ଖପ୍ରାଖୋଲ, (ଅଶୋକ କୁମାର ବାଗ) : ବଲାଙ୍ଗିର ଜିଲ୍ଲା ଖପ୍ରାଖୋଲ ଥାନା ଡମନିମାଲ ଗ୍ରାମରେ ଶୁକ୍ରବାର ଅପରାହ୍ନ ସମୟରେ ନିକଟସ୍ଥ ନଦୀକୁ ଗାଧୋଇବାକୁ ଯାଇ ପାଣିରେ ବୁଡି ଜଣେ ବୃଦ୍ଧଙ୍କ ମୃତ୍ୟୁ ଘଟିଛି । ସୂଚନା ଅନୁଯାୟୀ ଲୋଇସିଂହା ଥାନା ଡୁମେରପାଲି ଗ୍ରାମର ଧୂବେଇ ଚରଣ ଧରୁଆ (୮୦) ବିଗତ ପଚାଶ ବର୍ଷରୁ ଉର୍ଦ୍ଧ ସମୟରୁ ଡମନିମାଲ ଗ୍ରାମର ଲୋକଙ୍କୁ କୀର୍ତ୍ତନ ଶିଖାଇବା ପାଇଁ ଯିବା ଆସିବା କରୁଥିଲେ । ଗତ ଦୁଇ ଦିନ ତଳେ ସେ ଡମନିମାଲ ଗ୍ରାମକୁ ବୁଲିବାକୁ ଆସି ଅପରାହ୍ନ ସମୟରେ ଗ୍ରାମ ନିକଟସ୍ଥ ନଦୀକୁ ଗାଧୋଇବାକୁ ଯାଇଥିଲେ । ପରେ ଗ୍ରାମର କିଛି ପିଲା ଶୌଚ ପାଇଁ ନଦୀ ପଟେ ଯାଇ ଧୂବେଇଙ୍କ ଶରୀର ଅଧ ପାଣିରେ ଭାସୁଥିବା ଦେଖିବାକୁ ପାଇଥିଲେ । ଧୂବେଇଙ୍କ ଦୁଇଟି ଝିଅ ବାହା ହୋଇ ଅନ୍ୟତ୍ର ରହୁଥିବା ବେଳେ ତାଙ୍କ ଜ୍ୱାଇଁ ମାନଙ୍କୁ ଗାଁ ଲୋକ ଖବର କରିଥିଲେ । ପରେ ଡମନିମାଲ ଗ୍ରାମର କିଛି ବ୍ୟକ୍ତି ଖପ୍ରାଖୋଲ ଥାନାକୁ ଖବର କରିଥିଲେ । ଘଟଣାର ଖବର ପାଇ ଖପ୍ରାଖୋଲ ପୋଲିସ ଏବଂ ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ଶବକୁ ପାଣିରୁ ବାହାର କରି ଶବକୁ ଜବତ କରି ଘଟଣାର ପାରିପାଶ୍ୱିକ ତଦନ୍ତ ପରେ ଖପ୍ରାଖୋଲ ଥାନା ୟୁ ଡି କେସ ନଂ ୫/୨୦୨୫ ରେ ଏକ ଅପମୃତ୍ୟୁ ମାମଲା ରୁଜୁ କରି ଖପ୍ରାଖୋଲ ଡାକ୍ତରଖାନାକୁ ଶବ ବ୍ୟବଚ୍ଛେଦ ପାଇଁ ପଠାଇଥିଲା । ରାତି ହୋଇଯାଇଥିବାରୁ ଶବ ବ୍ୟବଛେଦ ହୋଇପାରି ନଥିଲା । ଏନେଇ ଖପ୍ରାଖୋଲ ଥାନାଧିକାରୀ ନରେନ୍ଦ୍ର ଛତ୍ରଙ୍କୁ ପଚାରିବାରୁ ଘଟଣାର ଅଧିକ ତଦନ୍ତ ଚାଲିଥିବା ପ୍ରକାଶ କରିଛନ୍ତି ।