ପୃଥିବୀର ୭୫ %ରୁ ଅଧିକ ଜାତିର କୋରାଲ୍ ଏଥିରେ ବାସ କରନ୍ତି । ୧୯୫୦ ମସିହାରୁ ବୈଜ୍ଞାନିକମାନେ ଦର୍ଶାଇଛନ୍ତି ଯେ, ବିଭିନ୍ନ କାରଣ ଯୋଗୁଁ କୋରାଲ୍ ଜନସଂଖ୍ୟା ଅଧାକୁ ହ୍ରାସ ପାଇଛି । ବିଶ୍ଵ ଜଳବାୟୁ ପରିବର୍ତ୍ତନ, ସାମୁଦ୍ରିକ ପ୍ରଦୂଷଣ, ଅତ୍ୟଧିକ ମତ୍ସ୍ୟ ଉତ୍ପାଦନ, କୋରାଲ୍ ଉତ୍ତୋଳନ ଏବଂ ଅନ୍ୟାନ୍ୟ ମାନବୀୟ କାର୍ଯ୍ୟକଳାପ ହେତୁ ସମୁଦ୍ରର ଏହି ଗୁରୁତ୍ୱପୂର୍ଣ୍ଣ ଜୈବ ସମ୍ପଦ ନଷ୍ଟ ହେବାରେ ଲାଗିଛି । ‘କୋରାଲ୍ ତ୍ରିକୋଣ ଦିବସ’ ପାଳନର ମୁଖ୍ୟ ଉଦ୍ଦେଶ୍ୟ ହେଉଛି ବିଶ୍ଵର କୋରାଲ୍ ଜୈବ ବିବିଧତାର ଅବକ୍ଷୟକୁ ରୋକିବା ପାଇଁ ଅଧିକ ଧ୍ୟାନ ଆକର୍ଷଣ କରିବା । ୨୦୧୨ରେ କୋରାଲ୍ ତ୍ରିକୋଣ ଦିବସ ପାଳନର ଉଦ୍ଘାଟନୀ ଉତ୍ସବ ଅନୁଷ୍ଠିତ ହୋଇଥିଲା ଯେତେବେଳେ ଏହା କୋରାଲ୍ ରିଫସ୍, ମତ୍ସ୍ୟଚାଷ ଏବଂ ଖାଦ୍ୟ ସୁରକ୍ଷା (ସିଟିଆଇ-ସିଏଫଏଫ) ଉପରେ କୋରାଲ୍ ତ୍ରିକୋଣ ଉଦ୍ୟମର ପ୍ରୟାସ ଦ୍ୱାରା ପ୍ରତିଷ୍ଠିତ ହୋଇଥିଲା । ଏହି କାର୍ଯ୍ୟକ୍ରମଟି ବିଶ୍ୱ ମହାସାଗର ଦିବସ (ଜୁନ ୮)ର ଗୋଟିଏ ଦିନ ପରେ ସାମୁଦ୍ରିକ ଜୈବ ବିବିଧତା ପାଇଁ ସଂରକ୍ଷଣ ତଥା ଯତ୍ନ ନେବା ଉପରେ ପ୍ରଭାବଶାଳୀ ଧ୍ୟାନ ଯୋଗାଇବା ଲାଗି ଉଦ୍ଦିଷ୍ଟ ଥିଲା । କୋରାଲ୍ ତ୍ରିକୋଣ ଦିବସ ପାଳନ ମଧ୍ୟ ‘ମହାସାଗର ବିହିତ କାର୍ଯ୍ୟାନୁଷ୍ଠାନ ଆବଶ୍ୟକତା କରେ’ ନାମକ ଏକ ବୃହତ ଅଭିଯାନର ଏକ ଅଂଶ, ଯାହା ମଣିଷ ଦ୍ଵାରା ସୃଷ୍ଟି ହେଉଥିବା ବିପଦ ସମସ୍ୟାର ସମାଧାନ ପାଇଁ କୋରାଲ୍ ତ୍ରିକୋଣ ଅଞ୍ଚଳରେ ଜଡିତ ଲୋକଙ୍କୁ ଉତ୍ସାହିତ କରିଥାଏ । କୋରାଲ୍ ଗୁଡ଼ିକ ରଙ୍ଗୀନ ଏବଂ ଚିତ୍ତାକର୍ଷକ ଏକ ବୃହତ ଗୋଷ୍ଠୀର ଅମେରୁଦଣ୍ଡି ପ୍ରାଣୀ ଅଟନ୍ତି ।