- ୬୦ଟି ଷ୍ଟଲରେ ଶୋଭାମଣ୍ଡିତ ହେବ ବିମାନବନ୍ଦର ନିକଟସ୍ଥ ପ୍ରଦର୍ଶନୀ ପଡିଆ
ରାଉରକେଲା, (ସସ୍ମିତା ପ୍ରଧାନ) : ଚଳିତ ମାସ ୨୦, ୨୧ ଓ ୨୨ ତାରିଖ ୩ ଦିନଧରି ରାଉରକେଲା ବିମାନ ବନ୍ଦର ନିକଟସ୍ଥ ପ୍ରଦର୍ଶନୀ ପଡ଼ିଆ ଠାରେ ରାଉରକେଲା ଚ୍ୟାମ୍ବର ଅଫ୍ କମର୍ସ ଏଣ୍ଡ ଇଣ୍ଡଷ୍ଟ୍ରି ପକ୍ଷରୁ ବିଜନେସ୍ କନକ୍ଲେଭ – ୨୦୨୪ ଆୟୋଜିତ ହେବ ବୋଲି ଆଜି ଚ୍ୟାମ୍ବର ଭବନରେ ଅନୁଷ୍ଠିତ ଏକ ସାମ୍ବାଦିକ ସମ୍ମିଳନୀରେ ପ୍ରକାଶ କରାଯାଇଛି । ଏହି ବିଜନେସ୍ କନକ୍ଲେଭର ୬୦ଟି ଷ୍ଟଲରେ ଜିଲ୍ଲାର ବିଭିନ୍ନ ବ୍ୟବସାୟୀକ ପ୍ରତିଷ୍ଠାନ ପକ୍ଷରୁ ରିଏଲ୍ ଇଷ୍ଟେଟ, ଇଲେକ୍ଟ୍ରିକାଲ୍, ହାର୍ଡୱେୟାର, ଫର୍ଣ୍ଣିଚର ଇତ୍ୟାଦି ସାମଗ୍ରୀ ପ୍ରଦର୍ଶିତ ହେବ ବୋଲି ସୂଚନା ପ୍ରଦାନ କରାଯାଇଛି । ୩ ଦିନ ଧରି ଚାଲିବାକୁ ଥିବା ଏହି ବିଜନେସ୍ କନକ୍ଲେଭର ପ୍ରତ୍ୟେକ ଦିନର କାର୍ଯ୍ୟକ୍ରମକୁ ୨ ଭାଗରେ ବିଭକ୍ତ କରାଯାଇଥିବା ବେଳେ, ପ୍ରଥମାର୍ଦ୍ଧ କାର୍ଯ୍ୟକ୍ରମ ପୂର୍ବାହ୍ନ ୧୧ ଟାରୁ ଆରମ୍ଭ ହୋଇ ସନ୍ଧ୍ୟା ୫ଟା ପର୍ଯ୍ୟନ୍ତ ଚାଲିବ ଏବଂ ଦ୍ୱିତୀୟାର୍ଦ୍ଧ କାର୍ଯ୍ୟକ୍ରମ ସନ୍ଧ୍ୟା ୫ଟା ୩୦ରୁ ଆରମ୍ଭ ହେବ । ଏହି ଦ୍ୱିତୀୟାର୍ଦ୍ଧ କାର୍ଯ୍ୟକ୍ରମରେ ରହିଛି ସାଂସ୍କୃତିକ କାର୍ଯ୍ୟକ୍ରମ । ବିଭିନ୍ନ ସଂଗଠନ ଦ୍ୱାରା ସାଂସ୍କୃତିକ କାର୍ଯ୍ୟକ୍ରମ ପରିବେଷଣ ଡିସେମ୍ବର ୨୦ ତାରିଖ ଏବଂ ୨୧ ତାରିଖରେ ଅନୁଷ୍ଠିତ ହେବାକୁ ଥିବା ବେଳେ, ଦ୍ୱିତୀୟ ଦିନ ସାଂସ୍କୃତିକ କାର୍ଯ୍ୟକ୍ରମରେ ସୁସ୍ମିତା ଦାସ ଓ ସାଥୀଙ୍କ ଦ୍ୱାରା ମେଲୋଡି ପରିବେଷଣ କରାଯିବ । ଏହି ବିଜନେସ୍ କନକ୍ଲେଭ ୨୦୨୪ରେ ପରିବର୍ତ୍ତିତ ପରିସ୍ଥିତିରେ ଏମ୍ଏସ୍ଏମ୍ଇ ଏବଂ ବୈଷୟିକ ଅଧିବେଶନରେ ରାଉରକେଲାର ଲକ୍ଷ୍ୟ ସମ୍ପର୍କରେ କାର୍ଯ୍ୟକ୍ରମ ଆୟୋଜିତ ହେବ । ତୃତୀୟ ଦିନ ବିଜନେସ୍ କନକ୍ଲେଭରେ ମହିଳା ସଶକ୍ତିକରଣକୁ ପ୍ରାଧାନ୍ୟ ଦିଆଯାଇ ଏଥିରେ ବିକଶିତ ଭାରତ – ସ୍ୱାବଲମ୍ବି ଓଡିଶା ସମ୍ପର୍କରେ ଗୁରୁତ୍ଵାରୋପ କରାଯାଇ ଆଲୋଚ୍ୟର ବିଷୟ ରଖାଯାଇଛି । ସେହିଭଳି ଷ୍ଟାର୍ଟ୍ଅପ ପାଇଁ ବୈଷୟିକ ଅଧିବେଶନରେ ଆଗକୁ ବଢ଼ିବାର ରାସ୍ତା ଓ ଏହାର ସମ୍ମୁଖୀନ ବିଷୟକୁ ପ୍ରାଧାନ୍ୟ ଦିଆଯାଇ ବୈଷୟିକ ଅଧିବେଶନ ରଖାଯାଇଛି । ରାଉରକେଲା ଚ୍ୟାମ୍ବର ଅଫ୍ କମର୍ସ ଏଣ୍ଡ ଇଣ୍ଡଷ୍ଟ୍ରିର ଏହି ସାମ୍ବାଦିକ ସମ୍ମିଳନୀରେ ଚ୍ୟାମ୍ବରର ଅଧ୍ୟକ୍ଷ ପ୍ରଭାତ କୁମାର ଟେବ୍ରିୱାଲ, ଉପସଭାପତି ସନ୍ତୋଷ କୁମାର ଅଗ୍ରୱାଲ, ସାଧାରଣ ସମ୍ପାଦକ ଶୁଭମ୍ କାପୁର, ଉପସଭାପତି ବିଶ୍ୱନାଥ ଦେ, ଅର୍ଥ ସମ୍ପାଦକ ମନୀଷ ମୋଦୀ, ଲୋକ ସମ୍ପର୍କ ସମ୍ପାଦକ ମିଲନ ମୋଦି ଏବଂ ପୂର୍ବତନ ଅଧ୍ୟକ୍ଷ ସୁନୀଲ କାୟଲଙ୍କ ସମେତ ବହୁ ସଦସ୍ୟ ଉପସ୍ଥିତ ଥିଲେ । ଏହି କାର୍ଯ୍ୟକ୍ରମରେ ସହରର ଶିଳ୍ପଦ୍ୟୋଗୀ, ଲଘୁ ଶିଳ୍ପ ସଂସ୍ଥା, ଯୁବଦ୍ୟୋଗୀ ପ୍ରମୁଖ ଏହାର ସୁଯୋଗ ନେବା ପାଇଁ ଅନୁରୋଧ କରାଯାଇଛି ।