ନୂଆପଡ଼ା, (ନିରାକାର ମେହେର) : ପୁଣି ଗାଈକୁ ଶିକାର କଲା ବାଘୁଣୀ । ନୂଆପଡ଼ା ବ୍ଳକ ତରିଆମହୁଆଭଟା ଗାଁରେ ଏକ ଗାଈକୁ ବାଘୁଣୀ ଶିକାର କରିଥିବାର ସୂଚନା ମିଳିଛି । ଗାଈଟି ଗାଁର ହୁମନ ନାଏକଙ୍କର ବୋଲି ଜଣାପଡ଼ିଛି ।
ଗତ ସକାଳେ ତରିଆମହୁଆଭଟା ଗାଁରେ ହୁମନଙ୍କ ଗାଈ ଜଙ୍ଗଲକୁ ଚରିବାକୁ ଯାଇଥିଲା । ହେଲେ ସନ୍ଧ୍ୟାରେ ଆଉ ଘରକୁ ଫେରିନଥିଲା ।
ବାଘ ଭୟରେ ପରିବାର ଲୋକେ ବି ଜଙ୍ଗଲକୁ ଖୋଜିବାକୁ ଯାଇନଥିଲେ । ଗତକାଲି ରାତିରେ ଗାଁଠାରୁ ୫ ଶହ ମିଟର ଦୂରରେ ଏକ ଚାଷ ଜମିରେ ଗାଈଟିକୁ ବାଘୁଣୀ ଶିକାର କରିଥିବାର ଦେଖିବାକୁ ପାଇଲେ । ବାଘୁଣୀଟି ଗାଈର ତଣ୍ଟିରେ ପଞ୍ଜା ମାରି ପେଟକୁ ଫାଡ଼ି ଦେଇଥିବା ଦେଖାଦେଇଛି । ଗତ ୨୦ ଦିନ ହେବ ମୁଷରଙ୍ଗୀ ପ୍ରସ୍ତାବିତ ସଂରକ୍ଷିତ ଜଙ୍ଗଲରେ ସାବକ ସହ ବାଘୁଣୀ ଆଡ୍ଡା ଜମାଇ ବସିଛି । ରାତିରେ ଗୃହପାଳିତ ପଶୁକୁ ଟାର୍ଗେଟ କରି ଗୋଟିଏ ପରେ ଗୋଟିଏ ଗାଈ, ବାଛୁରୀକୁ ମାରି ଖାଉଛି । ବର୍ତ୍ତମାନ ସୁଦ୍ଧା ଗାଁର ୩ଟି ଗାଈ, ୨ଟି ବାଛୁରୀକୁ ବାଘୁଣୀ ମାରି ଖାଇଥିବା ବେଳେ ଗୋଟିଏ ମଇଁଷି ଓ ଗୋଟିଏ ବାଛୁରୀକୁ ଆକ୍ରମଣ କରି ଘାଇଲା କରିଛି । ଏବେ ଗାଁ ଅଞ୍ଚଳରେ ବାଘର ଆତଙ୍କ ଖେଳିଯାଇଛି ।