ଜାନୁଆରୀ ୨୪ରେ ମୁମ୍ବାଇ ଠାରେ ଜାତୀୟ ସହରାଞ୍ଚଳ ସମବାୟ ଅର୍ଥ ଏବଂ ବିକାଶ ନିଗମ (ଏନ୍ୟୁସିଏଫ୍ଡିସି)ର କର୍ପୋରେଟ୍ କାର୍ଯ୍ୟାଳୟକୁ ଉଦ୍ଘାଟନ କରିବେ କେନ୍ଦ୍ର ଗୃହମନ୍ତ୍ରୀ ତଥା ସମବାୟ ମନ୍ତ୍ରୀ ଅମିତ ଶାହ
- ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ “ସହକାର ସେ ସମୃଦ୍ଧି” ଦୃଷ୍ଟିକୋଣକୁ ଆହୁରି ସୁଦୃଢ଼ କରିବା ପାଇଁ ସମବାୟ କ୍ଷେତ୍ରରେ ଅନେକ ଗୁରୁତ୍ୱପୂର୍ଣ୍ଣ ପଦକ୍ଷେପ ମଧ୍ୟ ଆରମ୍ଭ କରାଯିବ
- ଅମିତ ଶାହ ଅନ୍ତର୍ଜାତୀୟ ସମବାୟ ବର୍ଷ ୨୦୨୫ ପାଇଁ କାର୍ଯ୍ୟକଳାପର ବାର୍ଷିକ ତାଲିକା ଉନ୍ମୋଚନ କରିବେ, ସାରା ଦେଶରେ ୧୦,୦୦୦ ନବଗଠିତ ବହୁମୁଖୀ ସମବାୟ ସମିତି ପାଇଁ ପ୍ରଶିକ୍ଷଣ କାର୍ଯ୍ୟକ୍ରମର ଶୁଭାରମ୍ଭ କରିବେ ଏବଂ ପ୍ରାଥମିକ ସମବାୟ ସମିତି ପାଇଁ ଏକ ରାଙ୍କିଙ୍ଗ ଫ୍ରେମୱାର୍କ ପ୍ରଣୟନ କରିବେ
- ସହରାଞ୍ଚଳ ସମବାୟ ବ୍ୟାଙ୍କଗୁଡ଼ିକ ସେମାନଙ୍କ କାର୍ଯ୍ୟରେ ସମ୍ମୁଖୀନ ହେଉଥିବା ଆହ୍ୱାନର ମୁକାବିଲା କରିବା ପାଇଁ ଏନ୍ୟୁସିଏଫ୍ଡିସି ନାମକ ଏକ ଶୀର୍ଷ ସଂସ୍ଥା ପ୍ରତିଷ୍ଠା କରାଯାଇଛି, ଏହି ପଦକ୍ଷେପ ପ୍ରାୟ ୧୫୦୦ ସହରାଞ୍ଚଳ ସମବାୟ ବ୍ୟାଙ୍କକୁ ଆବଶ୍ୟକ ଆଇଟି ଭିତ୍ତିଭୂମି ଏବଂ ପରିଚାଳନା ସହାୟତା ପ୍ରଦାନ କରିବ
- ପ୍ରାଥମିକ ସମବାୟ ସମିତିଗୁଡିକ ପାଇଁ ରାଙ୍କିଙ୍ଗ ଫ୍ରେମୱାର୍କ ସମିତି ଗୁଡିକ ମଧ୍ୟରେ ସ୍ୱଚ୍ଛତା, ଦକ୍ଷତା ଏବଂ ଫଳପ୍ରଦତା ବୃଦ୍ଧି କରିବାରେ ସାହାଯ୍ୟ କରିବ ଏବଂ ସେମାନଙ୍କର ବିଶ୍ୱସନୀୟତା ଏବଂ ପ୍ରତିଯୋଗିତାମୂଳକ କ୍ଷମତାରେ ମଧ୍ୟ ଉନ୍ନତି ଆଣିବ
ନୂଆଦିଲ୍ଲୀ, (ପିଆଇବି) : କେନ୍ଦ୍ର ଗୃହମନ୍ତ୍ରୀ ତଥା ସମବାୟ ମନ୍ତ୍ରୀ ଅମିତ ଶାହ ଜାନୁଆରୀ ୨୪ରେ ମୁମ୍ବାଇରେ ଏକ ଗୁରୁତ୍ୱପୂର୍ଣ୍ଣ କାର୍ଯ୍ୟକ୍ରମରେ ଜାତୀୟ ସହରାଞ୍ଚଳ ସମବାୟ ଅର୍ଥ ଏବଂ ବିକାଶ ନିଗମ (ଏନ୍ୟୁସିଏଫ୍ଡିସି)ର କର୍ପୋରେଟ କାର୍ଯ୍ୟାଳୟକୁ ଉଦ୍ଘାଟନ କରିବେ । ଏହି ଅବସରରେ ସମବାୟ କ୍ଷେତ୍ରରେ ଅନେକ ଗୁରୁତ୍ୱପୂର୍ଣ୍ଣ ପଦକ୍ଷେପର ଶୁଭାରମ୍ଭ କରାଯିବ ଯାହା ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ “ସହକାର ସେ ସମୃଦ୍ଧି”ର ସ୍ୱପ୍ନକୁ ଆହୁରି ମଜବୁତ କରିବ । ଅମିତ ଶାହ ଅନ୍ତର୍ଜାତୀୟ ସମବାୟ ବର୍ଷ ୨୦୨୫ ପାଇଁ କାର୍ଯ୍ୟକଳାପର ବାର୍ଷିକ କ୍ୟାଲେଣ୍ଡର ଉନ୍ମୋଚନ କରିବେ, ସାରା ଦେଶରେ ୧୦,୦୦୦ ନବଗଠିତ ବହୁମୁଖୀ ସମବାୟ ସମିତି ପାଇଁ ପ୍ରଶିକ୍ଷଣ କାର୍ଯ୍ୟକ୍ରମର ଶୁଭାରମ୍ଭ କରିବେ ଏବଂ ପ୍ରାଥମିକ ସମବାୟ ସମିତି ପାଇଁ ଏକ ରାଙ୍କିଙ୍ଗ ଫ୍ରେମୱାର୍କ ପ୍ରଣୟନ କରିବେ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଭାରତୀୟ ରିଜର୍ଭ ବ୍ୟାଙ୍କ (ଆର୍ବିଆଇ) ଏବଂ କେନ୍ଦ୍ର ଗୃହମନ୍ତ୍ରୀ ତଥା ସମବାୟ ମନ୍ତ୍ରୀ ଅମିତ ଶାହଙ୍କ ଦୂରଦୃଷ୍ଟି ଏବଂ ଅକ୍ଳାନ୍ତ ପ୍ରୟାସ ଯୋଗୁଁ ସରକାର ସହରାଞ୍ଚଳ ସମବାୟ ବ୍ୟାଙ୍କଗୁଡିକ ସେମାନଙ୍କ ବ୍ୟବସାୟରେ ସମ୍ମୁଖୀନ ହେଉଥିବା ଅସୁବିଧାର ସମାଧାନ କରିବା ପାଇଁ ଜାତୀୟ ସହରାଞ୍ଚଳ ସମବାୟ ଅର୍ଥ ଏବଂ ବିକାଶ ନିଗମ (ଏନ୍ୟୁସିଏଫ୍ଡିସି) ନାମକ ଏକ ଶୀର୍ଷ ସଂସ୍ଥା (ୟୁଓ) ଗଠନ କରିବାକୁ ମଞ୍ଜୁରୀ ଦେଇଛନ୍ତି । ଏହା ଦ୍ୱାରା ପ୍ରାୟ ୧୫୦୦ ସହରାଞ୍ଚଳ ସମବାୟ ବ୍ୟାଙ୍କ (ୟୁସିବି) ଆବଶ୍ୟକ ଆଇଟି ଭିତ୍ତିଭୂମି ଏବଂ ପରିଚାଳନାରେ ସହାୟକ ହେବ । ଆର୍ବିଆଇର ଅନୁମୋଦନ ଅନୁଯାୟୀ, ୩୦୦ କୋଟି ଟଙ୍କାର ପେଡ୍-ଅପ୍ କ୍ୟାପିଟାଲ ପାଇବା ପରେ ରିଜର୍ଭ ବ୍ୟାଙ୍କ ଦ୍ୱାରା ନିର୍ଦ୍ଧାରିତ କାର୍ଯ୍ୟ ଏବଂ କାର୍ଯ୍ୟକଳାପ ସହିତ ଏହି ସଂସ୍ଥା ଏକ ସ୍ୱୟଂ ନିୟାମକ ସଂସ୍ଥା ଭାବରେ କାର୍ଯ୍ୟ କରିବ । ପଞ୍ଜୀକରଣ ତାରିଖଠାରୁ ଏକ ବର୍ଷ ମଧ୍ୟରେ ଅର୍ଥାତ୍ ୨୦୨୫ ଫେବୃଆରି ୮ ତାରିଖ ସୁଦ୍ଧା ପେଡ୍ ଅପ୍ କ୍ୟାପିଟାଲ ହାସଲ କରିବାକୁ ରିଜର୍ଭ ବ୍ୟାଙ୍କ ପକ୍ଷରୁ ନିର୍ଦ୍ଦେଶ ଦିଆଯାଇଥିଲା । ଅନ୍ତର୍ଜାତୀୟ ସମବାୟ ବର୍ଷ ୨୦୨୫ର ବାର୍ଷିକ କାର୍ଯ୍ୟକଳାପର ତାଲିକା ପ୍ରକାଶ ପାଇବା ସମବାୟ ଆନ୍ଦୋଳନକୁ ଏକ ନୂଆ ଦିଗ ଦେବ । ଏହି କାର୍ଯ୍ୟକଳାପ ମାଧ୍ୟମରେ ସମଗ୍ର ଦେଶରେ ସମବାୟ ସଂଗଠନର ଅଂଶଗ୍ରହଣ ବୃଦ୍ଧି ପାଇବ ଏବଂ ବିଶ୍ୱସ୍ତରରେ ସମବାୟ ସଂସ୍ଥାଗୁଡ଼ିକୁ ସୁଦୃଢ଼ କରାଯିବ । ସମବାୟ ବର୍ଷ କାର୍ୟ୍ୟକଳାପ ବିଶ୍ୱସ୍ତରରେ ସହଯୋଗର ଗୁରୁତ୍ୱକୁ ଅନୁଭବ କରିବାରେ ସହାୟକ ହେବ । ଏହା ଦ୍ୱାରା ବିଭିନ୍ନ ଦେଶ ମଧ୍ୟରେ ଅଭିଜ୍ଞତା ଏବଂ ସର୍ବୋତ୍ତମ ଅଭ୍ୟାସର ଆଦାନ ପ୍ରଦାନ ହେବ, ଯାହା ଭାରତରେ ସମବାୟକୁ ଆହୁରି ସୁଦୃଢ଼ କରିବ । ସମବାୟ ମାଧ୍ୟମରେ ଗ୍ରାମୀଣ ବିକାଶ, ନିଯୁକ୍ତି ସୃଷ୍ଟି ଏବଂ ଅର୍ଥନୈତିକ ଅଭିବୃଦ୍ଧି ଲକ୍ଷ୍ୟ ହାସଲ ଦିଗରେ ଏହା ଏକ ଉତପ୍ରେରକ ହେବ । ଏହା ସହିତ ସ୍ଥାନୀୟ ସମୁଦାୟକୁ ସଶକ୍ତ କରିବା ଏବଂ ସେମାନଙ୍କର ସାମାଜିକ-ଅର୍ଥନୈତିକ ବିକାଶରେ ଏହା ସହାୟକ ହେବ । କେନ୍ଦ୍ର ଗୃହମନ୍ତ୍ରୀ ତଥା ସମବାୟ ମନ୍ତ୍ରୀ ଅମିତ ଶାହ ନବଗଠିତ ୧୦,୦୦୦ ବହୁମୁଖୀ ସମବାୟ ସମିତିର ପ୍ରଶିକ୍ଷଣ କାର୍ଯ୍ୟକ୍ରମର ଶୁଭାରମ୍ଭ କରିବେ, ଯାହା ଏହି ସମିତିଗୁଡ଼ିକୁ ଆବଶ୍ୟକ ଦକ୍ଷତା ସହିତ ସଶକ୍ତ କରି ସେମାନଙ୍କ ଦକ୍ଷତା ବୃଦ୍ଧି କରିବ । ଏହା ଅଧୀନରେ ସମବାୟ ସମିତିଗୁଡ଼ିକୁ ଆଧୁନିକ ପରିଚାଳନା, ଆର୍ଥିକ ଯୋଜନା, ଡିଜିଟାଇଜେସନ୍ ଏବଂ ସୁଶାସନ ଉପରେ ସ୍ୱତନ୍ତ୍ର ପ୍ରଶିକ୍ଷଣ ପ୍ରଦାନ କରାଯିବ । ୧୧,୩୫୨ଟି ବହୁମୁଖୀ ସମବାୟ ସମିତି (ଏମ୍ ପିଏସିଏସ୍) ପାଇଁ ମୋଟ ୧୧୩୫ଟି ପ୍ରଶିକ୍ଷଣ କାର୍ଯ୍ୟକ୍ରମ ଅନୁଷ୍ଠିତ ହେବ । ପ୍ରତ୍ୟେକ କାର୍ଯ୍ୟକ୍ରମରେ ୫୦ ଜଣ ପ୍ରତିଯୋଗୀଙ୍କୁ ପ୍ରଶିକ୍ଷଣ ଦେବା ସହିତ ମୋଟ ୫୬,୭୬୦ ଜଣଙ୍କୁ ପ୍ରଶିକ୍ଷଣ ଦେବାକୁ ଲକ୍ଷ୍ୟ ରଖାଯାଇଛି । ଏହି ପ୍ରଶିକ୍ଷଣରେ ୩୩ଟି ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳକୁ ସାମିଲ କରାଯିବ ଏବଂ ଏଥିରେ ୪୩ ଜଣ ମାଷ୍ଟର ଟ୍ରେନର ରହିଛନ୍ତି । ଅମିତ ଶାହ ପ୍ରାଥମିକ ସମବାୟ ପାଇଁ ରାଙ୍କିଙ୍ଗ ଫ୍ରେମୱାର୍କର ଶୁଭାରମ୍ଭ କରିବେ, ଯାହା ସମବାୟଗୁଡ଼ିକର କାର୍ଯ୍ୟଦକ୍ଷତା ମୂଲ୍ୟାୟନ ପାଇଁ ଏକ ଉତ୍ସର୍ଗୀକୃତ ବ୍ୟବସ୍ଥା ପ୍ରଦାନ କରିବ । ଏହି ରାଙ୍କିଙ୍ଗ ଫ୍ରେମୱାର୍କ କମିଟି ଗୁଡ଼ିକୁ ସ୍ୱଚ୍ଛତା, ଦକ୍ଷତା ଏବଂ ଫଳପ୍ରଦତା ବୃଦ୍ଧି କରିବାରେ ସାହାଯ୍ୟ କରିବ, ଯାହା ଦ୍ୱାରା ସେମାନଙ୍କର ବିଶ୍ୱସନୀୟତା ଏବଂ ପ୍ରତିଦ୍ୱନ୍ଦ୍ୱିତା ବୃଦ୍ଧି ପାଇବ । ପ୍ରାଥମିକ ସମବାୟ ସମିତିଗୁଡ଼ିକୁ ଦକ୍ଷ ଓ ସ୍ୱଚ୍ଛ କରିବା ଦିଗରେ ବ୍ୟବଧାନ ଚିହ୍ନଟ, ମୂଲ୍ୟାୟନ, ନିଷ୍ପତ୍ତି ଗ୍ରହଣ ବ୍ୟବସ୍ଥା ପାଇଁ ଏହି ରାଙ୍କିଙ୍ଗ ଫ୍ରେମୱାର୍କ ଏକ ପ୍ଲାଟଫର୍ମ ପ୍ରଦାନ କରିଥାଏ । ଏହା ସହ ଶ୍ରୀ ଶାହ ସମବାୟ ମନ୍ତ୍ରଣାଳୟ ଏବଂ ବିଭିନ୍ନ ରାଜ୍ୟ ଓ କେନ୍ଦ୍ର ଶାସିତ ଅଞ୍ଚଳରେ ପ୍ରମୁଖ କ୍ଷେତ୍ରରେ ଶ୍ରେଷ୍ଠ ପ୍ରଦର୍ଶନ କରୁଥିବା ଏବଂ କାର୍ଯ୍ୟକ୍ଷମ ସମବାୟ ସମିତିଗୁଡ଼ିକୁ ସମ୍ବର୍ଦ୍ଧିତ କରିବେ ।