ଖପ୍ରାଖୋଲ, (ଅଶୋକ କୁମାର ବାଗ) : ଖପ୍ରାଖୋଲ ବ୍ଲକ ଘୁନସର ସ୍ଥିତ ରାଧାବଲ୍ଲଭ ଶ୍ୟାମସୁନ୍ଦର କଲେଜ ସମ୍ମୁଖରେ ଥିବା ପଡ଼ିଆରେ ୩ ନମ୍ବର ଜୋନର ବିଜେଡି ମହିଳା କର୍ମୀ ସମାବେଶ ଅନୁଷ୍ଠିତ ହୋଇଯାଇଛି । ବିଧାୟକ ସରୋଜ କୁମାର ମେହେର ନିଜର ଶକ୍ତି ପ୍ରଦର୍ଶନ କରିଛନ୍ତି ଜନସାଧାରଣ କେତେ ପ୍ରଶଂସା କରୁଛନ୍ତି ତାହା ଆଜିର ବିଜେଡି ମହିଳା କର୍ମିଙ୍କ ସମାବେଶରୁ ଜଣାପଡିଛି । ପାଟଣାଗଡ଼ ନିର୍ବାଚନ ମଣ୍ଡଳୀ ଖପ୍ରାଖୋଲ ବ୍ଲକ ୩ ନମ୍ବର ଜୋନର ଘୁନସର, ବେନ୍ଦେର, ଲାଠୋର, କରୁଆଝର, ଟଙ୍କପାଣି, ରେଙ୍ଗାଲି, ତେଲେନପାଲି, ମହରାପଦର, ନାନ୍ଦୁପଲା, ମଟିଆଭଟା, ଭାନପୁରରୁ ହଜାର ହଜାର ମହିଳାମାନେ କର୍ମୀ ସମ୍ମିଳନୀରେ ଯୋଗଦେଇଥିଲେ । ଏହି ଅବସରରେ ମୁଖ୍ୟ ଅତିଥି ରୂପେ ସ୍ଥାନୀୟ ବିଧାୟକ ତଥା ସରକାରୀ ଦଳର ଉପମୁଖ୍ୟ ସଚେତକ ସରୋଜ କୁମାର ମେହେର ସମ୍ମାନିତ ଅତିଥି ୩ ନମ୍ବର ଜୋନ ଜିଲ୍ଲା ପରିଷଦ ଶ୍ରୀମତୀ ସଞ୍ଜୁକ୍ତା ମେହେର, ବିଧାୟକ ପ୍ରତିନିଧି ରମେଶ ପଧାନ, ବ୍ଲକ ଅଧ୍ୟକ୍ଷା ଶ୍ରୀମତୀ ନିରୁପମା ପଟେଲ ବ୍ଲକ ଉପାଧ୍ୟକ୍ଷ ଶୁଖିରାମ ଷାଣ୍ଡ, ଘୁନସର ସରପଞ୍ଚ ଶ୍ରୀମତୀ ଅନୁଶୟା ସାହୁ, ବିଜେଡି ବରିଷ୍ଠ ନେତା ପବିତ୍ର ପଟେଲ, ଇନ୍ଦ୍ରମଣି ସାହୁ, ସମିତି ସଭ୍ୟ ମୋହନ ସୁନା, ରେଙ୍ଗାଲି ସରପଞ୍ଚ ଉମାକାନ୍ତ ମେହେର, ବଂଶି ବେହେରା ପ୍ରମୁଖ ଯୋଗ ଦେଇଥିଲେ । ଏହି ସମାବେଶରେ ବିଧାୟକ ସରୋଜ ମେହେର ଉଦ୍ବୋଧନ ଦେଇ କହିଥିଲେ କି ପାଞ୍ଚ ବର୍ଷ ପାଟଣାଗଡ ନିର୍ବାଚନ ମଣ୍ଡଳିରେ ବିଜେଡି ଅନେକ ଜନହିତ ତଥା ପ୍ରତ୍ୟେକ ଗାଁକୁ ପିଇବା ପାଣି, ପ୍ରତ୍ୟେକ ପଞ୍ଚାୟତରେ ବ୍ୟାଙ୍କ ସେବା, ପ୍ରତ୍ୟେକ ପଞ୍ଚାୟତକୁ ଲକ୍ଷ୍ମୀବସ ପ୍ରଚଳନ, ମାଁମାନଙ୍କ ପାଇ ମମତା ଯୋଜନା, ବାର୍ଦ୍ଧକ୍ୟ ଭତ୍ତା ୧୦୦୦ ଟଙ୍କା, ପ୍ରତ୍ୟେକ ମହିଳା ସଂଘର ମାଁ’ମାନଙ୍କୁ ୧୦୦୦ ଟଙ୍କା ଏପରି ଅନେକ ଯୋଜନା କରିଛନ୍ତି । ଆଗାମୀ ନିର୍ବାଚନରେ ପାଟଣାଗଡରେ ବିଜେଡି ବହୁମତ ସଂଖ୍ୟାରେ ବିଜୟ ଲାଭ କରିବ ଓ ଆପଣଙ୍କ ଆଶିର୍ବାଦ ମୋ ଉପରେ ଥାଉ ବୋଲି ମୋର ଆଶା ବୋଲି କହିଛନ୍ତି । କାର୍ଯ୍ୟକ୍ରମ ଶେଷରେ ସିମାଞ୍ଚଳ ପୁରୋହିତ ଧନ୍ୟବାଦ ଅର୍ପଣ କରିଥିଲେ ।