- ଅଧିକାର ହାସଲ ପାଇଁ ଆନ୍ଦୋଳନ ଆବଶ୍ୟକ – ସାଂସଦ ନିରଞ୍ଜନ
ପାଟଣାଗଡ଼ : ଜିଲ୍ଲା ଆଦିବାସୀ କଲ୍ୟାଣ ସଂଘ ପାଟଣାଗଡ ବ୍ଲକ ତରଫରୁ ସୁନାମୁଦି ଠାରେ ବିଶାଳ ଆଦିବାସୀ ସମାବେଶ ଅନୁଷ୍ଠିତ ହୋଇଯାଇଛି । ଆଦିବାସୀମାନେ ପାରମ୍ପରିକ ନୃତ୍ୟଗୀତ ସହିତ ଗାଁରେ ସାଂସ୍କୃତିକ ଶୋଭାଯାତ୍ରା କରିଥିଲେ । ପରେ ସଂଘର ବ୍ଲକ ସଭାପତି ଭୁବନେଶ୍ୱର କୁଅଁରଙ୍କ ସଭାପତିତ୍ୱରେ ସଭାକାର୍ଯ୍ୟ ଅନୁଷ୍ଠିତ ହୋଇଥିଲା । ସୁଶ୍ରୀ ମଧୁସ୍ମିତା ନାଗ, ବିଳାସିନୀ ପୁଟା ସ୍ୱାଗତ ସଙ୍ଗୀତ ଗାନ କରିଥିଲେ । ସଭାରେ ମୁଖ୍ୟ ଅତିଥି ସାଂସଦ ରାଜ୍ୟସଭା ନିରଞ୍ଜନ ବିଶି, ସମ୍ମାନିତ ଅତିଥି ସଂଘର ଜିଲ୍ଲା ସମ୍ପାଦକ ହେମେନ୍ଦ୍ର ନାଥ ହାଁସଦା, ବ୍ଲକ ସଭାପତି ପଦ୍ମନ ପ୍ରଧାନୀ ଟିଟିଲାଗଡ଼, ମନରଞ୍ଜନ ଭୋଇ ବଙ୍ଗୋମୁଣ୍ଡା, ରାଜୀବ କୁଅଁର ମୁରିବାହାଲ, ସନ୍ତୋଷ ପୁଟା ସଇଁତଲା , ବଲାଙ୍ଗିର ନଗର ସଭାପତି ରାମଚନ୍ଦ୍ର ମୁର୍ମୁ, ଟିଟିଲାଗଡ଼ ନଗର ସଭାପତି ନିତ୍ୟାନନ୍ଦ ମାଝୀ, ଶ୍ରୀମତୀ ଲକ୍ଷ୍ମୀ ଶବର ଖପ୍ରାଖୋଲ, ଭୁବନେଶ୍ୱର ଧରୁଆ ଆଗଲପୁର, ପ୍ରଫୁଲ୍ଲ ପ୍ରଧାନୀ, କୈଳାଶ ପ୍ରଧାନୀ, ପାର୍ଥରାମ ଭୋଇ, ସଂକୀତ୍ର୍ତ୍ତନ ସିକା, ସୁନାମୁଦି ପଞ୍ଚାୟତ ସଭାପତି ଲଳିତ ମିର୍ଦ୍ଧା, ଉଜଲୀ ଧରୁଆ, ଗୀତା ଧରୁଆ, ନିରୁପମା ଧରୁଆ, ପଞ୍ଚାନନ ମାଝୀ, ମହାଦେବ ଭୋଇ ପ୍ରମୁଖ ମଞ୍ଚାସୀନ ଥିଲେ । ସାଂସଦ ରାଜ୍ୟସଭା ନିରଞ୍ଜନ ବିଶି ତାଙ୍କ ବକ୍ତବ୍ୟରେ ପ୍ରକାଶ କରିଥିଲେ ଯେ, ରାଜ୍ୟରେ ଆଦିବାସୀ ମୁଖ୍ୟମନ୍ତ୍ରୀ ଅଛନ୍ତି ସତ କିନ୍ତୁ ଆଦିବାସୀ ସମ୍ପ୍ରଦାୟର ବିକାଶ ପାଇଁ କୌଣସି କାର୍ଯ୍ୟ କରାଯାଉନାହିଁ । ଆଦିବାସୀ ସମୁଦାୟର କଲ୍ୟାଣ ପାଇଁ ଉଦ୍ଧିଷ୍ଟ ଯୋଜନା ଗୁଡିକୁ ସରକାର ବନ୍ଦ କରିଦେଉଛନ୍ତି । ଉଦାହରଣ ମାଧ୍ୟମରେ ସାଂସଦ ଶ୍ରୀ ବିଶି ଉଦବେଗ ପ୍ରକାଶ କରି କହିଲେ ଯେ, ରାଜ୍ୟରେ ୨୩ ପ୍ରତିଶତ ଆଦିବାସୀ ଛାତ୍ରଛାତ୍ରୀ ପାଇଁ ଘରୋଇ ଇଂରାଜୀ ଶିକ୍ଷାନୁଷ୍ଠାନ ମାନଙ୍କରେ ଏସ୍ଟି ଏସ୍ସି ଛାତ୍ରଛାତ୍ରୀ ସରକାରୀ ଖର୍ଚ୍ଚରେ ପଢ଼ିବା ପାଇଁ ସୁଯୋଗ ପାଉଥିଲେ । ଆବାସିକ ସୁବିଧା ପାଇଁ ଅନ୍ଵେଷା ହଷ୍ଟେଲ ପ୍ରତିଷ୍ଠା ହୋଇଛି । ୨୦୧୫ ମସିହାରୁ ଓଡିଶାରେ ୨୩ ହଜାର ଏସ୍ଟି ଏସ୍ସି ଛାତ୍ରଛାତ୍ରୀ ୯୮ଟି ଅନ୍ଵେଷା ହଷ୍ଟେଲରେ ପଢୁଛନ୍ତି । କିନ୍ତୁ ସରକାର ଏହି ଯୋଜନାରେ ଚଳିତ ଶିକ୍ଷାବର୍ଷରୁ ପ୍ରଥମ ଶ୍ରେଣୀରେ ନାମ ଲେଖା ବନ୍ଦ କରିଦେଇଛନ୍ତି । ସରକାରଙ୍କ ଏଭଳିଆ ମାନସିକତା ଏସ୍ଟି ଏସ୍ସି ବିରୋଧୀ ମନୋଭାବର ପରିଚୟ ବୋଲି କହି ସାଂସଦ ଶ୍ରୀ ବିଶି କ୍ଷୋଭ ପ୍ରକାଶ କରିଥିଲେ । ସେହିଭଳି ମେଡିକାଲ, ଇଞ୍ଜିନିୟରିଙ୍ଗ, ପ୍ରଫେସନେଲ ଉଚ୍ଚ ଶିକ୍ଷାନୁଷ୍ଠାନରେ ଏସ୍ଟି ସମ୍ପ୍ରଦାୟ ପାଇଁ ୨୩ ପ୍ରତିଶତ ସଂରକ୍ଷଣ ବଦଳରେ ୧୨ ପ୍ରତିଶତ ଏବଂ ଏସ୍ସି ପାଇଁ ୧୭ ପ୍ରତିଶତ ବଦଳରେ ୮ ପ୍ରତିଶତ କୋଟା ବ୍ୟବସ୍ଥାକୁ ରାଜ୍ୟସଭା ସାଂସଦ ଶ୍ରୀ ବିଶି କଡ଼ା ସମାଲୋଚନା କରିଥିଲେ । ଜମି, ଜଳ, ଜଙ୍ଗଲ ଉପରେ ଆଦିବାସୀଙ୍କ ଅଖଣ୍ଡ ଅଧିକାର ରହିଛି । ଆଦିବାସୀ ବସବାସ କରୁଥିବା ଜମି ଜଙ୍ଗଲ ଅଞ୍ଚଳରେ ଖଣିଜ ପଦାର୍ଥ ରହିଛି । ତେବେ ଖଣିଜ ଦ୍ରବ୍ୟ ଉତ୍ତୋଳନ ନାଁରେ ଆଦିବାସୀମାନଙ୍କୁ ବିସ୍ଥାପନ କରିବା ଅନୁଚିତ ବୋଲି ଚେତାବନୀ ଦେଇଥିଲେ । ଶେଷରେ ଓଡ଼ିଆ ମାଧ୍ୟମରେ ପଢ଼ିଥିବା ମୁରିବାହାଲ ବ୍ଲକ ଚଲକି ଗାଁର ବିଷ୍ଣୁ ଚରଣ ମାଝୀ ନିଟ୍ ପରୀକ୍ଷାରେ ୧୧୧ ର୍ୟାଙ୍କରେ କୃତିତ୍ୱ ହାସଲ କରି ବୁର୍ଲା ମେଡିକାଲ କଲେଜରେ ଏମ୍ବିବିଏସ୍ ପଢ଼ିବାର ଉଦାହରଣ ସୃଷ୍ଟି କରିଥିବାରୁ ଶ୍ରୀ ମାଝୀଙ୍କୁ ସଂଘ ତରଫରୁ ସମ୍ବର୍ଦ୍ଧିତ କରାଯାଇଥିଲା । ଶ୍ରୀ ମାଝୀଙ୍କୁ ଉତ୍ସାହିତ କରିବା ପାଇଁ ସଂଘ ତରଫରୁ ୫ହଜାର ଟଙ୍କା ଆର୍ଥିକ ସହଯୋଗ କରାଯାଇଥିଲା । ସଂଘର ସହ ସାଧାରଣ ସମ୍ପାଦକ ଗିରିରାଜ ଭୋଇ ସଭା ପରିଚାଳନା କରିଥିଲେ ।