ସଇଁତଲା, (ଲକ୍ଷ୍ମୀକାନ୍ତ ସାହୁ) : ଖଇର ଓ କେନ୍ଦୁ କାଠ ଜବତ କରିବା ପାଇଁ ଯାଇଥିବା ବେଳେ ବନବିଭାଗ କର୍ମଚାରୀଙ୍କୁ ଆକ୍ରମଣ କଲେ କାଠ ମାଫିଆ । ବଲାଙ୍ଗିର ଜିଲ୍ଲା ସଇଁତଲା ବନାଞ୍ଚଳରେ କାଠ ମାଫିଆମାନେ ଖଇର ଓ କେନ୍ଦୁକାଠ ବ୍ୟାପକ ଚୋରାଚାଲାଣ କରୁଥିବା ବିଭିନ୍ନ ସମୟରେ ଅଭିଯୋଗ ସାମ୍ନାକୁ ଆସିଛି । ଅଭିଯୋଗ ପାଇ ବନବିଭାଗ ଗତ କିଛିଦିନ ହେବ କାଠ ଚୋରାଚାଲାଣରେ ରୋକ ଲଗେଇବା ପାଇଁ ଅନେକ ଜାଗାରେ ରେଡ୍ କରୁଛନ୍ତି । ଏମିତି ଗୋଟେ ରେଡ୍ ସମୟରେ କାଠ ମାଫିଆଙ୍କ ଆକ୍ରମଣର ଶିକାର ହୋଇଛନ୍ତି ସଇଁତଲା ରେଞ୍ଜର କରମତଲା ବନ କର୍ମଚାରୀ । କରମତଲା ଫରେଷ୍ଟର ଧର୍ମେନ୍ଦ୍ର ରାଏ ତଲବାହାଲ ପଞ୍ଚାୟତର ଲମକାନି ଗ୍ରାମ ନିକଟସ୍ଥ ଜଙ୍ଗଲରେ କାଠ ମାଫିଆମାନେ ଖଇର କାଠ ଜମା କରିଥିବା ଜାଣି ଚଢ଼ାଉ କରିବକୁ ଯାଇଥିଲେ । ଏହି ସମୟରେ ତଲବାହାଲ ପଞ୍ଚାୟତର ପୂର୍ବତନ ସରପଞ୍ଚଙ୍କ ସ୍ୱାମୀ ଚନ୍ଦ୍ରସିଂହ ମାଝୀ, ସୁଶାନ୍ତ ମାଝୀ, ରାଜ କିଶୋର ମାଝୀଙ୍କ ସହ ଅନ୍ୟ କିଛି ଜଣ ଧାରୁଆ ଅସ୍ତ୍ର ଆଣି ବନବିଭାଗ କର୍ମଚାରୀଙ୍କ ଉପରେ ଆକ୍ରମଣ କରିଥିଲେ ଏବଂ ବନବିଭାଗ ନେଇଥିବା ଟ୍ରକର ଦୁଇଟି ଚକକୁ କାଟି ଦେଇଥିଲେ । ଖବର ପାଇ ସଇଁତଲା ରେଞ୍ଜର ସାଗର ରାଜ ନାୟକଙ୍କ ନିର୍ଦ୍ଦେଶରେ ଅଧିକ ବନବିଭାଗ କର୍ମଚାରୀ ଘଟଣାସ୍ଥଳକୁ ପହଞ୍ଚି ବନ ବିଭାଗ କର୍ମଚାରୀ ମାନଙ୍କୁ ଉଦ୍ଧାର କରିଥିଲେ ଓ ଜବତ ହୋଇଥିବା କାଠକୁ ଅନ୍ୟଏକ ଟ୍ରକରେ ନେଇକି ଆସିଥିଲେ । କରମତଲା ଫରେଷ୍ଟର ଧର୍ମେନ୍ଦ୍ର ରାଏ ଏ ସଂପର୍କରେ ସଇଁତଲା ଥାନାରେ ଅଭିଯୋଗ କରିଛନ୍ତି । ତେବେ ପୋଲିସର ତଦନ୍ତ ଜାରି ଥିବା ଜଣାପଡ଼ିଛି ।